​ម៉ូតូ​ទឹក៖ កីឡាករ​ម៉ូតូ​ទឹក​ឆ្នើម​កម្ពុជា សាលី អ៊ូ​មើ​ត បាន​បង្ក​ការចាប់អារម្មណ៍​ជាថ្មី​ទៀតហើយ ក្រោយ​បំបែក​កំណត់ត្រា​កីឡាករ​អាស៊ី​ដំបូង ដែល​ដណ្ដើម​បាន​ចំណាត់ថ្នាក់​លេខ​៤ ក្នុងការ​ប្រកួត​កីឡា​ម៉ូតូ​ទឹក​ជើងឯក​ពិភពលោក Jet Ski World Cup 2021 នៅ​ប្រទេស​ថៃ លើ​វិញ្ញាសា​ធំ និង​ល្បី​ជាង​គេគឺ​វិញ្ញាសា Ski GP កាលពី​ចុង​សប្ដាហ៍​កន្លងទៅ។

​ប៉ុន្ដែ​នៅ​ពីក្រោយ​ការ​សាង​កំណត់ត្រា​ដ៏​អស្ចារ្យ​នេះ មានរឿង​ដ៏​ភ្ញាក់ផ្អើល​មួយទៀតដែល​អ្នកគាំទ្រ​ភាគច្រើន​មិនបាន​ដឹង គឺ​កីឡាករ​ជម្រើស​ជាតិ​កម្ពុជា​រូប​នេះបាន​យក​ម៉ូតូ​ទឹក​ចាស់​ធ្លាប់​ឈ្នះ​មេ​ដាយ​មាស​កីឡា​អាស៊ីកាលពី ៤​ឆ្នាំមុន ដើម្បី​ធ្វើការ​ប្រកួតប្រជែង​ជាមួយ​ក្រុម​កីឡាករ​ខ្លាំងៗដែល​ប្រើប្រាស់​ម៉ូតូ​ទឹក​ថ្មី និង​មាន​កម្លាំង​ខ្លាំង រហូត​បង្កើត​កំណត់ត្រា​ថ្មីដែល​ពុំទាន់​មាន​កីឡាករ​អាស៊ី​រូប​ណា​ធ្វើបាន។​ ​សាលី អ៊ូ​មើ​ត បាន​បញ្ជាក់​ថា ការប្រកួត​នេះ ខ្លួន​ពិតជា​បាន​ប្រើ​ម៉ូតូ​ទឹក​ចាស់ដែល​ធ្លាប់​យក​ទៅ​ប្រកួត Asian Games 2018 នៅ​ឥណ្ឌូនេស៊ី ដើម្បី​ប្រកួតប្រជែង​ជាមួយ​កីឡាករ​ខ្លាំង​ៗ​ផ្សេងទៀត ព្រោះ​ម៉ូតូ​ទឹក​ថ្មី​របស់​ខ្លួន​ដែល​កម្មង់​ទិញ និង​ដំឡើង​នៅ​ប្រទេស​អូទ្រីសត្រូវ​បាន​រាំងស្ទះ​ក្នុង​ការ​បញ្ជូន​មក​ប្រទេស​ថៃ ដោយសារ​បញ្ហា​កូ​វីដ​-១៩ គ្រា​ដែល​ជាង​របស់​ខ្លួនក៏​ឆ្លង​ជំងឺ​កូ​វីដ​-១៩ ទើប​មិន​អាច​នាំ​ម៉ូតូ​ទឹក​ថ្មី​មក​បាន។​ ​ដោយហេតុនេះ អ៊ូ​មើ​ត បានសម្រេច​ប្រើ​ម៉ូតូ​ចាស់ដែល​មាន​កម្លាំង​ម៉ាស៊ីន​ត្រឹម ១,៥០០ Stock និង​រត់​ល្បឿន​បាន​ត្រឹម ១០៥ ទៅ​ប្រកួត​ជាមួយ​ម៉ូតូ​ទឹក​គេដែល​មាន​កម្លាំង ១,៨០០ Stock និង​រត់​ល្បឿន​បាន ១២៥ ឡើង។ ប៉ុន្ដែ​ជា​មោទនភាពដោយ​ផ្អែកលើ​សមត្ថភាព បទពិសោធន៍ និង​ការ​ខំប្រឹង​ដើម្បី​ជាតិ បានធ្វើ​ឲ្យ​រូបគេប្រកួតប្រជែង​ដោយ​ទំនុក​ចិត្ត ទោះបី​ចេញដំណើរ​រៀង​យឺត​ជាងគេ​បន្តិច តែ អ៊ូ​មើ​ត បាន​វ៉ា​គូប្រជែង​ម្ដង​មួយៗរហូត​សម្រេច​បាន​ចំណាត់ថ្នាក់​លេខ​៤ ក្រោយ​ឆ្លងកាត់​ប្រកួត​ដ៏​ស្វិតស្វាញ ២​ថ្ងៃ​កាលពី​ចុង​សប្ដាហ៍​កន្លងទៅ។​

