កំពង់ឆ្នាំង៖ គណៈប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា ដឹកនាំដោយ ឯកឧត្តម សរ ចំរុង ប្រធានគណៈកម្មការ បានអញ្ជើញចុះទៅសិក្សាស្វែងយល់ពីសមិទ្ធផលការងារ បញ្ហាប្រឈម និងយន្តការដោះស្រាយទំនាស់ ដីធ្លីរបស់រដ្ឋបាលខេត្តកំពង់ឆ្នាំង នៅព្រឹកថ្ងៃទី២១ ខែកុម្ភៈ ឆ្នាំ២០២៣នេះ។

ឯកឧត្តម សរ ចំរុង បានជម្រាបជូនរដ្ឋបាលខេត្ត អំពីតួនាទីភារកិច្ចសំខាន់ៗទាំងបីដែលជាការងារស្នូលរបស់រដ្ឋសភាត្រូវបំពេញ ដូចជា ១.ការងារនីតិកម្ម ២.ការត្រួតពិនិត្យតាមដានការអនុវត្តច្បាប់ និង៣.ភាពជាអ្នកតំណាងរបស់ប្រជាពលរដ្ឋ។ គោលបំណងនៃបេសកកម្មរបស់គណៈកម្មការ មកកាន់ខេត្តកំពង់ឆ្នាំងនាពេលនេះថា ក្រៅពីស្វែងយល់ពីភាពរីកចម្រើន និងបញ្ហាប្រឈម នៅក្នុងការអនុវត្តកម្មវិធីនយោបាយរបស់រាជរដ្ឋាភិបាល និងដំណើរការនៃការគោរពសិទ្ធិមនុស្សនៅក្នុងខេត្តកំពង់ឆ្នាំងហើយនោះ គណៈកម្មការក៏ចង់ស្វែងយល់ អំពីយន្តការដោះស្រាយទំនាស់ ដីធ្លីនៅក្នុងខេត្តនេះផងដែរ ។

លោក សាន់ យូ អភិបាលរងកំពង់ឆ្នាំង បានឲ្យដឹងថា៖ ដោយអនុវត្តតាមយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ខេត្តកំពង់ឆ្នាំងអភិវឌ្ឍន៍បានសមិទ្ធិផលធំៗជាច្រើន ដែលបានធ្វើឲ្យជីវភាពរស់នៅរបស់ប្រជាពលរដ្ឋក្នុងខេត្ត មានការប្រែប្រួលរីកចម្រើនជាលំដាប់ និងមានភាពស៊ីវិល័យ ហើយអត្រានៃភាពក្រីក្រត្រូវបានកាត់បន្ថយជាបន្តបន្ទាប់។ ខេត្តបានកែលំអហេដ្ឋារចនាសម្ព័ន្ធផ្លូវថ្នល់ក្នុងខេត្តតាំងពីទីប្រជុំជនរហូតដល់ជនបទ មានការកសាងរមណីយដ្ឋានទេសចរណ៍តាមសហគមន៍នានាបន្ថែមទៀត។ លោកក៏បានជម្រាបជូនគណៈកម្មការរដ្ឋសភា អំពីយន្តការដោះស្រាយវិវាទដីធ្លីនៅក្នុងខេត្តកំពង់ឆ្នាំង ដោយខេត្តបានធ្វើការសម្របសម្រួលដោះស្រាយវិវាទដីធ្លីជូនប្រជាពលរដ្ឋទៅតាមយន្តការជាច្រើនដូចជា ១.អាជ្ញាធរជាតិដោះស្រាយវិវាទដីធ្លី ២.អនុគណៈកម្មការសុរិយោដី និង៣.នីតិវិធី ទទួលពាក្យបណ្តឹង បំពេញឯកសារ និងចុះស្រាវជ្រាវដល់ទីតាំងជាក់ស្តែងតែម្តង។

ឯកឧត្តមប្រធានគណៈកម្មការ បានថ្លែងអំណរគុណ និងកោតសរសើរចំពោះរដ្ឋបាលខេត្តកំពង់ឆ្នាំង ដែលបានខិតខំយកចិត្តទុកដាក់បម្រើសេវា និងដោះស្រាយរាល់ការលំបាកជូនប្រជាពលរដ្ឋ ដោយឈរលើគោលការណ៍ច្បាប់ប្រកបដោយភាពសុខដុមរមនាក្នុងសង្គម៕ ដោយ ÷ ហុង វាស្នា