​ចិន៖ លោក Wang Yi អ្នកការទូត​ជាន់ខ្ពស់ និង​ជា​ប្រធាន​ការិយាល័យ​កិច្ចការបរទេស​នៃ​គណៈកម្មាធិការ​មជ្ឈិម​របស់​ចិន បាន​បំពេញ​ដំណើរ​ទស្សនកិច្ច​រយៈពេល​មួយ​សប្ដាហ៍​ទៅកាន់​អឺរ៉ុប និង​រុស្ស៊ី ក្នុង​ការងារ​មួយ​ដ៏​លំបាក​នោះ​គឺ​ការផ្សះផ្សា​ទំនាក់ទំនង​ដ៏​ផុយ​ស្រួយ​នៅ​ក្នុង​តំបន់ ​ស្រប​ពេល​មាន​ភាព​តានតឹង​ខ្លាំង​ជាមួយ​សហរដ្ឋអាមេរិក គ្រា​ដែល​សហភាព​អឺរ៉ុប​បង្កើន​ការប្រុងប្រយ័ត្ន​ចំពោះ​ទីក្រុង​ប៉េកាំង និង​ក្ដី​បារម្ភ​ជុំវិញ​សម្ព័ន្ធ​ភាព​របស់​ប្រទេស​ចិន​ជាមួយ​រុស្ស៊ី។

​លោក Wang បាន​ជួប​លោក​ប្រធានាធិបតី​បារាំង Emmanuel Macron កាលពី​ថ្ងៃ​ពុធ​នៅ​វិមាន Elysée ក្រោយ​ដំណើរ​ឈប់​សំចត​នៅ​អ៊ីតាលី ហុង​គ្រី និង​រុស្ស៊ី។ ​ចំណែក​ក្រសួងការបរទេស​អាមេរិក​បាន​និយាយ​កាលពី​ថ្ងៃ​ពុធ​ថា ប្រមុខ​ការទូត​របស់​ខ្លួន​គឺ​លោក Antony Blinken ក៏​ត្រូវ​ទៅ​បំពេញ​ទស្សនកិច្ច​នៅ​ថ្ងៃ​ព្រហស្បតិ៍​នេះ​ដែរ រយៈពេល​ជិត​មួយ​សប្ដាហ៍​នៅ​ក្នុង​ប្រទេស​អាល្លឺម៉ង់ ទួរគី និងក្រិ​ក​។

​ដំណើរ​នេះ​បាន​កើតមានឡើង ខណៈ​ការវាយលុក​របស់​រុស្ស៊ី​លើ​អ៊ុយ​ក្រែ​ន​បង្ក​ក្ដីបារម្ភ​បញ្ហា​សន្តិសុខ​ខ្លាំង​នៅ​អឺរ៉ុប ដែល​បារម្ភ​ថាធ្វើ​ឲ្យ​ប៉ះពាល់​ដល់​ទំនាក់ទំនង​ជាមួយ​ចិន ខណៈ​ទំនាក់ទំនង​របស់​ទីក្រុង Moscow​ ខិតចូល​កាន់តែ​ជិត​ជាមួយ​ទីក្រុង​ប៉េកាំង។ កម្រិត​នៃ​កា​រ​មន្ទិល​សង្ស័យ​នៅក្នុង​អឺរ៉ុប​មាន​តិច​ជាង​សហរដ្ឋអាមេរិក ជាទី​ដែល​លេចចេញ​វត្តមាន​បា​ឡុង ដែល​រដ្ឋបាល​លោក Biden បាន​ហៅថា ​ជា​ផ្នែក​មួយ​នៃ​កិច្ច​ខិតខំ​ប្រឹងប្រែង​ឈ្លប​យកការណ៍ ធ្វើ​ឲ្យ​ចិន​ផ្ទុះ​កំហឹង ប៉ុន្តែ​ភាព​មន្ទិល​នៅតែ​មិន​ទាន់​បាន​លាតត្រដាង​នៅឡើយ៕

អត្ថបទ៖ សុខមាន