ភ្នំពេញ៖ សាខាកាកបាទក្រហមកម្ពុជារាជធានីភ្នំពេញ បានប្រារព្ធទិវាជាតិសុខភាពមាតា ទារក និងកុមារ ក្រោមប្រធានបទ «រួមគ្នាពង្រឹងសេវាសុខភាពបន្តពូជ សុខភាពមាតា ទារក កុមារ យុវវ័យ និងអាហារូបត្ថម្ភ ដើម្បីឈានទៅសម្រេចគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០»

នាព្រឹកទី២១ ខែកុម្ភៈ ឆ្នាំ២០២៣ នៅបរិវេណមណ្ឌលសុខភាពភ្នំពេញថ្មី ខណ្ឌសែនសុខ ដើម្បីអបអរទិវាជាតិសុខភាពមាតា ទារក និងកុមារ ២១ ខែកុម្ភៈ ។

នាឱកាសនោះ ក្នុងនាមឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ លោក ជិន ប៊ុនធឿន បានពាំនាំនូវការផ្តាំផ្ញើសាកសួរសុខទុក្ខពី សំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់​ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការ​អភិវឌ្ឍនៅកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាព​រួមអគ្គ​លេខាធិការ​អង្គការ​សហប្រជាជាតិ ​ដើម្បីសុខភាពស្រ្តី និងកុមារ ​ជូនដល់អង្គពិធីទាំងមូល ជាពិសេស​បងប្អូន​ស្ត្រី​មានផ្ទៃពោះ ស្ត្រីមានកូនតូច និងស្ត្រីក្នុងវ័យបន្តពូជទាំងអស់ ប្រកបដោយក្តីនឹករលឹក ។ ជាមួយគ្នានេះ ​លោកនាយកប្រតិបត្តិសាខា ក៏បានពាំនាំនូវការអំពាវនាវរបស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ក្នុងឱកាសទិវាជាតិសុខភាពមាតា ទារក និងកុមារ ២១កុម្ភៈ ដែលផ្ញើជូនបងប្អូនជនរួមជាតិដូចតទៅ៖

១. សូមស្រ្តីមានផ្ទៃពោះទាំងអស់៖

ទៅពិនិត្យសុខភាព និងពិគ្រោះយោបល់ជាមួយគ្រូពេទ្យជំនាញនៅមណ្ឌលសុខភាព ឬមន្ទីរពេទ្យឱ្យបានទៀងទាត់ចំនួន ៤ដង តាមពេលវេលាកំណត់ ទៅទទួលថ្នាំបង្ការជំងឺតេតាណូស និងទៅចាក់វ៉ាក់សាំងជំងឺកូវីដ-១៩ ទៅទទួលយកសេវាបង្ការ/ព្យាបាលទាំងអស់ ពិសេសការស្ម័គ្រចិត្តធ្វើតេស្តឈាមរកមេរោគអេដស៍ ស្វាយ រលាកថ្លើមប្រភេទបេ ដើម្បីទប់ស្កាត់ការចម្លងមេរោគពីម្តាយទៅកូន។

ទៅសម្រាលកូននៅមណ្ឌលសុខភាព ឬមន្ទីរពេទ្យមានគ្រូពេទ្យជំនាញ​ដែលទទួល​បានការ​បណ្តុះ​បណ្តាលត្រឹមត្រូវ។

ទៅពិនិត្យសុខភាពក្រោយពេលសម្រាលទាំងម្តាយ ទាំងកូន យកកូនទៅចាក់វ៉ាក់សាំង​បង្ការជំងឺ​១១មុខ ​តាមពេលវេលាកំណត់ ត្រូវយកចិត្តទុកដាក់ពិនិត្យតាមដានសុខភាព​និងការលូតលាស់​របស់កូន​ រហូតដល់កូនមានអាយុពីរឆ្នាំ។

