​បាល់ទាត់៖ ​ក្លិប​បិសាច​ក្រហម Manchester United បានប្រកាស​ពី​ការដំឡើង​តម្លៃ​សំបុត្រ​ចូល​ទស្សនា​ផ្ទាល់​នៅ​កីឡដ្ឋាន Old Trafford ជា​លើកដំបូង​ក្នុង​រយៈពេល ១១រដូវ​កាល នេះ​បើតាម​សេចក្តី​ប្រកាស​របស់​ក្លិប​នៅ​ក្របខណ្ឌ Premier League មួយ​នេះ​កាលពី​ថ្ងៃ​ចន្ទ​។

​​បើ​តាម​ការ​បញ្ជាក់​ក្នុង​សេចក្តីប្រកាស​របស់​ក្លិប​ឱ្យដឹង​ទៀត​ថា ការសំរេច​ដំឡើង​តម្លៃ​សំបុត្រ​នេះ​គឺ​បណ្តាល​មក​ការ​ចំណាយ​ ទៅលើ​ការរៀបចំ​ការប្រកួត​នីមួយៗ​មានការ​កើន​ឡើង ​ពោល​គឺ​ការ​ចំណាយ​កើន​ដល់ ៤០% ក្នុង​រយៈពេល ៥ឆ្នាំ​ចុងក្រោយ និង​កើន ១១% ក្នុង​រយៈពេល ១២​ខែ​ចុង​ក្រោយ​។ ​ក្លិប​ក៏បាន​បន្ថែម​ទៀត​ថា ​សម្រាប់​តម្លៃ​ក្មេង​អាយុ​ក្រោម ១៦​ឆ្នាំ​នៅ​រក្សា​ដដែល ក៏ដូចជា​បញ្ចុះតម្លៃ ៥០% សម្រាប់​អ្នកគាំទ្រ​វ័យ ៦៥​ឆ្នាំ​ឡើង​។

​​សូមបញ្ជាក់ថា Manchester United កំពុងស្ថិត​ក្នុងការ​ចរចា​លក់​ភាគហ៊ុន​ធំ​ដោយ​ម្ចាស់​ក្លិប​គ្រួសារ​ត្រកូល Glazers ខណៈ​បច្ចុប្បន្ន​មានការ​ដេញថ្លៃ​ទិញ​ពីរ​រួមមាន​ប្រធាន​ក្រុម INEOS មហាសេដ្ឋី​អង់គ្លេស Sir Jim Ratcliffe និង​កូនប្រុស​អតីត​នាយករដ្ឋមន្ត្រី​កាតា Sheikh Jassim Bin Hamad Al Thani៕

​អត្ថបទ​៖​នាង សុភា​វុ​ធ