ភ្នំពេញ៖ នៅថ្ងៃទី ២១ខែកុម្ភៈនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម ចូលហ្វេស ស៊ូអើ Joseph Scheuer អ្នកសម្របសម្រួលអង្គការសហប្រជាជាតិប្រចាំកម្ពុជា បានអញ្ជើញក្នុងពិធីជូនដំណើរកងកំទេចគ្រឿងផ្ទុះលេខ៩៨ ចំនួន៩៨រូប ចេញបំពេញបេសកកម្មរក្សាសន្តិភាពUN នៅសាធារណរដ្ឋអាហ្វ្រិកកណ្តាល។

ក្នុងពិធីនេះ សម្តេចពិជ័យសេនា ថ្លែងថា កងទ័ពមួកខៀវ ដែលមានបញ្ហាសុខភាពប្រចាំកាយ​គឺមិន​អនុញ្ញាតឲ្យចេញដំណើរ។

សម្តេចពិជ័យសេនា ទៀ បាញ់ មានប្រសាសន៍ថា នេះជាលើកដំបូងដែលរាជរដ្ឋាភិបាលកម្ពុជា និងUN បានគាំទ្រគ្នាទៅវិញទៅមក បញ្ជូនកងកម្លាំងទ័ពមួកខៀវថ្មីមួយកងបន្ថែមទៀត សរុបចំនួន៩៨ រូប បំពេញបេសកកម្មថែរក្សាសន្តិភាពបោសសំអាតមីន នៅអាហ្វ្រឹកកណ្តាល ហើយគ្រប់កងកម្លាំង ដែលបានបញ្ជូនទៅក្រៅប្រទេសលើកនេះ សុទ្ធតែទទួលបានការត្រួតពិនិត្យ​សុខភាពយ៉ាងដិតដល់បំផុត ចៀសវាងការមានជំងឺឆ្លង និងជំងឺប្រចាំការនានាដែលពិបាកព្យាបាល។

ព្រមជាមួយគ្នានេះ សម្តេច ពិជ័យសេនា ទៀ បាញ់ ក៏បានស្នើទ័ពមួកខៀវដែលចេញដំណើរបំពេញ​បេសកកម្មនាពេលនេះ ត្រូវបង្កើនការប្រុងប្រយ័ត្នការពារខ្លួននៅក្នុងតំបន់​បេសកកម្មដែល​ជម្លោះសង្គ្រាម ប្រកាន់ខ្ជាប់អនុសាសន៍សម្តេចតេជោ នាយកដ្ឋមន្ត្រី គោរពបញ្ជាអង្គភាព ជាពិសេសត្រូវអនុវត្តគោលការណ៍បញ្ជូនទៅគ្រប់ ត្រឡប់មកវិញគ្រប់។

នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព បានថ្លែងថា មកដល់ពេលនេះ កម្លាំងកម្ពុជាសរុបចំនួន៨៨៥៩នាក់ ក្នុងនោះនារីចំនួន៦៨១នាក់ បានចេញ​បំពេញ​បេសកកម្មចំនួន១១ ក្នុងប្រទេសចំនួន៩ មានជាអាទិ៍៖ សាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្តាល លីបង់ ម៉ាលី ស៊ីរី សាយប្រឺស និងយេមែន លើជំនាញបោសសំអាតមីន វិស្វកម្មសំណង់ផ្តេក-បញ្ឈរ អាវុធហត្ថ មន្ទីរពេទ្យកម្រិត២ វិស្វកម្មព្រលានយន្តហោះ កំទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា។

បច្ចុប្បន្ន កម្លាំងកម្ពុជាចំនួន៧៨៨នាក់ ក្នុងនោះនារីចំនួន១៣០នាក់ កំពុងបំពេញបេសកកម្មនៅប្រទេសចំនួន៤ រួមមាន៖ សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី ៕អត្ថបទ ស៊ុម សុខជា