​បាល់ទាត់៖ ​ក្រុម​ជើងឯក English Premier League ឆ្នាំ២០១៦ Leicester City បាន​បន្តដំណើរ​ពង្រឹង​កៅអី​លេខ៣ របស់ខ្លួន​ក្នុង​តារាង​ក្រោយ​ជ័យជំនះ​លើ​ក្រុម​ភ្ញៀវ Crystal Palace ២-១ សប្តាហ៍​ទី៣៣ យប់មិញ​។

​​ក្រុម​ភ្ញៀវ Crystal Palace ចាប់ផ្តើម​ដោយ​នាំមុខ​មុន​នៅ​នាទី​ទី១២ ដោយ Wilfried Zaha​។ ​​ក្រុម​​របស់លោក Brendan Rodgers ត្រូវ​រង់ចាំ​ដល់​វគ្គ​ទី​ពីរ​នាទី​ទី៥០ ទើប Timothy Castagne ​តាម​ស្មើ​វិញ​ឲ្យ Leicester City មុន​ពេលដែល​ខ្សែប្រយុទ្ធ​កំពុង​ឡើង​ជើង Kelechi Iheanacho​ ជា​អ្នកសំរេច​គ្រាប់​បាល់​ជ័យជំនះ​ឲ្យ Leicester City នៅ​នាទី​ទី៨០​។ នេះ​ជា​គ្រាប់​ទី១២ ហើយ​ក្នុងការ​បង្ហាញខ្លួន​ត្រឹម ៩ប្រកួត​ប៉ុណ្ណោះ​សំរាប់ Kelechi Iheanacho​។​

​​បី​ពិន្ទុ​បន្ថែម​នេះ​មានន័យថា Leicester City បន្ត​ឈរ​លេខ៣ ក្នុង​តារាង​ក្រោយ​លេង​បាន ៣៣ប្រកួត​រកបាន ៦២ពិន្ទុ​ដេញ​ពីក្រោយ​ក្រុម​លេខ២ Manchester United ៥ពិន្ទុ និង​នៅ​ពីលើ​ក្រុម​លេខ៤ Chelsea ៤ពិន្ទុ ខណៈ West Ham លេខ៥ មាន ៥៥ពិន្ទុ​ដេញ​ពីក្រោយ Chelsea ៣ពិន្ទុ​។ ប្រកួត​បន្ទាប់ Leicester City ត្រូវ​ទៅ​ទឹកដី Southampton យប់​ថ្ងៃ​សុក្រ​នេះ ខណៈ Crystal Palace ទទួល Manchester City នៅ​ថ្ងៃ​សៅរ៍​៕

​អត្ថបទ​៖​នាង សុភា​វុ​ធ