ភ្នំពេញ ៖ ប្រជាពលរដ្ឋរស់នៅលើអគារបុរីកីឡា ខណ្ឌ៧មករា ជាង១២០០គ្រួសារបានសម្ដែងនូវក្ដីរំភើបរីករាយ និងថ្លែងអំណរគុណចំពោះសម្តេចតេជោ ហ៊ុន សែន ដែលបានផ្ដល់ប័ណ្ណកម្មសិទ្ធិដីធ្លីស្របច្បាប់ជូនគាត់ ហើយថែមទាំងអនុគ្រោះមិនឱ្យពលរដ្ឋបង់ពន្ធប្រថាប់ត្រា ពន្ធអចលនទ្រព្យ និងពន្ធអាករផ្សេងៗថែមទៀត។

ប្រជាពលរដ្ឋរស់នៅលើអគារបុរីកីឡាប្រមាណជាង ១២០០ គ្រួសារ ទទួលបានការដូរ​ដ៏​មាន​តម្លៃពី​សម្តេច​អគ្គមហាសេនាបតីតេជោ ហ៊ុន សែន នូវការផ្តល់ប័ណ្ណកម្មសិទ្ធិលើចំណែកឯកជនដល់ពួកគាត់ ជាមួយនឹងការលើកលែងការបង់ពន្ធប្រថាប់ត្រា ពន្ធអចលនទ្រព្យ និងពន្ធអាករផ្សេងៗថែមទៀត ដែលបានធ្វើឱ្យប្រជាពលរដ្ឋបង្ហាញពីក្តីរំភើបរីករាយចិត្តយ៉ាងខ្លាំងនៅក្នុងពិធីចែកវិញ្ញាបនបត្រសម្គាល់ម្ចាស់ចំណែកឯកជន ដែលបានធ្វើឡើងនៅ សង្កាត់វាលវង់ ខណ្ឌ៧មករា នារសៀលថ្ងៃទី១៦ ខែកុម្ភៈ ឆ្នាំ២០២៣នេះ ក្រោមអធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ ។

ឯកឧត្តម ឃួង ស្រេង មានប្រសាសន៍ថា ត្រឹមតែរយៈពេល១០ថ្ងៃប៉ុណ្ណោះ ដែលរដ្ឋបាល រាជធានីភ្នំពេញ បានអនុវត្តដោយជោគជ័យនូវគោលការណ៍ដឹកនាំដ៏ខ្ពង់ខ្ពស់បំផុតរបស់សម្តេចអគ្គមហាសនាបតីតេជោ ហ៊ុន សែន ស្របតាមខ្លឹមសារន លិខិតលេខ ១៦៥ សជណ.មយ ចុះថ្ងៃទី៦ ខែកុម្ភៈ ឆ្នាំ២០២៣ របស់ទីស្តីការគណៈរដ្ឋមន្ត្រី។ សម្រាប់ពិធីចែកវិញ្ញាបនបត្រសម្គាល់ម្ចាស់ចំណែកឯកជនជូនប្រជាពលរដ្ឋរស់នៅតាមអគារបុរីកីឡាទាំង៨អគារនាពេលនេះ គឺពិតជាបានឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់បំផុតរបស់ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់ សម្តេចតេជោនាយករដ្ឋមន្ត្រី ក្នុងការធានាសិទ្ធិកាន់កាប់ស្របច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខុមាលភាព និងកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងស្ថិរភាពសង្គម។

ឯកឧត្តម ឃួង ស្រេង បន្តថា ការចែកប័ណ្ណកម្មសិទ្ធិជូនប្រជាពលរដ្ឋគឺជាការរួមចំណែកយ៉ាងសំខាន់ក្នុងការដោះស្រាយ​ផលប៉ះពាល់ជូនប្រជាពលរដ្ឋមូលដ្ឋាន ដោយផ្អែកតាមគោលការណ៍ សន្តិសហវិជ្ជមាន និង ជាការធ្វើឱ្យ​មានភាពច្បាស់លាស់រវាងកម្មសិទ្ធិឯកជន និងកម្មសិទ្ធិសាធារណៈរបស់រដ្ឋ ដោយឈរលើមូលដ្ឋាននយោបាយ ឈ្នះ-ឈ្នះ របស់រាជរដ្ឋាភិបាលលើវិស័យដីធ្លី ហើយកាន់តែពិសេសជាងនេះទៅទៀតនោះ សម្ដេចតេជោនាយករដ្ឋមន្ត្រី បានសម្រេចលើកលែងការបង់ពន្ធប្រថាប់ត្រា ពន្ធអចលនទ្រព្យ និងពន្ធអាករផ្សេងៗ​ក្នុងដំណើរការ​ចុះបញ្ជីកម្មសិទ្ធិជូនប្រជាពលរដ្ឋចំនួនជាង១,២០០គ្រួសារ នៃចំណែកអគារស្នាក់នៅរួមចំនួន ១.៣៩២ បន្ទប់ ក្នុងអគារទាំង ៨ នេះថែមទៀតផង។

ខណៈទទួលបានប័ណ្ណកម្មសិទ្ធិស្របច្បាប់នេះ ប្រជាពលរដ្ឋបានបង្ហាញក្ដីរំភើបរីករាយបំផុត ដោយគាត់បានថ្លែងអំណរគុណសម្ដេចតេជោ និងប្រកាសគាំទ្រសម្ដេចតេជោ និងឯកឧត្តម ហ៊ុន ណែត បន្តដឹកនាំប្រទេសយូរអង្វែងតទៅ។

លោក ថេង សុថុល អភិបាលខណ្ឌ៧មករា បានឱ្យដឹងថា ប្រជាពលរដ្ឋរស់​នៅលើអគារ​សហកម្មសិទ្ធិបុរីកីឡា​ទាំង០៨អគារ ក្នុងសង្កាត់វាលវង់ ខណ្ឌ៧មករា មានក្តីរំភើបរីករាយ​ក្រៃលែង ព្រោះវិញ្ញាបនបត្រសម្គាល់ម្ចាស់អចលនវត្ថុ ដែលម្ចាស់កម្មសិទ្ធិទទួលបាននាពេលនេះ ពិតជាមានតម្លៃសំខាន់ខ្លាំងណាស់ ក្នុងការបង្កើនសេដ្ឋកិច្ច និងជីវភាពគ្រួសារ ។ ដូច្នេះសូមប្រជាពលរដ្ឋថែរក្សាទុកដាក់ឱ្យបាន គង់វង្ស ជៀសវាងការបាត់បង់ ពីព្រោះវិញ្ញាបនបត្រ​សម្គាល់ម្ចាស់​អចលនវត្ថុនេះ គឺជា ឯកសារដ៏មានសំខាន់ ដែលបញ្ជាក់ពីភាព​ស្របច្បាប់នៃអចលនទ្រព្យរបស់ម្ចាស់ទ្រព្យ ហើយមិនត្រឹម​តែធានានូវសុវត្ថិភាពផ្ទះសម្បែងរបស់បងប្អូនប៉ុណ្ណោះទេ ប័ណ្ណនេះអាចផ្តល់​នូវអត្ថប្រយោជន៍​ជាច្រើនតាមតម្រូវការរបស់ប្រជាពលរដ្ឋ ឬធ្វើអំណោយសំរាប់កូនចៅទៅថ្ងៃ អនាគត៕ អត្ថបទ ៖ ប្រាក់ វ៉ាន់ដា