ភ្នំពេញ៖ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានរំលឹក និងណែនាំ​បន្ថែមដល់កងកម្លាំងនគរបាលដែលជាសិក្ខាកាមទាំងអស់ ត្រូវត្រៀមទទួលបទ​បញ្ជាក្នុងព្រឹត្តិការណ៍​កីឡាស៊ីហ្គេម និង អាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះនាពេលខាងមុខ។

ថ្លែងក្នុងពិធីបិទវគ្គបំប៉នជំនាញកសាងបណ្ដាញមូលដ្ឋានសម្ងាត់របស់កម្លាំងសន្ដិសុខ និង​វគ្គបំប៉នជំនាញបច្ចេកទេសព្រហ្មទណ្ឌ និងបំពាក់​ឋានន្ដរស័ក្ដិ​ជូននាយនគរបាល នៅ​សាលានគរបាលជាតិមិត្តភាពកម្ពុជា-វៀតណាម នៅខេត្តកំពង់ស្ពឺ នាព្រឹកថ្ងៃទី១៧ ខែកុម្ភៈ ឆ្នាំ២០២៣នេះ​ ឧត្តមសេនីយ៍ឯក ឆាយ គឹមខឿន បានលើកឡើងថា​ នៅក្នុងឆ្នាំ២០២៣នេះ កម្លាំង​សមត្ថកិច្ចកម្ពុជា និយាយជារួម ​និងនិយាយ​ដោយឡែក​ កងកម្លាំងនគរបាលជាតិ មានភារកិច្ចដ៏សំខាន់ជាច្រើនទៀត ដូចជាការប្រកួតកីឡាស៊ីហ្គេម និងអាស៊ានប៉ារ៉ាហ្គេម និងការបោះឆ្នោតជ្រើសតាំងតំណាងរាស្ដ្រ នីតិកាលទី៧ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ។ ដូច្នេះកងកម្លាំងទាំងអស់ត្រូវត្រៀមខ្លួនទទួលបទបញ្ជាតាមផែនការរៀងៗ ខ្លួនដែលត្រូវបានកំណត់។

នៅក្នុងឱកាសនោះដែរ ឧត្តមសេនីយ៍ឯក ឆាយ គឹមខឿន ក៏បានបានរំលឹកដល់មន្ដ្រីនគរបាល​ទាំងអស់ ត្រូវធ្វើជាគំរូល្អដល់បងប្អូនប្រជាពលរដ្ឋក្នុងការគោរព​ច្បាប់ផ្សេងៗ ពិសេសច្បាប់​ស្ដីពីចរាចរណ៍ផ្លូវគោក និងគ្រឿងញៀនជាដើម ។

យ៉ាងណាក៏ដោយលោកឧត្តសេនីយ៍អគ្គស្នងការរងនគរបាលជាតិ ក៏បានកត់សម្គាល់នូវសភាព​ការណ៍​មួយ​ចំនួនជូនដល់សិក្ខាកាមទាំងអស់ផងដែរ ​ដោយបានបញ្ជាក់ថា​ មកទល់ម៉ោងនេះកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា រក្សាបានសន្ដិភាព ស្ថេរភាព សុវត្ថិភាពសង្គម គ្មានអំពើភេរវកម្ម។ កងកម្លាំងសមត្ថកិច្ចកម្ពុជា ក៏សម្រេច​បានកិច្ចការ​ពារកិច្ច ប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ព្រមទាំងការបោះឆ្នោត​ក្រុមប្រឹក្សា​ឃុំសង្កាត់កាលពីឆ្នាំ២០២២កន្លងទៅផងដែរ។

ជាមួយគ្នានោះដែរ លោកឧត្តមសេនីយ៍ឯក ក៏បានចូលរួមអបអរសាទរ និងកោតសរសើរចំពោះ​សិក្ខាកាមទាំងអស់ ដែលបានបញ្ចប់​ការបំប៉នជំនាញ​កសាងបណ្ដាញមូលដ្ឋាន​សម្ងាត់របស់​កម្លាំងសន្ដិសុខ ​និងវគ្គបំប៉នជំនាញបច្ចេកទេសព្រហ្មទណ្ឌ ដែលទទួលបានលទ្ធផល​យ៉ាង​ល្អគាប់ប្រសើរ ​សំដៅពង្រឹងគុណភាព និងប្រសិទ្ធភាពការអនុវត្តតួនាទីភារកិច្ចរបស់​កងកម្លាំង​នគរបាលជាតិ។

លោកឧត្តមសេនីយ៍ឯក ឆាយ គឹមខឿន ​បានផ្ដាំផ្ញើដល់សិក្ខាកាមទាំងអស់ដែលបាន​បញ្ចប់​វគ្គសិក្សានេះ ត្រូវយកចំណេះដឹងដែលទទួលបាននេះទៅ​បម្រើអង្គភាព ផ្សព្វផ្សាយ​បន្ដដល់​មន្ដ្រីរួមការងារក្នុងអង្គភាព ​និងត្រូវខិតខំសិក្សាស្វែង​យល់បន្ថែមលើជំនាញវិជ្ជាជីវៈ ពិសេសជំនាញ​បច្ចេកវិទ្យា ​ខណៈដែលបច្ចុប្បន្នសកលលោកមានការរីកចម្រើន​យ៉ាងខ្លាំងខាងប្រព័ន្ធបច្ចេកវិទ្យា ដូច្នេះបទល្មើស​បច្ចេកវិទ្យាក៏មានការកើនឡើង ហេតុនេះមន្ដ្រីនគរបាលទាំងអស់ត្រូវស្វែងយល់​បន្ថែមទៀតដើម្បី ទាន់តាមសម័យកាល៕អត្ថបទ៖ បាន ចក់