កំពង់ធំ៖ នៅថ្ងៃទី១៩ ខែកុម្ភៈនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងលេខាទី១ស្ថានទូតឥណ្ឌា ប្រចាំនៅកម្ពុជា ក្រុមហ៊ុនការីទេសចរណ៍ និងអាជ្ញាធរមូលដ្ឋាន បានអញ្ជើញទស្សនកិច្ចសិក្សា ជំរុញការអភិវឌ្ឍតំបន់អេកូទេសចរណ៍ផាត់សណ្តាយ ​បឹងទន្លេសាប និងជំរុញនាំភ្ញៀវទេសចរជាតិ ​អន្តរជាតិអញ្ជើញទស្សនា។

ក្នុងឱកាសជួបសំណេះសំណាលប្រជាសហគមន៍អេកូទេសចរណ៍ផាត់សណ្តាយ ឯកឧត្តម ថោង ខុន មានប្រសាន៍ថា បច្ចុប្បន្ន តំបន់សហគមន៍អេកូទេសចរណ៍ផាត់សណ្តាយ​គឺមាន​លក្ខណៈសម្បត្តិ​គ្រប់គ្រាន់ និងកំពុងរង់ចាំការទទួលភ្ញៀវទេសចរអញ្ជើញទស្សនាកម្សាន្ត មើលរបៀបការរស់នៅ​របស់ប្រជាពលរដ្ឋនៅរស់នៅលើផ្ទះបណ្តែតទឹកបឹងទន្លេសាប ទស្សនាសត្វស្លាប ទស្សនារបៀប​ការនេសាទតាមបែបប្រពៃណីរបស់ពលរដ្ឋអ្នកនេសាទ ការមើលព្រៃកោងកាង​តូចធំគ្រប់ប្រភេទ​ទៀត។

ឯកឧត្តម រដ្ឋមន្ត្រី បន្តថា ការមានភ្ញៀវទេសចរជាតិ អន្តរជាតិ ទៅទស្សនាកម្សាន្តសហគមន៍​អេកូទេសចរណ៍​ផាត់សណ្តាយ ដែលជិះទូកប្រមាណ១០នាទីពីផែឃុំឆ្នុកទ្រូ ខេត្តកំពង់ឆ្នាំង គឺជារួមចំណែកដ៏ធំមួយក្នុងការជំរុញកំណើនជីវភាពពលរដ្ឋនៅក្នុងមូលដ្ឋាន​ ជាពិសេស ​ការ​ធនាការ​អភិរក្ស ការពារធនធានធម្មជាតិ ព្រៃ សត្វស្លាប និងពូជត្រីគ្រប់ប្រភេទនៅក្នុងបឹងទន្លេសាប តាម​រយៈការផ្លាស់ប្តូរ​ឥរិយាបថពលរដ្ឋពីការនេសាទត្រីខុសច្បាប់ ទៅចាប់យកការប្រកបរបរវិស័យទេសចរណ៍។

បើតាមលោកស្រី ឆាយ សៀវលីន ប្រធានសមាគមន៍ទីភ្នាក់ទេសចរណ៍កម្ពុជា CATA ថ្លែងថា នៅខែបន្តបន្ទាប់ទៀតនេះ CATA នឹងពិភាក្សាជាមួយក្រុមហ៊ុនការីទេសចរណ៍ជាសមាជិក រៀបចំ​កញ្ចប់ទេសចរណ៍ទស្សនា​ផាត់សណ្តាយ ខណៈតំណាងសហគមន៍អេកូទេសចរណ៍ផាត់សណ្តាយ​បានបង្ហាញការអបអរសាទរ និងត្រៀមទទួលទេសចរទស្សនា​តាម​កញ្ចប់ទេសចរណ៍​នោះប្រកប​ដោយភាពកក់ក្តៅបំផុត និងចំណាយតិច។

សូមបញ្ជាក់ថា សហគមន៍អេកូទេសចរណ៍ផាត់សណ្ដាយ ជាសហគមន៍នៅលើផ្ទៃទឹកនៃបឹង​ទន្លេសាប ដែលស្ថិតក្នុងឃុំផាត់សណ្ដាយ ស្រុកកំពង់ស្វាយ ​ខេត្តកំពង់ធំ។​ ឃុំផាត់សណ្តាយ មានភូមិចំនួន ៥ ​មានប្រជាពលរដ្ឋរស់នៅចំនួនជាង ១ ពាន់គ្រួសារ​ ហើយប្រជាពលរដ្ឋប្រមាណ ៩០% ជាអ្នកប្រកបរបរនេសាទត្រី។

នៅដើមឆ្នាំ២០១៩ ក្រោមជំនួយពីអង្គការសម្ព័ន្ធភាពដើម្បីអភិរក្សធនធានជលផល (FACT) បានអនុវត្តគម្រោងមួយផ្តោតជាសំខាន់លើការងារអភិរក្ស​ ការអភិវឌ្ឍ​សេវាកម្មអេកូទេសចរណ៍ ការបង្កើនជីវភាពរបស់ប្រជានេសាទ ​តាមរយៈការបង្កើតប្រភពមុខរបរចម្រុះ ដូចជាក្រុមកែច្នៃកាបូប និងវត្ថុអនុស្សាវរីយ៍ ​ក្រុមសន្សំ ​ក្រុមកែច្នៃផលិតកម្មត្រី ​ការលើកកម្ពស់សុខុមាលភាព​ និងបរិស្ថាន ដោយរៀបចំអោយមានស្ថានីយផលិតទឹកបរិសុទ្ធ ​និងឡសម្រាប់ដុតសំរាមជាដើម។ ​ក្រៅពីនេះ ក៏មានការរៀបចំឱ្យមាន “ផ្សារបណ្ដែតទឹក” ដែលជាផលិតផលទេសចរណ៍ថ្មី​នៅ​ក្នុង​សហគមន៍អេកូទេសចរណ៍នេះ។

បច្ចុប្បន្នតំបន់សហគមន៍នេះ ​មានសេវាកម្មជាច្រើនត្រៀមជាស្រេចសម្រាប់ភ្ញៀវទេសចរ ក្នុងនោះ​រួមមាន សេវាកម្មទូក និងកាណូត ផ្ទះស្នាក់ ប្រភេទផ្ទះបណ្តែតទឹក ​និងផ្ទះសហគមន៍ សេវាកម្ម​បោះជុំរុំ សេវាកម្មជូនភ្ញៀវពពៀតព្រៃ​ និងសេវាកម្មម្ហូបអាហារ៕ អត្ថបទ ស៊ុម សុខជា