ភ្នំពេញ ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ហៅកាត់ ក.ប.ប. បានសហការជាមួយសភាពាណិជ្ជកម្មអឺរ៉ុបនៅកម្ពុជា (EuroCham) រៀបចំវេទិកាស្ដីពី ការប្រយុទ្ធប្រឆាំងនិងផលិតផលក្លែងក្លាយ និងការធ្វើធុរកិច្ចមិនសុចរិត និងពិធីចុះហត្ថលេខាលើអនុស្សរណៈនៃការយោគយល់គ្នា សំដៅធានាឱ្យមានវិបុលភាពទៅអនាគត។
អគ្គនាយកដ្ឋាន ក.ប.ប. នៅផេកហ្វេសប៊ុកផ្លូវការ នៅរសៀលថ្ងៃទី២១ កុម្ភៈ ឆ្នាំ២០២៣នេះ បានឲ្យដឹងថា វេទិកានេះ បានប្រារព្ធធ្វើឡើង ក្រោមវត្តមានរបស់ឯកឧត្ដម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ និងលោក តាស៊ីឡូ ប្រ៊ីនហ្សឺរ (Tassilo Brinzer) ប្រធានសភាពាណិជ្ជកម្មអឺរ៉ុបនៅកម្ពុជា និងមានការអញ្ជើញចូលរួមពីតំណាងក្រសួង ស្ថាប័នពាក់ព័ន្ធ និងតំណាងក្រុមហ៊ុនដែលជាសមាជិករបស់សភាពាណិជ្ជកម្មអឺរ៉ុបនៅកម្ពុជា។
នៅក្នុងឱកាសនោះ ឯកឧត្ដមអគ្គនាយក បានលើកឡើងថា ការធ្វើធុរកិច្ចមិនសុចរិតបាននិងកំពុងក្លាយជាការព្រួយបារម្ភរបស់សកលលោក ដែលរួមបញ្ចូលទាំងការលួចនាំចូលនូវផលិតផលក្លែងក្លាយ ការគេចវេសកាតព្វកិច្ចបង់ពន្ធ ការចរាចរខុសច្បាប់នូវទំនិញ និងសេវាកម្ម ដែលនាំឱ្យរដ្ឋាភិបាលនៃប្រទេសនីមួយៗខាតបង់នូវចំណូលពន្ធរាប់ពាន់លានដុល្លារអាមេរិក ទន្ទឹមនឹងនោះផងដែរ ធុរកិច្ចជនសុចរិតត្រូវបានខាតបង់ប្រយោជន៍ ហើយជាពិសេសអ្នកប្រើប្រាស់ទទួលបាននូវទំនិញដែលមិនសមប្រកប។ ឯកឧត្តមបានបន្តថា ហេតុដូចនេះហើយ ច្បាប់ស្តីពីកិច្ចការពារអ្នកប្រើប្រាស់ដែលត្រូវបានព្រះមហាក្សត្រកម្ពុជា ឡាយព្រះហស្តលេខាដាក់ប្រើជាផ្លូវការកាលពីឆ្នាំ២០១៩ បានដើរតួនាទីយ៉ាងសំខាន់ក្នុងការការពារសិទ្ធិនិងផលប្រយោជន៍របស់អ្នកប្រើប្រាស់ ការព្យាយាមកេងចំណេញ និងការអនុវត្តមិនសុចរិតនៅក្នុងទីផ្សាររបស់ធុរជនខិលខូចមួយចំនួន ក៏ដូចជាបង្កើនបរិយាកាសប្រកួតប្រជែងប្រកបដោយសមធម៌។
ឯកឧត្តម ផាន អូន បានមានប្រសាសន៍ថា ក្នុងឆ្នាំ២០២២នេះ អគ្គនាយកដ្ឋាន ក.ប.ប. បានអនុវត្តតួនាទីរបស់ខ្លួនតាមបញ្ញត្តិនៃច្បាប់ស្តីពីកិច្ចការពារអ្នកប្រើប្រាស់ តាមរយៈការសហការជាមួយទីភ្នាក់ងារសហប្រតិបត្តិការអន្តរជាតិនានា ដើម្បីរៀបចំសិក្ខាសាលាផ្សព្វផ្សាយច្បាប់ជូនដល់សាធារណជន និងធុរជននៅគ្រប់វិស័យ និងជាពិសេសប្រតិបត្តិការបង្រ្កាបនូវការចរាចរផលិតផលខូចគុណភាព ផលិតផលក្លែងបន្លំ និងរំលោភបំពានសិទ្ធិផ្តាច់មុខ។
សូមបញ្ជាក់ថា តាមរយៈវេទិកាខាងលើនេះ ក៏មានរៀបចំពិធីចុះអនុស្សរៈយោគយល់គ្នា រវាងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ជាមួយនឹងសភាពាណិជ្ជកម្មអឺរ៉ុប ក្នុងគោលបំណងសំដៅធានាឱ្យមានវិបុលភាពទៅអនាគត និងទាក់ទាញការវិនិយោគមកកាន់កម្ពុជា តាមរយៈកិច្ចសហប្រតិបត្តិការ ជំនួយបច្ចេកទេស និងការចែករំលែកនូវបទពិសោធន៍ រវាងអគ្គនាយកដ្ឋាន ក.ប.ប. និងសភាពាណិជ្ជកម្មអឺរ៉ុបនៅកម្ពុជា៕អត្ថបទ ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
