ភ្នំពេញ៖ ព្រឹទ្ធសភានៃព្រះរាជាណាចក្រកម្ពុជា នឹងបើកកិច្ចប្រជុំពិនិត្យ និងពិភាក្សាសេចក្តីព្រាងច្បាប់ ស្តីពីប្រព័ន្ធហិរញ្ញវត្ថុសាធារណៈ និងសេចក្តីព្រាងច្បាប់ ស្តីពីការគ្រប់គ្រងទឹកស្អាត នៅថ្ងៃចន្ទទី២០ ខែកុម្ភៈ ឆ្នាំ២០២៣នេះក្រោមអធិបតីភាព​ឯកឧត្តមកិត្តិនីតិកោសលបណ្ឌិត ស៊ឹម កា ប្រធានស្តីទីព្រឹទ្ធសភាកម្ពុជា។ នេះបើយោងតាមសេចក្តីប្រកាសព័ត៌មាន ស្តីពីលទ្ធផលនៃកិច្ចប្រជុំគណៈកម្មាធិការអចិន្រ្តៃយ៍​ព្រឹទ្ធសភា នាថ្ងៃទី១៧ ខែកុម្ភៈនេះ។

សេចក្តីព្រាងច្បាប់ចំនួន២ រួមមាន សេចក្តីព្រាងច្បាប់ស្តីពី ប្រព័ន្ធហិរញ្ញវត្ថុសាធារណៈ និងសេចក្តី​ព្រាងច្បាប់ស្តីពី ការគ្រប់គ្រងទឹកស្អាត ត្រូវបានរដ្ឋសភា អនុម័តទាំងស្រុងនៅថ្ងៃទី៨ ខែកុម្ភៈ ឆ្នាំ២០២៣នេះ ដោយការអនុម័តនេះបានធ្វើឡើងក្នុងសម័យប្រជុំវិសាមញ្ញ នីតិកាលទី៦ រដ្ឋសភា ក្រោមអធិបតីភាព សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រ​កម្ពុជា។

សូមបញ្ជាក់ថា សេចក្តីព្រាងច្បាប់ស្តីពី ប្រព័ន្ធហិរញ្ញវត្ថុសាធារណៈត្រូវបានរៀបចំឡើង​ក្នុងគោល​បំណងដើម្បី កសាងក្របខ័ណ្ឌគតិយុត្តគោលនិងចាំបាច់សម្រាប់ការអនុវត្តប្រព័ន្ធ​ថវិកាព័ត៌មាន​សមិទ្ធកម្ម ឬហៅថា «ថវិកាសមិទ្ធកម្ម» សមស្របសម្រាប់កម្ពុជា ស្របតាមយុទ្ធសាស្រ្តនៃ​ការកែទម្រង់ប្រព័ន្ធថវិកាឆ្នាំ២០១៨-២០២៥ ដែលជាស្នូលនៃការកែទម្រង់គ្រប់គ្រង​ហិរញ្ញវត្ថុសាធារណៈ។

សេចក្តីព្រាងច្បាប់ខាងលើនេះ ក៏នឹងក្លាយក្របខ័ណ្ឌគតិយុត្តមួយ កំណត់ពីគោលការណ៍ជា មូលដ្ឋានសម្រាប់គ្រប់គ្រងហិរញ្ញវត្ថុសាធារណៈ និងការរៀបចំច្បាប់ហិរញ្ញវត្ថុ ព្រមទាំងកំណត់​អំពីមុខងារ និង ការទទួលខុសត្រូវរបស់តួអង្គពាក់ព័ន្ធ ក៏ដូចជាការផ្ទេរសិទ្ធិអំណាចផ្ទៃក្នុង និងការ​ទទួល​ខុសត្រូវរបស់ក្រសួង ស្ថាប័នចំពោះរាជរដ្ឋាភិបាល និងរដ្ឋសភាក្នុងក្របខ័ណ្ឌនៃកញ្ចប់ថវិកា​របស់ខ្លួនផងដែរ។ សេចក្តីព្រាងមាន ៩ជំពូក ១០៩មាត្រា។

ដោយឡែកសេចក្តីព្រាងច្បាប់ស្តីពី ការគ្រប់គ្រងទឹកស្អាត គឺមាន១៥ជំពូក ៦៥មាត្រា។ សេចក្តី ព្រាងច្បាប់នេះ ជាមូលដ្ឋានដ៏សំខាន់ដែលអាចទ្រទ្រង់ និងត្រូវឆ្លើយតបទៅនឹងសន្ទុះអភិវឌ្ឍន៍​សេដ្ឋកិច្ច សង្គមរបស់ព្រះរាជាណាចក្រកម្ពុជា ដែលមានការរីកចំរើន ជាលំដាប់ឥតឈប់ឈរ​ពីមួយឆ្នាំទៅ​មួយឆ្នាំ ពិសេសចាប់ពីដំណាក់កាលនៃការអនុវត្តនយោបាយ ឈ្នះ ឈ្នះ និងយុទ្ធសាស្រ្តចតុកោណរបស់រាជរដ្ឋាភិបាលកម្ពុជា។

ការផ្គត់ផ្គង់ទឹកស្អាតគឺជាអាទិភាពមួយ ក្នុងចំណោមវិស័យអាទិភាពទាំងបួន នៅក្នុងយុទ្ធ សាស្រ្តចតុកោណដំណាក់កាលទី៤ នៃរាជរដ្ឋាភិបាល នីតិកាលទី៦ ដែលមានមនុស្ស ផ្លូវ ភ្លើង និងទឹកជាដើម៕អត្ថបទ៖ បាន ចក់