កំពង់ស្ពឺ ÷ ឯកឧត្តម ហ៊ុន ម៉ានី អ្នកតំណាងរាស្រ្តមណ្ឌល ខេត្តកំពង់ស្ពឺ ព្រមទាំងឯកឧត្តម លោកជំទាវ សមាជិកព្រឹទ្ធសភា និងរដ្ឋសភា ប្រចាំភូមិភាគ និងមណ្ឌលខេត្តកំពង់ស្ពឺ បានអញ្ជើញជាអធិបតីក្នុងពិធីជួបសំណេះសំណាលជាមួយមន្ត្រីអប់រំ និងមន្រ្តីសុខាភិបាល នៃស្រុកឱរ៉ាល់ និងស្រុកថ្ពង ខេត្តកំពង់ស្ពឺ ប្រមាណ៩០០ នាក់, នាថ្ងៃទី១៩ ខែកុម្ភៈ ឆ្នាំ២០២៣។

នាឱកាសនៃពិធីសំណេះសំណាលនេះឯកឧត្តម ហ៊ុន ម៉ានី បានលើកឡើងពីគោលបំណងនៃការជួបជុំថ្ងៃនេះ គឺដើម្បីថ្លែងអំណរគុណដោយផ្ទាល់ចំពោះលោកគ្រូ អ្នកគ្រូបង្រៀន ក្រុមគ្រូពេទ្យ ដែលបានខិតខំបំពេញភារកិច្ចយ៉ាងខ្ជាប់ខ្ជួន ដើម្បីអភិវឌ្ឍធនធានមនុស្ស និងសុខភាពប្រជាជន មុន និងក្រោយនៃការរីករាលដាលនៃជំងឺកូវីដ-១៩។  ឆ្លងកាត់ វិបត្ដិដ៏លំបាកនេះ បានធ្វើអោយខ្មែរមករួបរួមគ្នា សហការគ្នាដើម្បីប្រយុទ្ធប្រឆាំង នឹងជំងឺកូវីដ-១៩។ ស្របជាមួយគ្នាដែរឯកឧត្តម ហ៊ុន ម៉ានី ក៏បានលើកឡើងថា ភាពជោគជ័យនៃការគ្រប់គ្រងការរីករាលដាលនៃជំងឺកូវីដ-១៩ នេះគឺកើតចេញពីការដាក់ចេញនូវវិធានការដ៏មានប្រសិទ្ធភាពរបស់រាជរដ្ឋាភិបាលក្នុងការប្រយុទ្ធប្រឆាំង នឹងជំងឺកូវីដ-១៩ កិច្ចសហការពីសំណាក់រដ្ឋបាលគ្រប់ជាន់ថ្នាក់ អាជ្ញាធរ និងការលៈបង់មិនអាចកាត់ថ្លៃបានពីសំណាក់ លោកគ្រូ អ្នកគ្រូ លោក លោកស្រីវេជ្ជបណ្ឌិត មន្រ្តី បុគ្គលិកអប់រំ និងសុខាភិបាល ជាពិសេសនោះគឺ ការអត់ធ្មត់ យោគយល់ខ្ពស់ គាំទ្រវិធានការរបស់ក្រសួងសុខាភិបាលរបស់ប្រជាពលរដ្ឋ។

ឯកឧត្តម ក៏បានរំលេចដែរថា ដើម្បីទទួលបានចំណេះដឹងជាមូលដ្ឋាន យើងត្រូវរៀនសូត្រពីសាលា និងតាមរយៈថ្នាក់រៀនពីចំណេះដឹងទូទៅ បន្ទាប់មកយើងគប្បីរៀនសូត្រពីអ្នកដទៃ ជាពិសេសអ្នកជោគជ័យ ដោយយើងអាចមានឱកាសសិក្សា និងស្វែងយល់ពីសិល្បៈនៃការដឹកនាំ រៀនសូត្រពីភាពជោគជ័យ និងបរាជ័យរបស់ពួកគេ រួចហើយ ខិតខំហ្វឹតហាត់សមត្ថភាពខ្លួនឯង និងមួយទៀត គឺរៀនសូត្រពីការងារ ដើម្បីអោយការងារបង្រៀនយើងបាន យើងត្រូវរៀនធ្វើផង អនុវត្តន៍ផង ដើម្បីដកស្រង់ជាបទពិសោធន៍។

