ភ្នំពេញ៖ កម្ពុជា ក្នុងខែ មិថុនា ឆ្នាំ ២០២៣ខាងមុខនេះ នឹងធ្វើជាម្ចាស់ផ្ទះក្នុងរៀបចំសន្និសីទជនមាន​ពិការភាពប្រចាំតំបន់អាស៊ីប៉ាហ្វិកលើកទី ៥។ សន្និសីទនេះនឹងមានការចូលរួមគណៈប្រតិភូជាថ្នាក់​ដឹកនាំជាង ២០ប្រទេសចូលរួម។

កម្ពុជានឹងធ្វើជាម្ចាស់ផ្ទះរៀបចំសន្និសីទជនមានពិការភាពប្រចាំតំបន់អាស៊ីប៉ាហ្វិក ដែលនឹងធ្វើឡើង​រយៈពេល ៣ថ្ងៃ ចាប់ពីថ្ងៃទី ១៥ ដល់ថ្ងៃទី ១៧ខែ មិថុនា ឆ្នាំ ២០២៣ ហើយនឹងមានការចូលរួមបើក​សន្និសីទ ដោយសម្ដេច តេជោ ហ៊ុន សែន នាយករដ្ឋមន្រ្តី។ សន្និសីទនេះ ធ្វើឡើងក្រោមប្រធានបទ “ ការពង្រឹងការផ្ដល់ភាពអង់អាចផ្នែកសង្គម​ និងសេដ្ឋកិច្ចរបស់ជនមានពិការភាព ក្នុងអំឡុងនិង​ក្រោយ​ការរាតត្បាតនៃជំងឺកូវីដ ១៩ តាមរយៈការអភិវឌ្ឍតាមបែបបរិយាបន្ននៅសហគមន៍”។

ពាក់ព័ន្ធនឹងការរៀបចំសន្និសីទនេះ ​ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច លើកឡើងថា គណៈប្រតិភូជាង ២០ប្រទេសនឹងចូលរួម ​ហើយក៏មានបណ្ដាអង្គការ ជនមាន​ពិការភាព​សរុប​ទាំងអស់ ប្រមាណ ៧០០នាក់ផងដែរ។ ចំពោះការទទួលធ្វើជាម្ចាស់ផ្ទះ រៀបចំសន្និសីទនេះ ​ឯកឧត្តមគូសបញ្ជាក់ថា វាជាមោទនភាពដែលនឹងក្លាយជាឱកាស​មួយដែល​កម្ពុជា ​អាចបង្ហាញនូវសមិទ្ធផល​ជាច្រើនដែលកម្ពុជាសម្រេចបាន ក្នុងវិស័យពិការភាពជូនអ្នកចូល​រួមជាតិ និងអន្តរជាតិទាំងអស់។

ក្នុងនាមជារដ្ឋលេខាធិការ និងជាអ្នកទទួលបន្ទុកលើវិស័យពិការភាពមួយរូប ឯកឧត្តម ឯម ច័ន្ទមករា បានបញ្ជាក់ដែរថា ​ជនមានពិការភាពនៅកម្ពុជា គឺទទួលបានសិទ្ធិដូចគ្នាទៅនឹងជនគ្មានពិការភាព។ ជាក់ស្ដែងគឺមានការសម្រួល​ទៅដល់ហេដ្ឋារចនាសម្ព័ន្ធ ដូចជាជម្រាល នៅតាមទីសាធារណៈ ដើម្បី​ផ្ដល់​ភាពងាយស្រួល់ជនមានពិការភាព ការផ្ដល់ការអប់រំជូនដល់ជនមានពិការភាពចាប់រាប់ពីថ្នាក់​មតេយ្យដល់ថ្នាក់ឧត្តម ​ ការផ្ដល់ការងារជូនមានពិការភាពទាំងក្នុងស្ថាប័ន្ធរដ្ឋនិងឯកជន។ សម្រាប់ស្ថាប័នរដ្ឋ ​គឺមានជនមានពិការភាពជិត ​៤០០០នាក់​ កំពុងបំពេញការងារ គិតជាភាគរយ​គឺស្មើនឹង ២,០១ភាគរយ ដែលលើសពីផែនការកំណត់ត្រឹម ២ភាគរយប៉ុណ្ណោះ។ ចំពោះជនមានពិការភាព ​កំពុងបំពេញការងារក្នុងស្ថាប័នឯកជនវិញ គឺមានចំនួនជិត ៦០០០នាក់។ ក្នុងអំឡុងពេលប្រយុទ្ធប្រឆាំងកូវីដ ១៩នេះ រាជរដ្ឋាភិបាល ក៏បានផ្ដល់ការឧបត្ថម្ភ​សាច់ប្រាក់ជូន​គ្រួសារក្រីក្រ ដោយក្នុងនោះបានជួយដល់ជនមានពិការភាពប្រមាណជិត ២ម៉ឺននាក់ផងដែរ៕ អត្ថបទ៖ គឹមហុក