កំពត៖ ឯកឧត្តម ម៉ៅ ធនិន អភិបាលខេត្តកំពត បច្ចុប្បន្នកំពុងមានភាពល្បីល្បាញក្នុងការដោះ​ស្រាយ​បញ្ហាវិវាទជូនប្រជាពលរដ្ឋក្រៅប្រព័ន្ធតុលាការ។ ឯកឧត្តម ​បានបញ្ចប់ការដោះស្រាយបញ្ហា​ជូនពលរដ្ឋ​ ក្នុងក្រុងស្រុកចំនួន៣ ​ហើយបេសកកម្មដោះស្រាយនេះ ​គឺបន្តទៅក្រុងស្រុកដទៃផ្សេង​ទៀត​ដែលនៅសល់។ នេះជាការអះអាងដោយផ្ទាល់ របស់ឯកឧត្តម ម៉ៅ ធនិន អភិបាលខេត្តកំពត។

ឯកឧត្តម ម៉ៅ ធនិន អភិបាលខេត្តកំពត ជាអភិបាលខេត្តដែលមានភាពលេចធ្លោខ្លាំង ក្នុងការ​ដោះស្រាយ​បញ្ហាវិវាទ ជូនប្រជាពលរដ្ឋក្រៅប្រព័ន្ធតុលាការ។ គិតចាប់ពីការចូលកាន់ដំណែង​ជាអភិបាលខេត្តកំពត មកទល់ពេលបច្ចុប្បន្ន ​ឯកឧត្តម ម៉ៅ ធនិន បានបន្តចុះដោះស្រាយ​បញ្ហា​តាមមូលដ្ឋាន​ជូនប្រជាពលរដ្ឋរួចរាល់ចំនួន​ ៣ក្រុងស្រុករួចមកហើយ។

ក្នុងនាមជាអភិបាលខេត្ត ​ឯកឧត្តម អះអាងថា នឹងបន្តដោះស្រាយបញ្ហាវិវាទនៅទីតាំង​ក្រុង​ស្រុកដែល​នៅសល់ទាំងអស់។ ឯកឧត្តម លើកឡើងឱ្យប្រជាពលរដ្ឋ ត្រូវដាក់ពាក្យបណ្ដឹង​នៅ​លេខាធិការដ្ឋានរបស់ខេត្ត ដើម្បីមានការកំណត់​កាលបរិច្ឆេទ​ជាក់លាក់ក្នុងការ​ចុះដោះស្រាយ​ដល់មូលដ្ឋានដោយផ្ទាល់។

ឯកឧត្តមអភិបាលខេត្តកំពត ក៏បានបញ្ជាក់ឱ្យប្រជាពលរដ្ឋ ត្រូវមានទំនុកចិត្ចចំពោះការដោះស្រាយ​ក្រៅប្រព័ន្ធតុលាការនេះ​ ហើយការចុះដោះស្រាយគឺធ្វើឡើងដោយមានមន្រ្តីជំនាញ​ មានឯកសារ និងមានទាំងសាក្សីជាក់លាក់ក្នុងការដោះស្រាយបញ្ចប់បញ្ហា។

សូមបញ្ជាក់ថា ការដោះស្រាយបញ្ហាវិវាទក្រៅប្រព័ន្ធតុលាការ ​ក៏មានការគាំទ្រ ពីនាយករដ្ឋមន្រ្តី​កម្ពុជាផងដែរ។ កន្លងទៅសម្ដេចតេជោ ហ៊ុន សែន ​បានកោតសសើរដល់ ​ឯកឧត្តម ម៉ៅ ធនិន ចំពោះការដោះស្រាយបញ្ហាវិវាទជូន​ប្រជាពលរដ្ឋ ​ដល់មូលដ្ឋានដោយផ្ទាល់។ សម្ដេច ក៏បានចាត់ទុកថា ​ជាគំរូល្អសម្រាប់ខេត្តដទៃយកទៅអនុវត្តផងដែរ៕អត្ថបទ៖ គឹមហុក