ភ្នំពេញ៖ ការរៀបចំព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ នឹងអាចទាក់ទាញវិនិយោគិន​មកបណ្តាក់ ទុនបន្ថែមទៀតនៅប្រទេសកម្ពុជា ដោយសារព្រឹត្តិការណ៍នេះ បង្ហាញពីមុខមាត់​ប្រទេសកម្ពុជា​ទៅបរទេស ដូច្នេះទើបវិនិយោគនមានការចាប់អារម្មណ៍។

នេះបើតាមការលើកឡើងរបស់បណ្ឌិត ហុង វណ្ណៈ អ្នកជំ នាញសេដ្ឋកិច្ច នៃវិទ្យាស្ថានទំនាក់ទំនង​អន្តរជាតិ នៃរាជបណ្ឌិត្យសភាកម្ពុជា ។

ផ្តល់បទសម្ភាសន៍ជាមួយBTVនាពេលថ្មីៗនេះបណ្ឌិត ហុង វណ្ណៈ បានបញ្ជាក់ថា ក្នុងនាមប្រទេស កម្ពុជា ជាម្ចាស់ផ្ទះរៀបចំព្រឹត្តិការណ៍កីឡាអន្តរជាតិនេះបាន ​ដោយសាររាជរដ្ឋាភិបាល មាន​សមត្ថភាព និងលទ្ធភាពផ្នែកហរិញ្ញវត្ថុគ្រប់គ្រាន់​ សម្រាប់ទ្រទ្រង់ព្រឹត្តិការណ៍អន្តរជាតិនេះ។

ប្រទេសកម្ពុជា នឹងរៀបចំធ្វើជាម្ចាស់ផ្ទះលើកដំបូងការប្រកួតកីឡាអាស៊ីអាគ្នេយ៍ ឬហៅថា ស៊ីហ្គេម លើកទី៣២ ឆ្នាំ២០២៣ ត្រូវនឹងរយៈពេល៦៤ឆ្នាំ ​នៃព្រឹត្តិការណ៍ស៊ីហ្គេម។ ​ការប្រកួតស៊ីហ្គេមនេះ នឹងចាប់ផ្តើមពីថ្ងៃទី៥ ដល់១៧ ខែឧសភា ឆ្នាំ២០២៣ ។

ក្រោយបញ្ចប់ព្រឹត្តិការណ៍ស៊ីហ្គេម ប្រទេសកម្ពុជា នឹងរៀបចំធ្វើជាម្ចាស់ផ្ទះលើកដំបូងមួយទៀត នោះគឺការប្រកួតកីឡាអាស៊ានប៉ារ៉ាហ្គេម​ លើកទី១២ ដែលចាប់ផ្តើមពីថ្ងៃទី៣ ​ដល់ថ្ងៃទី៩ ខែមិថុនា ឆ្នាំ២០២៣ ៕អត្ថបទ៖ ទូច សោភ័ណ