​កោះ​តៃវ៉ាន់៖ ក្រុម​អាជ្ញាធរ​យោធា​កោះ​តៃវ៉ាន់​បាន​និយាយ​កាលពី​ថ្ងៃ​ព្រហស្បតិ៍​ថា ខ្លួន​បាន​រក​ឃើញ​បំណែក​ដែល​អាច​ជា​បា​ឡុង​តាមដាន​អាកាសធាតុ​ដែល​បាន​ធ្លាក់ ​ទំនងជា​របស់​ប្រទេស​ចិន​នៅ​លើ​កោះដាច់​ស្រយាល​មួយ​ជិត​ឆ្នេរសមុទ្រ​របស់​ចិន ស្រប​ពេល​ផ្ទុះ​ជម្លោះ​រវាង​ចិន ​និង​សហរដ្ឋអាមេរិក​ជុំវិញ​បា​ឡុង​ដែល​អាមេរិក​ចោទ​ថា ​ជា​បា​ឡុង​ចារកម្ម​របស់​ចិន​។

​កោះ​តៃវ៉ាន់​ដែល​ត្រូវ​បាន​ប្រទេស​ចិន​អះអាង​ថា​ជា​ដែនដី​របស់​ខ្លួន បាន​ត្អូញត្អែរ​ពី​ការ​រំខាន​ដែល​ចេះ​តែ​កើន​ឡើង​ដោយ​កងកម្លាំងប្រដាប់អាវុធ​របស់​ចិន​កាលពី​ ៣​ឆ្នាំ​កន្លងទៅ រួម​ទាំង​ការហោះហើរ​យន្តហោះ​ចម្បាំង​ និង​យាន​ដ្រូ​ន​ជិត​កោះ​នេះ។ ទាហាន​តៃវ៉ាន់​បាន​និយាយ​ថា ​កាលពី​ល្ងាច​ថ្ងៃ​ព្រហស្បតិ៍​ថា កងកម្លាំង​របស់​ខ្លួន​នៅ​លើ​កោះ Dongyin ផ្នែក​មួយ​នៃ​ប្រជុំ​កោះ Matsu គ្រប់គ្រង​ដោយ​កោះ​តៃវ៉ាន់​ក្បែរ​ឆ្នេរសមុទ្រ Fuzhou របស់​ចិន បាន​តាមដាន​វត្ថុ​មិន​ស្គាល់​មួយ​ធ្លាក់​ពីលើ​អាកាស បន្ទាប់មក​បាន​រក​ឃើញ​បំណែក​បា​ឡុង​នៅ​កន្លែង​បាញ់​ស៊ី​ប​។

​កងទ័ព​និយាយ​ថា វត្ថុ​រាង​មូលមាន​អង្គត់​ផ្ចិត​ប្រហែល​មួយ​ម៉ែត្រ មាន​ប្រអប់​ផ្ទុក​ឧបករណ៍ ដែល​មាន​សរសេរ​ជា​វត្ថុ​សម្គាល់​ជា​អក្សរ​ចិន ដែល​ត្រូវ​បាន​ប្រើប្រាស់​នៅក្នុង​ប្រទេស​ចិនមិនមែន​នៅ​កោះ​តៃវ៉ាន់​ទេ និង​ពាក្យ​ថា "Taiyuan Radio No 1 Factory Co, Ltd." ដែលជា​ឧបករណ៍​ថត​សំឡេង​ឌីជីថល GTS13 និង​ឧបករណ៍​ស្រាវជ្រាវ​ឧតុនិយម៕

អត្ថបទ៖ សុខមាន