សៀមរាប៖ មន្ត្រីជំនាញក្រសួងទេសចរណ៍ បានជំរុញទៅម្ចាស់ទីតាំងបម្រើសេវាទេសចរណ៍ នៅក្នុងខេត្តសៀមរាប ត្រៀមខ្លួនឲ្យបានរួចរាល់ នូវសេវាកម្មផ្សេងៗ ដើម្បីទទួលភ្ញៀវទេសចរ​ជនជាតិចិន ដែលនឹងសម្រុកមកនៅខែមីនា ខណៈនៅឆ្នាំនេះ កម្ពុជារំពឹងថា នឹងទទួលបានភ្ញៀវចិនប្រមាណពី ៨០ម៉ឺន ទៅ១លាននាក់ ។

ក្នុងពិធីផ្សព្វផ្សាយសៀវភៅស ស្តីពីត្រៀមទទួលភ្ញៀវទេសចរចិន China Ready កាលពីថ្ងៃទី១៦ ខែកុម្ភៈ ឆ្នាំ២០២៣ ឯកឧត្តម ឈុន មករា អគ្គលេខាធិការរង និងជាប្រធាននាយកដ្ឋានគ្រប់គ្រង​ទីភ្នាក់ងារដឹកជញ្ជូន និងមគ្គុទេសក៏ទេចរណ៍ បានលើកឡើងថា ម្ចាស់សេវាកម្មទេសចរណ៍ទាំងអស់ ត្រូវពិនិត្យមើលសេវាកម្មរបស់ខ្លួន និងរៀបចំឲ្យស្របទៅនឹងការចង់បានរបស់ភ្ញៀវចិន ដែលមាន​ការសរសេរតម្លៃ ឬមុខទំនិញជាភាសារចិន បន្ថែមពីភាសារខ្មែរ និងអង់គ្លេស ។

ឯកឧត្តមបានបន្តថា ទីតាំងនីមួយៗ ត្រូវមានបុគ្គលិកចេះភាសារចិន ព្រោះដោយសារភ្ញៀវចិនភាគ​ច្រើន ពុំសូវប្រើប្រាស់ភាសារអង់គ្លេស ជាពិសេសត្រូវអនុវត្តតាមសៀវភៅស ដែលត្រូវបាន​ផ្សព្វផ្សាយ ហើយកម្ពុជា ក៏ជាប្រទេសជាច្រើនទៀត ជាគោលដៅទេសចរណ៍មួយរបស់​ភ្ញៀវទេសចរចិនផងដែរ ។

ឯកឧត្តម ឈុន មករា បានបញ្ជាក់ថា បច្ចុប្បន្ននៅខេត្តសៀមរាប មានការខ្វះខាត សម្រាប់ទីតាំង​សេវាកម្ម ដើម្បីទទួលភ្ញៀចទេសចរចិន ដែលរួមមានហាងទំនិញ ឬវត្ថុអនុស្សាវរីយ៍ បន្ទាប់ពីពួកគេ​បាន​ដើរទស្សនាប្រាំងប្រាសាទនានា នៅតំបន់អង្គរ ។

គួរបញ្ជាក់ថា ក្នុងដំណើរទស្សនកិច្ចផ្លូវការ របស់សម្ដេតេជោ ហ៊ុន សែន នាយករដ្ឋមន្ត្រីនៃព្រះរាជា​ណាចក្រកម្ពុជា នាពេលថ្មីៗនេះ ដោយសម្ដេចបានស្នើទៅឯកឧត្តម ស៊ី ជិនពីង ប្រធានាធិបតីចិន ជួយជំរុញបន្ថែម ដល់ជនជាតិចិន មកលេងកម្សាន្តឲ្យបានច្រើន នៅក្នុងប្រទេសកម្ពុជា​ដែលបាន​ត្រៀមលក្ខណៈទទួលរួចរាល់ ខណៈកាលពីដើមខែកុម្ភៈ ឆ្នាំ២០២៣នេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានធ្វើពិធីទទួលភ្ញៀវទេសចរចិន នៅព្រលានយន្តហោះ​អន្តរជាតិពោធិ៍ចិនតុងផងដែរ ៕