ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅតែបញ្ជាក់ជូនភ្ញៀវបរទេសថា ច្បាប់វិនិយោគនៅកម្ពុជាគឺមានភាពអនុគ្រោះខ្លាំងណាស់ គឺបានអនុញ្ញាតឲ្យអ្នកវិនិយោគបរទេសមកវិនិយោគ ១០០% នៅកម្ពុជាហើយក៏អនុញ្ញាតឲ្យប្រើប្រាស់រូបិយបណ្ណបរទេសសម្រាប់ការបើកប្រាក់ខែជូនកម្មករផងដែរ។
សម្តេចតេជោប្រមុខរាជរដ្ឋាភិបាលកម្ពុជា បានអញ្ជើញមានប្រសាសន៍យ៉ាងដូច្នេះ ក្នុងពេលអនុញ្ញាតឱ្យលោក រ៉េមី រីយូ(Rémy Rioux) អគ្គនាយកទីភ្នាក់ងារអភិវឌ្ឍន៍បារាំងចូលជួបសំដែងការគួរសមនិងពិភាក្សាការងារនៅវិមានសន្តិភាពនារសៀលថ្ងៃទី២១កុម្ភ:។
ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោនាយករដ្ឋមន្ត្រី បានបញ្ជាក់ប្រាប់ដល់ក្រុមអ្នកសារព័ត៌មានថា លោក Rémy បានគោរពជម្រាបជូនសម្ដេចតេជោថា ដំណើរទស្សនកិច្ចរបស់លោកនិងគណៈប្រតិភូមកកាន់ព្រះរាជាណាចក្រកម្ពុជានៅពេលនេះ គឺដើម្បីចូលរួមខួប៣០ឆ្នាំ នៃវត្តមានរបស់ភ្នាក់ងារអភិវឌ្ឍន៍បារាំងនៅកម្ពុជាហើយដែលភ្នាក់ងារអភិវឌ្ឍន៍បារាំងរយៈពេល៣០ឆ្នាំនេះបានវិនិយោគប្រមាណ១ពាន់លានអឺរ៉ូ។ ទី១. ទៅលើវិស័យវប្បធម៌ ការងារជួសជុលអង្គរវត្ត ជួសជុលផ្សារថ្មី វិស័យទឹកស្អាត វិស័យកសិកម្ម និងវិស័យថាមពល។ទី២.ដាក់ឲ្យដំណើរការការងារដូចបានសន្យាជានយោបាយនៅទីក្រុងប៉ារីសនិងទី៣.សុំការតម្រង់ទិសអំពីសម្ដេចតេជោថាតើចង់ឲ្យភ្នាក់ងារអភិវឌ្ឍន៍បារាំងបន្តធ្វើអ្វីខ្លះទៀតនៅកម្ពុជា។ ឆ្លៀតក្នុងឱកាសនោះដែរ លោក Rémy ក៏បានជម្រាបជូនសម្ដេចតេជោអំពីការបើកសាខាបច្ចេកទេសទៅកម្ពុជា និងបង្កើនជំនួយដល់កម្ពុជាថែមទៀតជាមួយនឹងការជួយកម្ពុជាលើបណ្ដាញអគ្គិសនីសម្រាប់អគ្គិសនីកកើតឡើងវិញ។
ជាការឆ្លើយតប សម្ដេចតេជោបានស្នើសុំឲ្យភ្នាក់ងារអភិវឌ្ឍន៍បារាំងបន្តជួយដល់កម្ពុជាលើចំណុចវិស័យអាទិភាពដែលបារាំងបាននឹងកំពុងជួយកម្ពុជាស្រាប់ នោះគឺការអភិវឌ្ឍន៍ធនធានមនុស្សការអភិវឌ្ឍវិស័យទឹកស្អាត ហេដ្ឋារចនាសម្ព័ន្ធ មានដូចជាផ្លូវនិងភ្លើង។ជាមួយគ្នានោះដែរ. សម្ដេចតេជោបានជម្រាបជូនលោករ៉េមី អំពីគោលនយោ បាយកសិកម្មរបស់កម្ពុជា ដែលក្នុងនោះ មានការជំរុញការកែច្នៃស្រូវសម្រាប់ការនាំចេញ ហើយពាក់ព័ន្ធនឹងចំណុចនេះ សម្ដេចបានជម្រាបជូនអំពីកង្វះខាតនូវម៉ាស៊ីនកិនស្រូវ ឃ្លាំងស្តុកស្រូវសម្រាប់ទិញកែច្នៃ និងនាំអង្ករចេញពីកម្ពុជា។សម្តេចបន្តថា គោលនយោបាយវិស័យកសិកម្មកម្ពុជាដែលកម្ពុជាចង់បានគឺឧស្សាហកម្មកែច្នៃសម្រាប់កែច្នៃវត្ថុធាតុដើមដែលកម្ពុជាមានស្រាប់និងឧស្សាហកម្មបច្ចេកវិទ្យា។សម្ដេចតេជោបានបន្ថែមថាច្បាប់វិនិយោគនៅកម្ពុជាគឺមានភាពអនុគ្រោះខ្លាំង គឺអនុញ្ញាតឲ្យអ្នកវិនិយោគបរទេសមកវិនិយោគ ១០០% នៅកម្ពុជាហើយក៏អនុញ្ញាតឲ្យប្រើប្រាស់រូបិយប័ណ្ណបរទេសសម្រាប់ការបើកប្រាក់ខែជូនកម្មករផងដែរ។ក្នុងន័យនេះ សម្ដេចបានលើកទឹកចិត្តឲ្យមានការវិនិយោគលើវិស័យកសិកម្មនិងឧស្សាហកម្មនេះផងដែរ។
ជាទីបញ្ចប់ លោករ៉េមីបានគោរពជម្រាបជូនសម្ដេចតេជោថា លោកបានកត់ត្រាទុកនូវរាល់អ្វីដែលសម្ដេចបានចង្អុលបង្ហាញហើយលោកនឹងធ្វើអន្តរាគមន៍លើបញ្ហាទាំងនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
