ភ្នំពេញ៖ គណៈកម្មាធិការត្រួតពិនិត្យផលិតផលថ្នាំជក់ រៀបចំសិក្ខាសាលាផ្សព្វផ្សាយលទ្ធផល នៃការអង្កេតថ្នាក់ជាតិលើមនុស្សពេញវ័យ ស្តីពីថ្នាំជក់នៅប្រទេសកម្ពុជាឆ្នាំ២០២១, នាព្រឹកថ្ងៃទី២១ ខែកុម្ភៈ ឆ្នាំ២០២៣នេះ។

ឯកឧត្តមវេជ្ជបណ្ឌិត អ៊ឹង ភីរុន រដ្ឋលេខាធិការក្រសួងសុខាភិបាល និងជាអនុប្រធានអចិន្ត្រៃយ៍ គណៈកម្មាធិការត្រួតពិនិត្យផលិតផលថ្នាំជក់ និងជាតំណាងឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការត្រួតពិនិត្យផលិតផលថ្នាំជក់ បានលើក​ឡើង​ពីគោលបំណងដើម្បីបង្ហាញរបកគំហើញ ពីការអង្កេតថ្នាក់ជាតិលើ​មនុស្សពេញវ័យ​ស្ដីពីថ្នាំជក់​នៅប្រទេសកម្ពុជាឆ្នាំ២០២១ ដែលបានបង្ហាញអំពី​វឌ្ឍនភាពដ៏ គួរឱ្យកត់សម្គាល់នៅក្នុងការ​ត្រួត​ពិនិត្យ​ផលិតផលថ្នាំជក់នៅប្រទេសកម្ពុជា​ ក៏​ដូចជាលទ្ធផល​នៃការអនុវត្តអនុសញ្ញា ស្តីពីការត្រួត​ពិនិត្យ​ថ្នាំជក់របស់អង្គការសុខភាពពិភពលោក។

ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ដ្រី គណៈកម្មាធិការត្រួតពិនិត្យផលិតផលថ្នាំជក់ដែលដឹកនាំដោយ​ក្រសួងសុខាភិបាល​បានយកចិត្តទុកដាក់អនុវត្តការងារត្រួតពិនិត្យផលិតផលថ្នាំជក់ដើម្បីកាត់បន្ថយ បន្ទុកជំងឺមិនឆ្លងប្រកបដោយជោគជ័យ។

លទ្ធផលនៃការអង្កេតថ្នាក់ជាតិ ដែលដឹកនាំដោយក្រសួងសុខាភិបាល សហការជាមួយវិទ្យាស្ថាន​ជាតិស្ថិតិ នៃក្រសួងផែនការបានបង្ហាញថា អត្រាជក់ថ្នាំជក់ក្នុងចំណោមមនុស្សពេញ វ័យ អាយុ១៥ឆ្នាំឡើង មានការថយចុះក្នុងរយៈពេល៥ឆ្នាំ ចុងក្រោយនេះ ចំនួន ៤.៥% គឺពី ៣២.៩% ក្នុងឆ្នាំ២០១៤ ​មកត្រឹម ២៨.៤% ក្នុងឆ្នាំ២០២១។

ការអនុវត្តច្បាប់ស្ដីពីការត្រួតពិនិត្យផលិតផលថ្នាំជក់ដែលបានដាក់ ចេញកាលពីឆ្នាំ២០១៥ បានជំរុញ​ឲ្យការងារត្រួតពិនិត្យផលិតផលថ្នាំជក់កាន់តែប្រសើរ​ ការស្រូបផ្សែងបារី ដោយ​អចេតនា​នៅមូលដ្ឋានសុខាភិបាលបានថយចុះ ១៣.៤២% (២៣.២% ក្នុងឆ្នាំ២០១៤ ​មកត្រឹម ៩.៧៨% ក្នុងឆ្នាំ២០២១) ក្នុងចំណោមបុរស និងថយចុះ ៦,៩៨% (២០.១% ក្នុងឆ្នាំ២០១៤ មកត្រឹម ១៣.១២% ក្នុងឆ្នាំ២០២១) ក្នុងចំណោមស្ត្រី។

លទ្ធផលនេះបង្ហាញអំពីការប្តេជ្ញាចិត្តរបស់គណៈកម្មាធិការ ​ត្រួតពិនិត្យផលិតផលថ្នាំជក់ និង​ស្ថាប័ន​ពាក់ព័ន្ធ​ទាំងអស់ ​ជាពិសេសភាពជាអ្នក​ដឹកនាំ​ជាគំរូ​វិសេសវិសាល​របស់​សម្ដេចតេជោ នាយករដ្ឋ​មន្ត្រី ដែលជានិច្ចកាលលើកទឹកចិត្តដល់ជនរួមជាតិទាំងមូលឲ្យ លះបង់ ​ទម្លាប់ប្រើប្រាស់ថ្នាំជក់ ជ្រើសរើសយកសុខភាព​ ដោយមិនជ្រើសយកផលិតផលថ្នាំជក់។

ឯកឧត្តម រដ្ឋលេខាធិការ បានបញ្ជាក់ថា សិក្ខាសាលាថ្ងៃនេះ គណៈកម្មធិការត្រួតពិនិត្យផលិតផល​ថ្នាំ​ជក់សូមគោរពដឹងគុណដ៏ខ្ពង់ខ្ពស់​បំផុតដល់សម្តេចតេជោ ហ៊ុន សែន​ នាយករដ្ឋមន្ត្រី នៃព្រះរាជា​ណា​ចក្រកម្ពុជា ​ដែលតែងត ​គាំទ្រលើការងារត្រួតពិនិត្យផលិតផលថ្នាំជក់ ក៏ដូចជា​ការ​ប្រឹងប្រែងក្នុងការអនុវត្តតាម​អនុសញ្ញា​ស្ដីពីការត្រួតពិនិត្យ ថ្នាំជក់របស់អង្គការសុខភាពពិភព​លោក​ដែលកម្ពុជាជារដ្ឋភាគី៕អត្ថបទ រដ្ឋា