ទួរគី៖ ក្រសួងគ្រប់គ្រងគ្រោះអាសន្ន និងមហន្តរាយប្រទេសទួរគីនិយាយថា ប្រតិបត្តិការស្វែងរក និងជួយសង្គ្រោះបានបញ្ចប់ក្នុងខេត្តភាគច្រើនដែលមានរយៈពេលជិត ២សប្តាហ៍ បន្ទាប់ពីរញ្ជួយដីដ៏មហន្តរាយក្នុងខែនេះនៅប្រទេសទួរគី និងស៊ីរី។
មានការអបអរចំពោះក្រុមជួយសង្គ្រោះអន្តរជាតិ ខណៈប្រទេសទួរគីបានបញ្ចប់ប្រតិបត្តិការស្វែងរក និងជួយសង្គ្រោះភាគច្រើនកាលពីថ្ងៃអាទិត្យ បន្ទាប់ពីការរញ្ជួយដីកម្រិត ៧.៨រ៉ិចទ័របានបំផ្លាញនៅភាគអាគ្នេយ៍របស់ប្រទេសទួរគី និងប្រទេសដែលនៅជិតខាងស៊ីរី។ ពលរដ្ឋខេត្ត Hatay ដែលរងគ្រោះខ្លាំងនៅភាគខាងត្បូងប្រទេសទួរគី បានឈរមើលគ្រឿងចក្រជីកកកាយធ្វើការដើម្បីយកចេញកម្ទេចថ្មនៃអគារដែលត្រូវបានបំផ្លាញ។ ខណៈក្តីសង្ឃឹមក្នុងការស្វែងរកអ្នកនៅរស់រានមានជីវិតបានថយចុះ ក្រុមគ្រួសារជាច្រើនបានបួងសួងសុំឱ្យរកឃើញសាកសពអ្នកជាទីស្រលាញ់របស់ពួកគេ និងបាននិយាយថា យើងចង់ឱ្យការស្វែងរក និងការជួយសង្គ្រោះបន្តរយៈពេលមួយខែ។ មនុស្សអាចស្លាប់រួចទៅហើយ ប៉ុន្តែយ៉ាងហោចណាស់ពួកគេអាចរកឃើញសាកសពទាំងនោះ ហើយពួកគេនឹងមានផ្នូរ និងដឹងថា ពួកគេនៅទីណា។
រញ្ជួយដីបណ្តាលឲ្យមនុស្សជាង ៤៦,៤០០នាក់ស្លាប់នៅក្នុងប្រទេសទួរគី និងស៊ីរី ហើយបានបណ្តាលឲ្យមនុស្សរាប់លាននាក់បាត់បង់ផ្ទះសម្បែង។ ទន្ទឹមនឹងនេះ រដ្ឋមន្ត្រីការបរទេសអាមេរិកលោក Antony Blinken បានធ្វើការស្ទង់មើលលើការខូចខាតនៅក្នុងប្រទេសទួរគីកាលពីថ្ងៃអាទិត្យ និងបានសន្យាផ្តល់ជំនួយបន្ថែមចំនួន ១០០លានដុល្លារសម្រាប់ការឆ្លើយតប បន្ថែមលើជំនួយ ៨៥លានដុល្លារដែលត្រូវបានអនុម័តរួចហើយ។ អង្គការសុខភាពពិភពលោកបានប៉ាន់ប្រមាណថា មនុស្សប្រហែល ២៦លាននាក់នៅទូទាំងប្រទេសទួរគី និងស៊ីរីត្រូវការជំនួយមនុស្សធម៌។ កាលពីថ្ងៃអាទិត្យ អង្គការសប្បុរសធម៌ផ្នែកវេជ្ជសាស្ត្រ (MSF) បាននិយាយថា ក្បួនរថយន្តដឹកទំនិញរបស់ខ្លួនបានចូលទៅក្នុងប្រទេសស៊ីរី បន្ទាប់ពីមានការព្រួយបារម្ភអំពីកង្វះលទ្ធភាពចូលទៅដល់តំបន់ ដែលត្រូវបានបំផ្លាញដោយសង្គ្រាម៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
