ភ្នំពេញ ៖ក្រោយសម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា ផ្ដល់ឱកាសដល់បុគ្គលិកវិទ្យុ វីអូឌី ដែលមាន​បំណងចង់​ចូលបំពេញការងារគ្រប់ខណ្ឌរដ្ឋ កាលពីថ្ងៃទី១៤ ខែកុម្ភៈកន្លងទៅ គិតត្រឹមថ្ងៃទី១៧ ខែកុម្ភៈនេះ មានបុគ្គលិក វិទ្យុ វីអូឌីចំនួន ៨រូប ហើយដែលបានដាក់ពាក្យចូលធ្វើការ។ នេះបើយោងតាមសាររបស់សម្ដេចតេជោនាយករដ្ឋមន្រ្ដីនៅលើបណ្ដាញតេឡាក្រាមផ្លូវការមុនេះ។

សម្ដេចតេជោបានមានប្រសាសន៍ថា កាលពីថ្ងៃ១៤កុម្ភះ២០២៣ សម្ដេចបានប្រកាស ផ្តល់ក្របរដ្ឋជូន​បុគ្គលិកវិទ្យុវីអូឌី​ដែលបាន​បាត់បង់​ការងារធ្វើ។ ហើយគិតត្រឹមល្ងាចថ្ងៃ១៧ ខែកុម្ភៈ ឆ្នាំ២០២៣ នេះមានបុគ្គលិក ៨រូប​បាន​មកដាក់​ពាក្យសុំចូលធ្វើការ។

សម្ដេចតេជោបានបញ្ជាក់ថា ដើម្បីបញ្ចប់ការងារនេះ សម្ដេចបានកំណត់រយៈពេលឈប់ទទួលពាក្យសុំចូលធ្វើការត្រឹមម៉ោង ១៧.០០នាទីថ្ងៃ២៨ ខែកុម្ភៈ ឆ្នាំ២០២៣នេះ។

សម្ដេចតេជោបានបញ្ជាក់សារជាថ្មីថា វិទ្យុវីអូឌី គ្មានថ្ងៃរស់ឡើងវិញឡើយ និងសម្ដេចបានអរគុណចំពោះអ្នកបង្ហោះសារថា បងប្អូនមួយចំនួនមិនចូលមកធ្វើការរដ្ឋទេ សុខចិត្តធ្វើស្រែ និងឡើងត្នោត។

សម្ដេចបាន ជូនពរឲ្យអ្នកទាំងអស់នោះរកការងារបានធ្វើដើម្បីចិញ្ចឹមជីវិត។ ក្របខ័ណរដ្ឋនៅពេលនេះត្រូវមានការប្រឡងយ៉ាងតឹងតែងទើបអាចចូលបានប្រសិនបងប្អូនមិនទទួលយកដោយមិនបាច់ប្រឡង សម្ដេចពិតជាមានការអរគុណ។

សម្ដេចបានបញ្ជាក់ថា ពួកអាក្រក់មិនបាច់បង្ហោះសារឌីដងដាក់សម្ដេចទេ ព្រោះសម្ដេច និងរុញទូកបណ្តោយទឹកដើម្បី​ឲ្យពួកអ្នក​ដឹងពីរបៀបដែលសម្ដេចគិតនិងធ្វើការ៕