​ភ្នំពេញ៖ ក្រសួងអប់រំ យុវជន និងកីឡា តាមរយៈហ្វេសប៊ុកផ្លូវការរបស់ខ្លួន បានក្រើនរម្លឹកហាមប្រាមសិស្សជាថ្មី មិនឱ្យបរិភោគនំចំនី ក៏ដូចជាភេសជ្ជៈមួយចំនួនជាដាច់ខាត ព្រោះវាបង្កជាការប៉ះពាល់ដល់សុខភាព។

ក្រសួងអប់រំ យុវជន និងកីឡា កាលពីថ្ងៃទី ១៦ ខែកុម្ភៈ បានបង្ហោះនូវរូបភាពជាច្រើនសន្លឹក ដែលភ្ជាប់​ជាមួយសេចក្ដីណែនាំ ស្ដីពីការពង្រឹងវិធានការការលើកកម្ពស់សុវត្ថិភាព និងសុខុមាលភាព​ចំណីអាហារតាមគ្រឹះស្ថានសិក្សាចំណេះដឹងទូទៅសាធារណៈ និងឯកជន។ រូបថតជាច្រើនសន្លឹកនេះ ​ជារូបភាពនំចំណីដែលមានការហាមប្រាម ​សិស្សមិនឱ្យបរិភោគនោះទេ ក្នុងនោះមានដូចជានំចំណីជាប្រភេទ hot dog , ជាលក្ខណៈទឹក រឺចាហួយកញ្ចប់ ប្រហិត ភេសជ្ជៈកំប៉ុង​ដែល​មានរសជាតិផ្អែមជាដើម។ នំចំណីទាំងនេះ គឺក្រសួងអប់រំ ចាត់ទុកជាចំណី​អាហារមានហានិភ័យខ្ពស់ចំពោះសុខភាព ​និងត្រូវបានហាមឃាត់ក្នុងគ្រឹះស្ថានសិក្សា។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន ​និងកីឡា លើកឡើងថា ដើម្បីអន្តរាគមន៍​ការអនុវត្តករណីនេះក្រសួង ​មានវិធានការរដ្ឋបាលតាមឋានានុក្រមតាមទិដ្ឋភាពជាក់ស្តែង។ ជាយន្តការរដ្ឋបាល មន្ទីរអប់រំ ជំរុញការអនុវត្តសេចក្តីណែនាំដោយ​សហការ​ជាមួយ​គណៈគ្រប់គ្រង​សាលារៀន។ គណៈគ្រប់គ្រងសាលារៀនត្រូវគ្រប់គ្រងកិច្ចការទូទៅនៅទីតាំងសាលារៀន។ ករណីលក់ដូរនៅសាលារៀន ​គណៈគ្រប់គ្រងសាលារៀនមានកិច្ចសន្យារវាងអ្នកលក់ដូរ​និង​នាយកសាលា។ ដូចនេះ ​គណៈគ្រប់គ្រងសាលារៀនត្រូវគ្រប់គ្រងការលក់ដូរដែលត្រូវស្រប​ជាមួយកិច្ចសន្យាលក់ដូរលើទីតាំងសាលារៀន។ ​បើការលក់ដូរផ្ទុយពីកិច្ចសន្យានេះ គណៈគ្រប់គ្រង​អាចអនុវត្តវិធានការរដ្ឋបាលមានជាធរមាន ។

ពាក់ព័ន្ធនឹងបញ្ហានេះ លោក ហែម ស៊ីណារ៉េត ជាប្រធានមន្ទីរអប់រំរាជធានីភ្នំពេញ បានប្រាប់​BTVតាមទូរស័ព្ទថា ការលក់នំចំណី ក៏ដូចជាភេសជ្ជៈកំប៉ុងនៅតាមសាលារៀនក្នុង​រាជធានីភ្នំពេញ គឺមានការកាត់បន្ថយច្រើន​ នៅសល់តែសាលាមួយចំនួនប៉ុណ្ណោះពុំទាន់អនុវត្តបានត្រឹមត្រូវ។ លោក ក៏បញ្ជាក់ដែរថា ​ការងារនេះត្រូវជំរុញបន្ថែម ដែលគណៈគ្រប់គ្រងសាលាត្រូវធ្វើ​កិច្ចសន្យា​ជាមួយអ្នកលក់ដូរ រឺឈានទៅការបញ្ឈប់ការលក់ដូរក្នុងករណីបន្តមិនគោរពតាម។

ពាក់ព័ន្ធនឹងបញ្ហានេះដែរសម្រាប់ សាលាបឋមសិក្សាចតុមុខ ជាសាលាគំរូសម្រាប់កម្ពុជា បច្ចុប្បន្ន​គឺមានការលើកទឹកចិត្តឱ្យអាណាព្យាបាល ​វេចខ្ចប់ចំណីអាហារ ​ក៏ដូចជាទឹកមកពីផ្ទះដោយខ្លួនឯង។ សិស្សនិងអាណាព្យាបាល ​ក៏បានចូលរួមអនុវត្ត បានភាគច្រើនផងដែរ។ ​សម្រាប់លោកស្រី ឈូក សុភាព ដែលមានចៅសិក្សានៅសាលាបឋមសិក្សាចតុមុខ លើកឡើងថា សុខភាពចៅ​របស់​គាត់ពិតជាសំខាន់។ ​ហេតុដូចនេះ លោកស្រីមិនអនុញ្ញាតឱ្យ ចៅទិញនំកញ្ចប់ រឺភេសជ្ជៈកំប៉ុង​បរិភោគនោះទេ។ លោកស្រីសុខចិត្ត ចម្អិនម្ហូបអាហារជូនចៅជារៀងរាល់ថ្ងៃ។

ចំណីអាហារ ត្រូវបានហាមប្រាមមិនឱ្យមានការលក់ក្នុងគ្រឹះស្ថានសិក្សា​ ដែលក្រសួងអប់រំ បានកំណត់​គឺមានចំនួន ៦ប្រភេទ។

ក្នុងនោះរួមមាន ចំណីអាហារគ្រប់ប្រភេទដែលហួសកំណត់បរិច្ឆេទប្រើប្រាស់ គ្រឿងស្រវឹង និង​ផលិតផលថ្នាំជក់គ្រប់ប្រភេទ ចំណីអាហារដែលមានប្រភពមិនច្បាស់លាស់ ភេសជ្ជៈប៉ូវកម្លាំង ភេសជ្ជៈផ្អែម កាហ្វេ ការ៉េម ទឹកស៊ីរ៉ូគ្រប់ប្រភេទ ស្ករសូកូឡា ស្ករគ្រាប់ ​ស្ករកៅស៊ូគ្រប់ប្រភេទ ចាហួយគ្រប់ប្រភេទ នំដូណាត់ និងនំផ្អែម៕ អត្ថបទ៖ គឹមហុក