​ថៃ៖ ក្រុមគ្រួសារ​របស់​យុវជន​វ័យ ​១៧​ឆ្នាំ​ឈ្មោះ Duangpetch Promthep អតីត​ប្រធាន​ក្រុមបាល់ទាត់​យុវជន​របស់​ថៃ ដែល​ត្រូវ​បាន​ជួយសង្គ្រោះ​ចេញពី​ល្អាង​ភ្នំ ​Tham Luang ទឹក​លិច​កាលពី​ឆ្នាំ​២០១៨ បាន​អំពាវនាវ​រក​ជំនួយ​ក្នុង​ការ​នាំ​យក​សាកសព​កូនប្រុស​របស់​ខ្លួន​មកកាន់​ប្រទេស​ថៃ​វិញ ក្រោយ​បាន​ស្លាប់​នៅ​ក្នុង​ចក្រភព​អង់គ្លេស​។

​ម្ដាយ​របស់ Duangpetch អ្នកស្រី Thanaporn Promthep បាន​បង្ហាញ​ក្ដី​សង្ឃឹម​របស់​ក្រុម​គ្រួសារ​ក្នុង​នាំ​យក​សាកសព​របស់​គេ​មកកាន់​ប្រទេស​ថៃ​ នៅ​ក្នុង​សន្និសីទ​សារព័ត៌មាន​តាម Zoom កាលពី​ថ្ងៃ​ពុធ​។​ អ្នកស្រី​និយាយ​ថា យើង​ចង់បាន​សាកសព​កូនប្រុស​របស់​យើង​មកវិញ ព្រោះ​គ្រួសារ​របស់​យើង​មិន​មាន​ប្រាក់​ច្រើន​ទេ យើង​គ្មាន​លទ្ធភាព​ទេ។ ដូច្នេះ​យើង​សូម​ឲ្យ​អ្នក​ជួយ​នាំ​សាកសព​កូនប្រុស​របស់​យើងខ្ញុំ​ត្រឡប់​មក​ផ្ទះ​របស់​គេ​វិញ​។ សារព័ត៌មាន Reuters មិន​អាច​បញ្ជាក់​ដោយ​ឯករាជ្យ​បានទេពី​មូលហេតុ​នៃ​ការ​ស្លាប់​របស់​យុវជន​រូប​នេះ​បានទេ​។

ដំណឹង​មរណភាព​នេះ​ត្រូវ​បាន​ចែករំលែក​នៅ​លើ​បណ្ដាញ​សង្គម ​ដោយ​ព្រះសង្ឃ​ពុទ្ធសាសនា​ដែល​ធ្លាប់​បាន​បង្រៀន​ក្មេង​ប្រុស​នេះ​នៅ​ក្នុង​ខេត្ត Chiang Rai ភាគ​ខាងជើង​របស់​ប្រទេស​ថៃ​។​ គួរ​រម្លឹក​ថា ក្រោយ​ការ​ជួយ​សង្គ្រោះ​ចេញពី​ល្អាង​ភ្នំ​រួច ក្រុម​ក្មេង​ប្រុស​មាន​សមាជិក​ ១២​នាក់​នេះ​ត្រូវ​បាន​អញ្ជើញ​ឲ្យ​ចូលរួម​ទស្សនា​ការប្រកួត​បាល់ទាត់​របស់​ក្រុម Manchester United ហើយ​រឿងរ៉ាវ​របស់​ពួកគេ​ក្លាយ​ជា​ប្រធានបទ​សម្រាប់​សៀវភៅ ឯកសារ ​និង​ខ្សែភាពយន្ត​ ដូចជា​រឿង​ភាគ​ក្រុមហ៊ុន Netflix ដែល​មាន​ចំណងជើង​ថា ​"Thai Cave Rescue"៕

អត្ថបទ៖ សុខមាន