សៀមរាប៖ ក្រុមអ្នកជំនាញនៃនាយកដ្ឋានជីវចម្រុះ ក្រសួងបរិស្ថាន កំពុងសាកល្បងដាំរុក្ខជាតិ Vanilla ដែលជាប្រភេទដំណាំមានតម្លៃខ្លាំង និងកំពុងពេញនិយមរបស់ពិភពលោក។

ការដាំសាកល្បងនេះមានចំនួនប្រមាណពី១០ ទៅ១៥ដើម នៅលើផ្ទៃដីទំហំ១០ម៉ែត្រ គុណនិង៤៥ម៉ែត្រ ក្នុងមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន គូលេន ស្ថិតនៅឃុំត្បែង ស្រុកបន្ទាយស្រី នាតំបន់ជើងភ្នំគូលែន ខេត្តសៀមរាប ដើម្បីតាមដានមើលឱ្យប្រាកដថាតើអាកាសធាតុទីនោះ ពិតជា​អាចអំណោយផលសម្រាប់ដំណាំ Vanilla ដែរឬយ៉ាងណា?។

ប្រធានការិយាល័យ នៃនាយកដ្ឋានជីវចម្រុះ លោក ចាន់ធី សុមេត្តា បានមានប្រសាសន៍ថា រយៈពេលជិត២ឆ្នាំ​មកហើយ ក្រសួងបិរស្ថាន បាននាំយកពូជ Vanilla បីប្រភេទមកដាំសាកល្បងនៅតំបន់ជើងភ្នំគូលែន រួមមានពូជ Vanilla Tity Vanilla Madagascar និងពូជ Vanilla Pompona ។ ពូជទាំងបីប្រភេទនេះ គឺជាប្រភេទ​ដែលគេ​ពេញនិយម​ប្រើប្រាស់បំផុតនៅលើពិភពលោក។ ដំណាំ Vanilla ចំនួន១០ ទៅ១៥ដើម ដែលកំពុងដាំ​នៅក្នុង​មជ្ឈមណ្ឌល​ស្រាវជ្រាវ និងអភិរក្សកេសរកូលសុខអានភ្នំគូលេន អាចផ្ដល់កម្រៃប្រមាណ៥០០០ដុល្លារអាមេរិក សម្រាប់​ការប្រមូលផលម្ដងៗ។ លោក ចាន់ធី បញ្ជាក់ទៀតថា តាមការតាមដានមើ់ល ទៅលើដំណាំVanilla ដែលបាន​ដាំសាកល្បងនៅក្នុងមជ្ឈមណ្ឌលនេះ រយៈពេលជិត២ឆ្នាំមកនេះ ឃើញថាវាលូតលាស់បានល្អ និងមិនមានជំងឺ។ មានន័យថាទាំងលក្ខណៈអាកាសធាតុនិងលក្ខណៈជីវសាស្ត្រ គឺតំបន់នៅជុំវិញខេត្តសៀមរាប អាចនឹងដាំដំណាំ Vanilla ប្រភេទនេះបាន ក៏ប៉ុន្តែបើទោះបីជាយ៉ាងណាក្រុមអ្នកជំនាញ​នៅបន្តតាមដាន​លើទិន្នន័យ​នេះបន្ថែមទៀត។

ដំណាំ Vanilla គឺជាប្រភេទរុក្ខជាតិ នៃកេសរកូលម្យ៉ាង ដែលបណ្ដាប្រទេសលោកខាងលិច កំពុងពេញនិយម យកពណ៌និងក្លិនរបស់វាទៅប្រើប្រាស់ដាក់នៅក្នុងនំ ចំណីអាហារ ភេសជ្ជៈ ការ៉េម ព្រមទាំង​គ្រឿង​សំអាង​ជា​ច្រើន​ប្រភេទផង។ បច្ចុប្បន្ននេះ ដំណាំ Vanilla កំពុងមានតម្លៃ​ខ្ពស់នៅលើទីផ្សារក្នុងពភពលោក ដោយផ្លែស្ងួត​របស់វា១គីឡូ​ក្រាម អាចលក់បាន ក្នុងតម្លៃពី៥០០ ទៅ៧០០ដុល្លារអាមេរិក។

មន្ត្រីក្រសួងបរិស្ថាន អះអាងថា ប្រសិនបើការដាំសាកល្បងដំណាំ Vanilla នៅតំបន់ជើងភ្នំគូលែនបានជោគជ័យ នៅពេលខាងមុខ នឹងចែករំលែក ពូជ Vanilla ទៅឱ្យក្រុមសហគមន៍នៃតំបន់ការពារធម្មជាតិជាច្រើន ព្រមទាំង​ប្រជាពលរដ្ឋដាំដំណាំនេះ ដើម្បីរកកម្រៃជួយដល់ជីវភាពគ្រួសារប្រចាំថ្ងៃ នៅពេលខាងមុខ៕