អាមេរិក ៖ កាលពីថ្ងៃអាទិត្យម្សិលមិញ យោធាសហរដ្ឋអាមេរិក និងជប៉ុន បានធ្វើសមយុទ្ធកងទ័ពអាកាស ស្របពេល​ស្ថានភាព​សន្តិសុខឡើងកម្តៅកាន់តែខ្លាំងនៅតំបន់ជុំវិញប្រទេសជប៉ុន ក្រោយ​កូរ៉េខាងជើង បាញ់មីស៊ីលរយៈ​ចម្ងាយ​ឆ្ងាយ ឆ្ពោះទៅកាន់​សមុទ្រនៅជិតតំបន់ឆ្នេរភាគខាងលិចជប៉ុន ។ ក្រសួងការពារជាតិជប៉ុននិយាយនៅក្នុងសេចក្តីថ្លែងការណ៍ថា សមយុទ្ធទ្វេភាគី នឹងពង្រឹងបន្ថែមទៀតការការពារ និង​សមត្ថភាពឆ្លើយតប​របស់សម្ព័ន្ធមិត្តជប៉ុន-សហរដ្ឋអាមេរិក ។ យន្តហោះចម្បាំង B-1Bs ចំនួន ២គ្រឿង និងយន្តហោះ​ចម្បាំង F-16s ចំនួន ៤គ្រឿងរបស់យោធាសហដ្ឋអាមេរិក ហើយនិងយន្តហោះចម្បាំង F-15s ចំនួន ៣គ្រឿង​របស់​កងទ័ព​ស្វ័យការពារអាកាសជប៉ុន បានចូលរួមសមយុទ្ធ​យោធា​លើក​នេះ ៕