កីឡាករ​ខ្មែរ​-​ឥស្លាម​រូប​នេះ​បាន​បញ្ជាក់​ថា ប្រសិនបើ​បាន​ម៉ូតូ​ទឹក​ថ្មី​ដែល​មាន​កម្លាំង ១,៨០០ Stock ខ្លួន​រំពឹង​ថា យ៉ាង​ហោច​ក៏​ដណ្ដើម​បាន​ចំណាត់ថ្នាក់​លេខ​២ ឬ​លេខ​៣ ក្នុង​ការ​ប្រកួត​ជើងឯក​ពិភព​លោក​នេះ​ដែរ។ ប៉ុន្ដែ​យ៉ាងណា​ខ្លួន​នៅ​តែ​មាន​មោទនភាព​ជា​ខ្លាំង ព្រោះ​ការប្រកួត​វិញ្ញាសា​ធំ​ជាង​គេ​លើ​ប្រភេទ​កីឡា​ម៉ូ​ទឹក​នេះ ពុំ​ធ្លាប់​មាន​កីឡាករ​អាស៊ី​ណា​ដណ្ដើម​បាន​ចំណាត់ថ្នាក់​លេខ​៤ ឬ​លេខ​៥ ឡើយ សូម្បី​ចំណាត់ថ្នាក់ Top-10 ក៏​គ្មាន​ដែរ។ ដូច្នេះ​ខ្លួន​ប្ដេជ្ញា​នឹង​ខិតខំ​ប្រឹងប្រែង​បន្ថែម​ទៀត ដើម្បី​ឈាន​ទៅ​ដណ្ដើម​ចំណាត់ថ្នាក់​ល្អ​ប្រសើរ​នា​ថ្ងៃ​អនាគត។​ ​គួរ​បញ្ជាក់​ថា សាលី អ៊ូ​មើ​ត និង​សិស្ស​ប្អូន ៤​នាក់​ផ្សេងទៀតនៃ​ក្រុម​ជម្រើស​ជាតិ​ម៉ូតូ​ទឹក​កម្ពុជា បាន​ចូលរួម​ប្រកួត​កីឡា​ម៉ូតូ​ទឹក​ជើងឯក​ពិភពលោក នៅ​តំបន់​ឆ្នេរក្រុង​ប៉ា​តា​យា ប្រទេស​ថៃ ចាប់ពី​ថ្ងៃ​ទី​២១ ដល់​ថ្ងៃ​ទី​២៥ ខែ​មេសា ឆ្នាំ​២០២១ ហើយ​ជា​លទ្ធផល​មាន​កីឡាករ​កម្ពុជា ៣​រូប ដែល​ទទួល​បាន​ពានរួមមាន អ៊ូ​មើ​ត ទទួលបាន​ពាន​លេខ​៤ លើ​វិញ្ញាសា Ski GP, កីឡាករ ម៉ី​ន មូ​ស្ដា​ន ទទួលបាន​ពាន​លេខ​៥ លើ​វិញ្ញាសា Ski GP ដូចគ្នា និង​កីឡាករ ម៉ី​ន អូស្មាន ទទួលបាន​ពាន​លេខ​៥ លើ​វិញ្ញាសា Novice Ski Stock។​

​ប៉ុន្ដែ​ទន្ទឹម​ជាមួយគ្នា ក៏​គួរ​ឲ្យ​សោកស្ដាយសម្រាប់​កីឡាករ​វ័យក្មេង កៃ វ៉ាន់​ស៊ី​ដែន ដែល​ជួប​គ្រោះថ្នាក់អំឡុង​ពេល​ការប្រកួតដោយ​រអិល​ជើង​ធ្លាក់​ពីលើ​ម៉ូតូ បណ្ដា​ឲ្យ​រង​របួស​ចង្កា​ដេ​ចំនួន ១៦​ថ្នេរ មិន​អាច​បន្ដ​ការប្រកួតរហូត​ចប់​ចុង​ចប់​ដើមឡើយ។ វ៉ាន់​ស៊ី​ដែន ត្រូវ​បាន​បញ្ជូន​ទៅ​ព្យាបាល​នៅ​មន្ទីរពេទ្យ​ភ្លាមៗ ក្រោម​ការចំណាយ​របស់​កីឡាករ​ផ្ទាល់ ខណៈ​ការប្រកួត​បាន​ត្រឹមតែ ១​ថ្ងៃ​របស់​គេ ត្រូវ​បាន​គណៈកម្មការ​សម្រេច​ផ្ដល់​ចំណាត់ថ្នាក់​លេខ​៨។ ប៉ុន្ដែ​ជាក់ស្ដែង ប្រសិនបើ​គ្មាន​គ្រោះថ្នាក់​ចៃដន្យ​ទេ ម្ល៉ោះ​គេ​អាច​ប្រជែង​ចំណាត់ថ្នាក់ Top3 បាន​ទៅហើយ៕

អត្ថបទ៖ លី ឈុន​ឡា