ភ្នំពេញ ៖ ទីបំផុតស្នងការដ្ឋាននគរបាលរាជធានីភ្នំពេញ បានបញ្ជូនបុរសម្នាក់រស់នៅខណ្ឌបឹងកេងកង ក្រោយព្យាបាលសះស្បើយពីជំងឺកូវីដ១៩ ទៅចាត់ការតាមផ្លូវច្បាប់ ដែលកាលពីកន្លងទៅបុរសរូបនេះបានរត់គេចខ្លួនពីការធ្វើចត្តាឡីស័កក្នុងផ្ទះ ហើយលួចទៅចូលរួម​ពីមង្គលការមិត្តភក្តិនៅខេត្តកំពត និងទីកន្លែងមួយចំនួនទៀត ខណៈខ្លួនត្រូវបានគ្រូពេទ្យធ្វើតេស្តរកឃើញវិជ្ជមានជំងឺកូវីដ១៩នោះ។

លោកឧត្តមសេនីយ៍ទោ ប៊ុន សុសិក្ខា ស្នងការរងទទួលផែនការងារសន្តិសុខ បានបញ្ជាក់ឲ្យដឹងថាជនសង្ស័យឈ្មោះ លាន់ ឡា ភេទប្រុស អាយុ២៣ឆ្នាំ ប្រកបមុខរបរលក់កាហ្វេ ស្នាក់នៅផ្ទះជួល ផ្លូវ១០០៥ កែង៣៦៥ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញត្រូវបានកម្លាំងនគរបាលការិយាល័យជំនាញផែនការងារសន្តិសុខ បញ្ជូនទៅតុលាការ ហើយកាលពីម្សិលមិញហើយនាពេលនេះ ជនសង្ស័យត្រូវបានឃុំខ្លួនជាបណ្តោះអាសន្ននោះ។

លោកឧត្តមសេនីយ៍ទោ បានឲ្យដឹងទៀតថា ជនសង្ស័យត្រូវបានបញ្ជូន លោក កូយ សៅ ជាចៅក្រមស៊ើបសួរ បញ្ជាឱ្យសមត្ថកិច្ចនាំខ្លួន​ដាក់​ពន្ធនាគារ​​ជាបណ្តោះអាសន្ន ដើម្បីរងចាំសម្រេចបទបញ្ជាថ្មីទៀត ហើយជនសង្ស័យ រងការចោទប្រកាន់ពីបទ​មិនអនុវត្តរបស់វិធាន​ក្រសួងសុខាភិបាល ​គេចវេសមិនធ្វើចត្តាឡីស័ក ជាបទល្មើសព្រហ្មទណ្ឌ និង ផ្តន្ទាទោសតាមបញ្ញាត្តិមាត្រា៧ នៃច្បាប់ស្តីពីវិធានការ​ទប់ស្កាត់ការឆ្លងរាលដាលជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតហើយកិច្ចងារងារនេះគឺ ក្រុម​ការងារគណៈកម្មាការអន្តរក្រសួង ដើម្បីប្រយុទ្ធជំងឺកូវីដ១៩ជាអ្នកកសាងសំណុំរឿង បញ្ជូនបុគ្គលមិនអនុវត្តតាមវិធាន​សុខាភិបាល​ដើម្បីយកទៅអនុវត្តតាមនីតិវិធី ។

សូមបញ្ជាក់ថាកាលពីថ្ងៃទី១២ ខែមីនា ឆ្នាំ២០២១ ជនសង្ស័យឈ្មោះ លាន់ ឡា មានអាការៈក្តៅខ្លួន ក្អក និងឈឺបំពង់ក ហើយបានទៅ​យក​សំណាក​នៅមន្ទីរពេទ្យមិត្តភាពខ្មែរ-សូវៀត ហើយគ្រូពេទ្យតម្រូវឱ្យធ្វើចក្តាឡីស័ក១៤ថ្ងៃនៅផ្ទះ ប៉ុន្តែបុគ្គលនេះមិន​បានធ្វើចត្តាឡីស័ក​នៅក្នុងផ្ទះឱ្យបានត្រឹមត្រូវតាមវិធានក្រសួងសុខាភិបាលនោះទេ ស្រាប់តែនៅយប់ថ្ងៃទី១៣ ខែមីនា ជនសង្ស័យរូបនេះ និងមិត្តភក្តិចំនួន២នាក់​ទៀត បានទៅស្ទីម និងស្ប៉ានៅ Arthur and Paul ផ្ទះលេខ២៧ ផ្លូវ៧១ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។

ជាងនេះទៅទៀតនៅថ្ងៃបន្ទាប់គឺថ្ងៃទី១៤ ខែមីនា ឆ្នាំ២០២១ បុគ្គលខាងលើ រួមនឹងមិត្តភក្តិ២នាក់នោះធ្វើដំណើរចេញ​ពីរាជធានីភ្នំ​ពេញ ​បាន​ជិះរថយន្ត​ឈ្នួល ទៅចូលរួមពិធីមង្គលការ នៅភូមិដំណាក់ទ្រព្យ ឃុំក្រាំងស្នាយ ស្រុកឈូក ខេត្តកំពត ហើយនៅតាមផ្លូវអ្នកបើក​រថយន្តក៏​បាន​ដឹកភ្ញៀវម្នាក់ទៀត ផងដែរ។

 ក្រោយក្រុមគ្រួពេទ្យបានបញញជាក់ថាខ្លួនមានផ្ទុកមេរោគកូវីដ១៩នោះ ជនសង្ស័យឈ្មោះលាន់ ឡា និងមិត្តភក្តិ៥នាក់ទៀត​ជិះរថយន្ត​ជាមួយគ្នាពីខេត្តកំពត មករាជធានីភ្នំពេញ ។ នៅពេលបុគ្គលនេះ មកដល់ភ្នំពេញ គ្រូពេទ្យក៏បាននាំទៅព្យាបាលនៅសណ្ឋាគារgreat duke ចំណែកមិត្តភក្តិទាំងនោះបាននាំយកទៅធ្វើចត្តាឡីស័កនៅសណ្ឋាគារសុខា ។

សូមបញ្ជាក់ផងដែរថា នៅក្នុងអំឡុងមិនធ្វើចត្តាឡីស័កបុគ្គលនេះ បានធ្វើដំណើរពីកន្លែងមួយទៅកន្លែងមួយ បានធ្វើឱ្យប្រជាពលរដ្ឋ​២០០នាក់​ទៀតពាក់ព័ន្ធដោយប្រយោលនឹងនាំគ្នា ធ្វើចត្តាឡីស័ក និងបានចម្លងកូវីដ១៩ទៅបុគ្គល៣នាក់ផ្សេងទៀត​យ៉ាងណាក៏ដោយ​នាពេលនេះ​ជនសង្ស័យ​ត្រូវបានអាជ្ញាធរធ្វើការឃុំខ្លួនជាបណ្តោះអាសន្ន និងរងចាំបន្តតាមនីតិវិធីច្បាប់របស់តុលាការនាពេលខាងមុខនេះព៕

អត្ថបទ៖ បាន ចក់