ភ្នំពេញ៖ ក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី២១ខែកុម្ភៈនេះ បានរៀបចំពិធីបើកវគ្គ​បណ្តុះបណ្តាលការងាររដ្ឋបាល ​និងការគ្រប់គ្រងធនធានមនុស្សក្នុងវិស័យសាធារណៈ ដែលមាន​សិក្ខាមចូលរួមវគ្គបណ្តុះបណ្តាលសរុបចំនួន ១០០នាក់។

ពិធីបើកនេះ ធ្វើឡើងក្រោមអធិបតីភាពឯកឧត្តម ឡុង ប៉ុណ្ណាស៊ីរីវត្ថ ​រដ្ឋលេខាធិការក្រសួងវប្បធម៌ និងវិចិត្រសិល្បៈ ​តំណាងរដ្ឋមន្រ្តីក្រសួង។

នៅក្នុងឱកាសនោះ ឯកឧត្តម ឡុង ប៉ុណ្ណាស៊ីរីវត្ថ បានថ្លែងថា ​ការសិក្សាលើមុខវិជ្ជា ការងាររដ្ឋបាល និងការងារគ្រប់គ្រងធនធានមនុស្ស ​នៅថ្ងៃនេះ ​ក្រសួងវប្បធម៌ ​និងវិចិត្រសិល្បៈ មានបំណងចង់ផ្តល់​ទស្សនទានក្នុងវិស័យរដ្ឋបាល ​នាពេលបច្ចុប្បន្ននិងទៅអនាគត ​ឱ្យមន្រ្តីរាជការបន្តរៀនសូត្រ ពង្រឹង​សមត្ថភាព នៅតាមអង្គភាព និងធ្វើទំនើបកម្ម ​ផ្នែកកិច្ចការដ្ឋបាលសាធារណៈ ដើម្បីដើរឱ្យទាន់​ស្ថានភាព​សង្គមឌីជីថល ដែលកំពុងមានការរីកចម្រើនឥតឈប់ឈរ។

ជាមួយគ្នានេះ លោក តន សុវណ្ណឧត្តម នាយកសាលាបណ្តុះបណ្តាល​ក្របខ័ណ្ឌក្រសួងវប្បធម៌ មាន​ប្រសាសន៍ដែរថា ផ្អែកលើគោលនយោបាយ​ និងយុទ្ធសាស្រ្តកំណែទម្រង់របស់រាជរដ្ឋាភិបាល សាលា​បណ្តុះបណ្តាលក្របខ័ណ្ឌវប្បធម៌​ ដែលជាអង្គភាព​ចំណុះក្រសួងវប្បធម៌ និងវិចិត្រសិល្បៈ មានបេសកកម្ម និងភារកិច្ចកាន់តែសំខាន់ឡើងក្នុងមុខងារជាអ្នកផ្តល់​ការគាំទ្រលើវិស័យបណ្តុះ​បណ្តាល​ អភិវឌ្ឍន៍​ធនធានមនុស្សដល់អង្គភាពមន្រ្តីរាជការថ្នាក់ជាតិ និងថ្នាក់ក្រោមជាតិ ក្នុងការ​ធ្វើទំនើបកម្មមុខងារសាធារណៈ ​ឱ្យប្រកបដោយធនធាន​ ដែលមានគុណភាព មានវិជ្ជាជីវៈ ជាបញ្ញាជន​ វិញ្ញូជនរដ្ឋបាល ជាអ្នកគ្រប់គ្រង ​និងដំណើរការរដ្ឋបាលប្រកប​ដោយសមត្ថភាព ជាមន្រ្តីរាជការ ​ដែលប្រកាន់យកសីលធម៌ថ្លៃថ្នូរ ​និងជាអ្នកបម្រើការងារដ្ឋបាល និងប្រជាជនប្រកប​ដោយប្រសិទ្ធភាព​ និងប្រសិទ្ធផល។

បច្ចុប្បន្ន រាជរដ្ឋាភិបាលកម្ពុជាបានយកចិត្តទុកដាក់ លើការពង្រឹងសមត្ថភាពការងាររបស់​មន្រ្តីរាជ​ការ គ្រប់លំដាប់ថ្នាក់ ​ដើម្បីឱ្យដើរស្របតាមគោលនយោបាយ ​និងផែនការអភិវឌ្ឍ​គ្រប់ផ្នែក គ្រប់វិស័យ​ និងគ្រប់កម្រិត​ ដូចមាន​កំណត់នៅក្នុងយុទ្ធសាស្រ្តចតុកោណ៕ អត្ថបទ៖ទូច សោភ័ណ