នាឱកាសនៃពិធីសំណេះសំណាលនេះ ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយដែលមានឱកាសមកស្រុកថ្ពង សាជាថ្មី ដែលគិតចាប់ពីចូលឆ្នាំ២០២៣ នេះ គឺជាលើកទី៣ ហើយ ក្នុងនោះលើកទី១ មកចូលរួមក្នុងកម្មវិធីបើកការដ្ឋានសាងសង់កំណាត់ផ្លូវកៅស៊ូ BDST បន្ទាប់មកលើកទី ២ គឺពិធីសម្ពោធសាលធម្មសភា សមិទ្ធផលនានា នៅវត្តពន្លាជ័យ ឃុំអមលាំង ហើយលើកទី៣ គឺថ្ងៃនេះតែម្តង ក្នុងពិធីជួបសំណេះសំណាលជាមួយមន្ត្រីអប់រំ និងមន្រ្តីសុខាភិបាល នៃស្រុកថ្ពង។

ឯកឧត្តម ហ៊ុន ម៉ានី បានយកឱកាសជួបជុំនាថ្ងៃនេះ ថ្លែងអំណរគុណដល់ប្រជាពលរដ្ឋខេត្តកំពង់ស្ពឺ ដែលបានជឿជាក់ ទុកចិត្តលើការដឹកនាំរបស់គណបក្សប្រជាជនកម្ពុជា ដោយបានធ្វើការបោះឆ្នោតគាំទ្រ ផ្តល់ឱកាសអោយឯកឧត្តមផ្ទាល់ និងអ្នកតំណាងរាស្រ្តមណ្ឌលកំពង់ស្ពឺផ្សេងទៀតមានវត្តមាននៅលើទឹកដីកំពង់ស្ពឺ។ រយៈពេល៤៤ឆ្នាំ នៃការដឹកនាំរបស់គណបក្សប្រជាជនកម្ពុជា យើងសម្រេចបានការងារ និងសមិទ្ធផលជាច្រើន ទន្ទឹមនឹងនេះក៏មានការងារជាច្រើនទៀតដែលកំពុងរងចាំ។ គណបក្សប្រជាជន តែងតែនៅជាមួយប្រជាជន មិនត្រឹមតែពេលមានសុខសន្តិភាពប៉ុណ្ណោះទេ ប៉ុន្តែពេលប្រទេសជាតិជួបបញ្ហា គណបក្សប្រជាជនកម្ពុជា តែងតែស្វែងរកដំណោះស្រាយ ដើម្បីធានាអោយបាននូវសុខសន្តិភាព និងស្ថេរភាពជូនប្រជាជនកម្ពុជាផងដែរ។

ឆ្លៀតក្នុងឱកាសនោះដែរ អភិបាលស្រុកឱរ៉ាល់ និងស្រុកថ្ពង បានសម្តែងការស្វាគមន៍យ៉ាងកក់ក្តៅចំពោះវត្តមានឯកឧត្តម ហ៊ុន ម៉ានី និងបានធ្វើការថ្លែងអំណរគុណចំពោះឯកឧត្តម ដែលតែងតែយកចិត្តទុកដាក់ និងគិតគូរពីសុខទុក្ខអ្នកខេត្តកំពង់ស្ពឺ។ ជាមួយគ្នានេះដែរ អភិបាលស្រុកទាំងពីរ បានធ្វើរបាយការណ៍សង្ខេបពីស្រុករបស់ខ្លួនផងដែរ៕ អត្ថបទ÷ រដ្ឋា