ភ្នំពេញ៖ លោកជំទាវកិត្តិនីតិកោសលបណ្ឌិត ទី បូរ៉ាស៊ី ប្រធានគណៈកម្មការកិច្ចការបរទេស សហប្រតិបត្តិការអន្ដរជាតិ ឃោសនា និងព័ត៌មាន នៃព្រឹទ្ធសភា (គណៈកម្មការទី៥) បានសម្ដែង​នូវការ​កោតសរសើរ និងវាយតម្លៃខ្ពស់ចំពោះលទ្ធផលការងាររបស់អគ្គ​នាយកដ្ឋានអន្ដោប្រវេសន៍ នៃក្រសួងមហាផ្ទៃ​ ដែលសម្រេចបាននាពេលកន្លងមក ​ពិសេសលើការងារគ្រប់គ្រងជនបរទេស។

ការកោតសរសើររបស់គណៈកម្មការទី៥ នៃព្រឹទ្ធសភា ធ្វើឡើងនៅព្រឹកថ្ងៃទី២១ ខែកុម្ភៈ ឆ្នាំ២០២៣នេះ ក្នុងកិច្ចប្រជុំពិភាក្សាជាមួយអគ្គនាយកដ្ឋានអន្ដោប្រវេសន៍ ។ កិច្ចប្រជុំពិភាក្សានេះ ធ្វើឡើងនៅវិមានព្រឹទ្ធសភា ដើម្បីស្ដាប់នូវអ្វីដែលជាលទ្ធផលសម្រេច​បានរបស់​អគ្គនាយកដ្ឋាន​អន្ដោប្រវេសន៍ ក្នុងឆ្នាំ២០២២កន្លងមក​ និងផែនការទិសដៅបន្ដ។

នាយឧត្តមសេនីយ៍ គៀត ច័ន្ទថារិទ្ធ បានឲ្យដឹងថា ​នេះជាលើកទី៣ហើយ ​ដែលអគ្គនាយកដ្ឋាន​អន្ដោប្រវេសន៍ បានចូលរាយការណ៍អំពីលទ្ធផលការងាររបស់ខ្លួនប្រចាំឆ្នាំ​ ជូនគណៈកម្មការទី៥ នៃព្រឹទ្ធសភា ពាក់ព័ន្ធការងារគ្រប់គ្រងជនបរទេសនៅកម្ពុជា, វឌ្ឍនភាព​នៃការធ្វើច្បាប់ថ្មី​ស្ដីពី​អន្ដោប្រវេសន៍ និងឆ្លើយបំភ្លឺនូវអ្វីដែលគណៈកម្មការបានចុះទៅតាមតំបន់មួយចំនួន ក៏ដូចជា​សំណួរដែលគណៈកម្មការចង់ដឹងពាក់ព័ន្ធច្បាប់ ​ការអនុវត្តជាក់ស្ដែងជាដើម។

នាយឧត្តមសេនីយ៍ បានបន្ដទៀតថា ជាលទ្ធផលក្នុងជំនួបពេញមួយព្រឹកនេះ លោកជំទាវកិត្តិនីតិកោសលបណ្ឌិត ទី បូរ៉ាស៊ី និងសមាជិកគណៈកម្មការទី៥ បានបង្ហាញនូវក្ដី​សប្បាយរីករាយ ​និងទទួលនូវអ្វីដែលអគ្គនាយកដ្ឋានបានរាយការណ៍។ ​បន្ថែមពីនេះ គណៈកម្មការទី៥​ បានវាយតម្លៃខ្ពស់ចំពោះការខិតខំប្រឹងប្រែង​របស់អគ្គនាយកដ្ឋានអន្ដោប្រវេសន៍ និងអង្គភាពពាក់ព័ន្ធក្នុងក្រសួងមហាផ្ទៃ។

ជាមួយគ្នានោះដែរ លោកជំទាវ ទី បូរ៉ាស៊ី ក៏បានផ្ដល់នូវអនុសាសន៍មួយចំនួន ដល់អគ្គនាយកដ្ឋាន​អន្ដោប្រវេសន៍ ដើម្បីបន្ដខិតខំប្រឹងប្រែង ​ពិសេសបានលើកយកនូវបញ្ហាប្រឈមជាក់ស្ដែង ដែល​គណៈកម្មការមើលឃើញ និងជួបប្រទះនៅពេលចុះទៅ​តាម​បណ្ដាច្រកទ្វារព្រំដែន​នាពេលកន្លងមក​ផងដែរ។

ជាការឆ្លើយតបនូវអ្វីដែលជាអនុសាសន៍នោះ នាយឧត្តមសេនីយ៍ គៀត ច័ន្ទថារិទ្ធ ជំនួស​មុខឲ្យថ្នាក់​ដឹកនាំ និងមន្ដ្រីទាំងអស់ នៃអគ្គនាយកដ្ឋានអន្ដោប្រវេសន៍ ​បានបញ្ជាក់អំពីការប្ដេជ្ញាចិត្តខ្ពស់​ធ្វើយ៉ាងណា​អនុវត្តតួនាទីភារកិច្ចរបស់ខ្លួន ​ដែលក្រសួងមហាផ្ទៃ ​និងរាជរដ្ឋាភិបាលប្រគល់ជូន សំដៅចូលរួមឲ្យសកម្មក្នុងការការពារសន្ដិសុខជាតិ ​សន្ដិសុខសង្គម និងអនុវត្តនយោបាយ​ជាតិផ្សេងៗទៀត​ ទាក់ទងទេសចរណ៍ សេដ្ឋកិច្ច និងការងារជាដើម៕អត្ថបទ៖បាន ចក់