ភ្នំពេញ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានស្នើដល់ស្ថាប័ន​ពាក់ព័ន្ធ ចូលរួមលុបបំបាត់ជំងឺគ្រុនចាញ់ ឲ្យអស់នៅកម្ពុជា ក្នុងឆ្នាំ២០២៥។

ការថ្លែងរបស់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល យ៉ាងដូច្នេះ ក្នុងសន្និបាតបូកសរុបការងារឆ្នាំ២០២២​ និងលើកទិសដៅការងារឆ្នាំ២០២៣ ពិសេសជំហាន​ឆ្ពោះទៅកម្ពុជាគ្មានជម្ងឺគ្រុនចាញ់ «ការលុបបំបាត់ជំងឺគ្រុនចាញ់ ប្រភេទផ្លាស់ស្មូដ្យូម ហ្វាល់ស៊ីប៉ារ៉ូម នៅឆ្នាំ២០២៣» នាសណ្ឋាគារសុខា ខេត្តព្រះសីហនុ ព្រឹកថ្ងៃទី២០ ខែកុម្ភៈ ឆ្នាំ២០២៣នេះ។

ឯកឧត្តមសាស្រ្តាចារ្យ ម៉ម ប៊ុនហេង បានលើកឡើងទៀតថា រាជរដ្ឋភិបាលកម្ពុជាបានផ្តោតការយក​ចិត្តទុកដាក់ខ្ពស់បំផុតលើបញ្ហាសុខភាពសារធារណៈ និងបានកំណត់បញ្ចូលទៅក្នុង “ក្របខណ្ឌ​គោលដៅ​អភិវឌ្ឍន៍​ប្រកបដោយចីរភាពកម្ពុជាឆ្នាំ២០១៦-២០៣០ ដើម្បីធានាឲ្យជីវភាពរស់នៅ​របស់ប្រជាជន​ប្រកបដោយ​សុខភាពល្អ ​និងលើកកម្ពស់សុខុមាលភាពរបស់មនុស្ស គ្រប់រូប​និង​គ្រប់វ័យ រួមទាំងបញ្ចប់ការរីករាលដាលមេរោគអេដស៍ ជំងឺរបេង គ្រុនចាញ់ ជំងឺតំបន់ត្រូពិក​ដែលមិនត្រូវ​បានយកចិត្តទុកដាក់ គ្រុនឈាម គ្រុនឈូក ដង្កូវព្រូន ជំងឺថ្លើម ជំងឺឆ្លងតាមទឹក​និងជំងឺឆ្លង​ផ្សេងទៀត ត្រឹមឆ្នាំ២០៣០។

លើសពីនេះ សម្តេចតេជោ បានប្ដេជ្ញាចិត្តខ្ពស់ចូលរួមលើកកម្ពស់សុខភាពសារធារណៈ ទាំងក្នុង​តំបន់អាស៊ីប៉ាស៊ីហ្វិក មហាអនុតំបន់ទន្លេមេគង្គ និងសកលលោក តាមរយៈការ​ផ្តួចផ្តើម និងអនុម័ត ដាក់គោលដៅសម្រេចផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ក្នុងព្រះរាជាណាចក្រកម្ពុជា។

បើតាមលោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធ និងជម្ងឺគ្រុនចាញ់ បាន​ឲ្យដឹងថា វត្តមានរបស់ឯកឧត្តមសាស្រ្តាចារ្យរដ្ឋមន្រ្តី ​នៅពេលនេះ គឺជាសក្ខីភាពបញ្ជាក់ពី​ការ​យកចិត្តទុកដាក់ខ្ពស់ និងជ្រាលជ្រៅបំផុតរបស់ក្រសួងសុខាភិបាល ចំពោះសុខភាព​សារធារណៈឈាន​ឆ្ពោះទៅកាត់បន្ថយបន្ទុក ឬគ្មានជំងឺគ្រុនចាញ់ គ្រុនឈាម ដង្កូវព្រូន និងជំងឺឆ្លងដ៏ទៃទៀត ​ដែលជាបច្ច័យមួយផ្នែកក្នុងការចូលរួមថែរក្សា និងលើកកំពស់​សុខុមាលភាព​ប្រជាជន​គ្រប់រូបឲ្យសមស្របតាមយុគសម័យ​សកលភាវូបនីយកម្មក្រោមដំបូល​បរិយាកាស​ប្រទេសជាតិ ដែលព្រះរាជាណាចក្រកម្ពុជាកំពុងរក្សាបាននូវ ​ស្ថេរភាពនយោបាយ អធិបតេយ្យភាព និងការអភិវឌ្ឍ ជាបន្តបន្ទាប់៕ អត្ថបទ៖ រដ្ឋា