កោះកុង៖ ខេត្តកោះកុង ត្រូវបានក្រុមមន្រ្តីជំនាញផ្តើមបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ ដែលសេសសល់ពីសម័យសង្រ្គាម ដោយស្រុកគិរីសាគរជាស្រុកគោលដៅមុនគេ។

កម្លាំងជំនាញបោសម្អាតគ្រាប់មីន និងបោសសម្អាតសំណល់ជាតិផ្ទុះពីសង្គ្រាម នៃមជ្ឈមណ្ឌល​ជាតិរក្សាសន្តិភាព បានបើកប្រតិបត្តិការនេះ កាលពីថ្ងៃទី១៥ ខែមករា ឆ្នាំ២០២៣ ដោយបានរំដោះផ្ទៃដី ពីគ្រាប់យុទ្ធភណ្ឌមិនទាន់ផ្ទុះចំនួន ៦៩៦,០៣៥ម៉ែត្រក្រឡា ស្មើរនឹង ៦០ភាគរយ»ស្ថិតនៅក្នុងភូមិឃុំកោះស្តេច​ ស្រុកគិរីសាគរ។

នាយឧត្តមសេនីយ៍ សែម សុវណ្ណនី អនុប្រធានទី២ ​អាជ្ញាធរមីនកម្ពុជា បានលើកឡើងក្នុងពិធី​កម្ទេចគ្រាប់មីន ​និងយុទ្ធភណ្ឌមិនទាន់ផ្ទុះនៅថ្ងៃទី១៦ ​ខែកុម្ភៈ​ ឆ្នាំ២០២៣ថា ក្រុមការងារជំនាញ​រំដោះទីតាំងដែលមានគ្រាប់មីននិងយុទ្ធភណ្ឌមិនទាន់ផ្ទុះឱ្យនៅឆ្នាំ២០២៥ ខាងមុខទៅផែនការដាក់ចេញដោយរាជរដ្ឋាភិបាលកម្ពុជា។

ឯកឧត្តម បានបន្ថែមថា ក្នុងភូមិសាស្ត្រភូមិព្រែកស្មាច់ ឃុំកោះស្តេច ត្រូវបានរកឃើញគ្រាប់មីន​ប្រឆាំង​​ថ្មើរជើងចំនួន៧គ្រាប់ ​គ្រាប់យុទ្ធភណ្ឌមិនទាន់ផ្ទុះ៤៨គ្រាប់ ​និងអំបែង១៩២ដុំ ទោះបីពេល​នេះរកឃើញចំនួនបែបនេះ​ ប៉ុន្តែនៅគ្រាប់មីនជាច្រើនទៀតដែលមិនទាន់រកឃើញបន្ត។

ឯកឧត្តម ក៏ណែនាំដល់កម្លាំងជំនាញបង្កើនការយកចិត្តទុកដាក់ឱ្យបានខ្ពស់ និងអនុវត្តឱ្យ​បាន​ល្អចំពោះភារកិច្ចទៅតាមស្តង់ដារបច្ចេកទេស​ និងមិនត្រូវមើលស្រាល​ជាដាច់ខាតចំពោះគ្រាប់​យុទ្ធភណ្ឌមិនទាន់ផ្ទុះជាដាច់ខាត។ «ព្រោះគ្រាប់មីនអាចធ្វើឱ្យយើង ​១វិនាទីរស់ ១វិនាទីស្លាប់ និង ១វិនាទីអាចសុវត្ថិភាព»។

ដោយឡែកឧត្តមសេនីយ៍ទោ សែម រតនា អគ្គនាយករង មជ្ឈមណ្ឌលជាតិរក្សាសន្តិភាព ថ្លែងថា ជាង២ខែមកនេះ​ ក្រុមមន្រ្តីជំនាញរបស់លោក​ បានបោះសម្អាតគ្រាប់មីន និងយុទ្ធភណ្ឌមិនទាន់ផ្ទុះ​លើផ្ទៃដីដែលកំពុងអនុវត្ត ​ដោយនៅសេសសល់ចំនួន ៤៤៣,៦០១ម៉ែត្រក្រឡា ស្ថិតនៅក្នុង​ស្រុកគិរីសាគរ គ្រោងនឹងបញ្ចប់ជាស្ថាពរនៅក្នុងខែមេសា ​ឆ្នាំ២០២៣​ តាមផែនការកំណត់។

ពលរដ្ឋបានគាំទ្រពេញទំហឹងពេលមានវត្តមានក្រុមមន្រ្តីជំនាញចុះមកបោសសម្អាតគ្រាប់មីននៅក្នុងមូលដ្ឋានរបស់ខ្លួន ​ដោយពួកគាត់រម្លឹកថា ​តំបន់នេះជាមូលដ្ឋានរបស់យោធាក្នុង​សម័យ លន់ ណន់ និងសម័យខ្មែរក្រហមយ៉ាងក្តៅកគុកមួយ។

ប្រជាពលរដ្ឋជឿជាក់ថា ​នៅពេលដីផ្ទៃដីលែងមានគ្រាប់មីន ​ភាពរងគ្រោះដោយសារ​គ្រាប់​ នឹង​ត្រូវ​បាន​កាត់បន្ថយ​ដោយ​ជំនួស​នូវ​ការបង្កបង្កើនកសិកម្មប្រកបដោយសុវត្ថិភាពល្អ៕អត្ថបទឈឹម មករា