​រុស្ស៊ី៖ ប្រធានាធិបតី​រុស្ស៊ី​លោក Vladimir Putin ត្រូវបាន​គេ​រំពឹងថា​ នឹង​ថ្លែង​សុន្ទរកថា​ទៅកាន់​ប្រជាជាតិ​នៅ​ថ្ងៃ​អង្គារ​នេះ មុន​ខួប ​១​ឆ្នាំ​នៃ​ការវាយលុក​នៅ​អ៊ុយ​ក្រែ​ន​។ វា​នឹង​ក្លាយជា​សុន្ទរកថា​លើក​ដំបូង​របស់​លោក ចាប់​តាំង​ពី​រុស្ស៊ី​បានចាប់ផ្តើម​ការវាយលុក​របស់ខ្លួន​លើ​អ៊ុយ​ក្រែ​ន​នៅ​ថ្ងៃ​ទី២៤ ខែកុម្ភៈ ឆ្នាំ២០២២​។​

​ប្រធានាធិបតី​រុស្សី​តែងតែ​ថ្លែង​សុន្ទរកថា​ជា​រៀង​រាល់ឆ្នាំ ដើម្បី​បង្ហាញ​អំពី​គោលនយោបាយ​ក្នុងស្រុក និង​បរទេស​ដល់​សមាជិកសភា និង​មន្ត្រី​រដ្ឋាភិបាល​។ ប្រព័ន្ធ​ផ្សព្វផ្សាយ​រដ្ឋ​រុស្ស៊ី​បាន​ដកស្រង់​សម្តី​អ្នក​នាំពាក្យ​វិមាន​ក្រឹម​ឡាំង​លោក Dmitry Peskov ដែល​បាន​និយាយ​កាលពី​ថ្ងៃអាទិត្យ​ថា ជីវិត​របស់​ប្រជាជន​រុស្ស៊ី​បច្ចុប្បន្ន​នេះ​ផ្តោត​លើ​គោលដៅ​នៃ​ប្រតិបត្តិការ​សឹក​ពិសេស​។​ ​តាម​សេចក្តីរាយការណ៍ លោក Peskov បាន​និយាយ​ថា​ លោក​ប្រធានាធិបតី​យកចិត្តទុកដាក់​ជាពិសេស​ចំពោះ​ «​ប្រតិបត្តិការ​សឹក​ពិសេស​»​។ ក្រសួង​ការពារជាតិ​ចក្រភព​អង់គ្លេស​បាន​និយាយ​ នៅ​ក្នុង​ការធ្វើ​បច្ចុប្បន្នភាព​ការ​ស៊ើបការណ៍​សម្ងាត់​កាលពី​ថ្ងៃ​សៅរ៍​ថា បញ្ហា​ដូចជា​ការ​គាំទ្រ​សង្គម​សម្រាប់​អ្នក​ដែល​ត្រូវបាន​កែ​ណ្ឌ និង​ក្រុម​គ្រួសារ​របស់​ពួកគេ​ទំនងជា​កាន់តែ​ផុស​ផុល​។

ដោយ​ដកស្រង់​ប្រភព​ព័ត៌មាន​ទីភ្នាក់ងារ​សារព័ត៌មាន​រដ្ឋ Tass របស់​រុស្ស៊ី​បាន​រាយការណ៍​ថា លោក Putin ទំនងជា​នឹង​ថ្លែង​សុន្ទរកថា​នៅ​ក្នុង​ការ​ជួប​ជុំ​មនុស្ស​ចំនួន ២​សែន​នាក់​នៅ​ថ្ងៃ​ពុធ ដែល​ការ​ជួប​ជុំ​នេះ​គ្រោង​នឹង​ធ្វើ​ឡើង​នៅ​ពហុ​កីឡដ្ឋាន​ក្នុង​ទីក្រុង​មូ​ស្គូ​។ លោក​ Putin ត្រូវ​បាន​គេ​រំពឹង​ថា​ នឹង​បង្ហាញ​អំពី​ភាព​ត្រឹមត្រូវ​នៃ​ការ​វាយលុក​នៅ​អ៊ុយ​ក្រែ​ន ជា​ផ្នែក​នៃ​កិច្ច​ខិតខំ​ប្រឹងប្រែង​ដែល​កំពុង​បន្ត ​ដើម្បី​ស្វែងរក​ការ​យល់​ដឹង​ជា​សាធារណៈ​សម្រាប់​ប្រតិបត្តិការ​សឹក​ដែល​អូស​បន្លាយពេល​៕

អត្ថបទ៖ ប៊ុនថន