សៀមរាប ÷ ដើមឈើជាង៥០០ដើមបន្ថែមទៀត ស្ថិតក្នុងព្រៃសហគមន៍អូរទឹកចេញ ឃុំត្រាំសសរ ស្រុកស្រីស្នំ ខេត្តសៀមរាប ត្រូវបានធ្វើការបំបួស ដើម្បីចូលរួមអភិរក្ស និងថែរក្សាព្រៃឈើក្នុងមូលដ្ឋានសម្រាប់ជាប្រយោជន៍ដល់មនុស្សសត្វទូទៅ និងបញ្ឈប់ការកាប់ទន្ទ្រានដីព្រៃតទៅទៀត ។ពិធីបំបួសនេះ ធ្វើឡើងដោយព្រះសង្ឃ អាជ្ញាធរដែនដី និងប្រជាពលរដ្ឋចូលរួមជាង១០០០នាក់។

ព្រះតេជគុណ តេជ ទេពវង្សា គងនៅវត្ដចន្ធរង្សីពង្រ មានសង្ឃដីកានៅថ្ងៃទី១៩ ខែកុម្ភៈ ឆ្នាំ២០២៣នេះ ថា ការបំបួសដើមឈើនេះគឺចង់អោយយល់ពីតម្លៃ និងចេះស្រលាញ់ ថែរក្សា អភិរក្ស ដើមឈើ ឈប់មានការកាប់បំផ្លាញ និងចូលរួមដាំបន្ថែម ដើម្បីអោយព្រៃសហគមន៍មួយនេះមានឈឺចម្រុះគ្រប់ប្រភេទ ព្រោះដើមឈើផ្តល់ផល់ប្រយោជន៍ដល់ មនុស្សសត្វ បរិស្ថាន ជាពិសេសការពារនៅគ្រោះធម្មជាតិ។ ការបំបួសដើមឈើធំបែបនេះ ធ្វើជាលើកទីពីរ ហើយដើមឈើនៅក្នុងសហគមន៍នេះ នឹងត្រូវបំបួសទាំងអស់ ដែលធ្វើឡើងមួយឆ្នាំធ្វើម្ដង ។ជាមួយគ្នានោះ ដើមឈឺណាមានប្រយោជន៍និងអាយុវែង កន្លងមកព្រះតេជគុណ ក៏បានដឹកនាំបណ្ដុះកូនឈើ យកមកដាំបន្ថែមផងដែរ។

លោក ដោ វីរុទ្ធ នាយសង្កាត់រដ្ឋបាលព្រៃឈើក្រឡាញ់-ស្រីស្នំ បានអោយដឹងថា សម្រាប់ស្រុកស្រីស្នំ មានព្រៃសហគមន៍ចំនួន១១កន្លែង រួមមាននៅក្នុងឃុំត្រាំសសរមានចំនួន៤កន្លែង ហើយសម្រាប់ព្រៃសហគមន៍អូរទឹកចេញ បានបង្កើតឡើងតាំងពីឆ្នាំ២០០១ ដែលមានផ្ទៃដីព្រៃ១០៨០ហិកតា និងមានឈើប្រណិតជាច្រើនប្រភេទដូចជាក្រញ៉ូង បេង ធ្នុង នាងនួនជាដើម ។ ក្នុងពិធីបំបួសដើមឈើនេះផងដែលសហគមន៍ព្រៃអូរទឹកចេញ បានទទួលការឧបត្ថម្ភគាំទ្រ ដើម្បីរៀបចំប្រព័ន្ធការពារទប់ស្កាត់ការកាប់ទន្ទ្រាន និងល្បាតក្នុងភូមិសាស្ត្រព្រៃសហគមន៍ ថវិការចំនួន ៧លានរៀល និង អាវ សហគមន៍១០ ខោអាវប្រជាការពារ១១ឈុត ពីព្រះសង្ឃ អាជ្ញាធរដែនដី ប្រជាពលរដ្ឋ រដ្ឋបាលព្រៃឈើស្រុក ក្រុមការងារខេត្តចុះជួយឃុំត្រាំសសរ ៕