បំបៅកូនដោយទឹកដោះម្តាយតែមួយមុខគត់ ​ចាប់ពីពេលកើតភ្លាមរហូតដល់ទារក មានអាយុ៦ខែ និង​ផ្តល់អាហារបន្ថែមគ្រប់មុខ គ្រប់ជីវជាតិ ​(បបរខាប់គ្រប់គ្រឿង) រួមជាមួយការបន្តបំបៅ​ទឹកដោះម្តាយ​រហូតដល់កុមារមានអាយុយ៉ាងតិច២ឆ្នាំ។

ប្រញាប់យកទារកទៅមន្ទីរពេទ្យភ្លាម នៅពេលឃើញសញ្ញាគ្រោះថ្នាក់ណាមួយ នៃជំងឺរលាក​ផ្លូវដង្ហើម ជំងឺរាក ឬជំងឺផ្សេងទៀត ​និងយកទារក/កុមារតូចទៅពិគ្រោះយោបល់ និងទទួល​ការព្យាបាលនៅមន្ទីរពេទ្យ ប្រសិនបើទារក/កុមារតូច មានរាងកាយស្គម​ ឬមិនឡើងទម្ងន់សោះ។

សូមជ្រើសរើសការពន្យារ​កំណើត ដើម្បីសុខភាពរបស់ម្តាយ និងទារក។

២. សូមយុវតី ឬស្រ្តីក្នុងវ័យបន្តពូជដែលមានអាយុ ១៥ ទៅ ៤៩ឆ្នាំ ដែលមានបញ្ហាសុខភាព​ទៅ​ពិគ្រោះយោបល់ ទទួលការថែទាំ​ ឬការព្យាបាលជំងឺនៅមណ្ឌលសុខភាព ឬមន្ទីរពេទ្យ ឬគ្លីនិក មានគ្រូពេទ្យជំនាញច្បាស់លាស់​ ដែលទទួលបានការបណ្តុះបណ្តាលត្រឹមត្រូវពីក្រសួងសុខាភិបាល ដើម្បីជៀសវាងគ្រោះថ្នាក់ និងពិការភាព។

៣. សូមថ្នាក់ដឹកនាំ ​មន្ត្រីរាជការ បុគ្គលិកសុខាភិបាល និងអ្នកផ្តល់សេវាទាំងអស់ចូលរួមគាំទ្រ​ការអនុវត្ត​គោលនយោបាយរបស់រាជរដ្ឋាភិបាលឱ្យមានប្រសិទ្ធភាពខ្ពស់។

៤. សូមគ្រប់ស្ថាប័នពាក់ព័ន្ធទាំងអស់ ទាំងជាតិ-អន្តរជាតិ ​បន្តវិនិយោគក្នុងការងារសុខភាពបន្តពូជ សុខភាពមាតា ទារក កុមារ យុវវ័យ និងអាហារូបត្ថម្ភ ពិសេសសូមជួយឧបត្ថម្ភគាំទ្រដល់​ការងារ​បណ្តុះបណ្តាលជំនាញ និងវិក្រឹតការដល់មន្ត្រី/បុគ្គលិកសុខាភិបាល​ រួមទាំងអាជ្ញាធរមូលដ្ឋាន អ្នកអប់រំ​ផ្សព្វផ្សាយ​នៅសហគមន៍ ​ឱ្យទទួលបានចំណេះដឹង និងជំនាញពិតប្រាកដ។

នៅក្នុងកម្មវិធីនេះ សាខាក៏បានផ្តល់ជូនស្ត្រីមានផ្ទៃពោះ ស្ត្រីមានកូនតូច និងស្ត្រីក្នុងវ័យបន្តពូជ ចំនួន៣១នាក់ ​ដោយក្នុង១នាក់ៗ​ទទួលបាន៖ ឃីត១កញ្ចប់(មុង១ ភួយ១ សារុង១ កន្សែង​ពោះគោធំ១ កន្សែងជូតទារក១ ក្រម៉ា១ ​ សាប៊ូ២ដុំ) និងថវិកាចំនួន៥ម៉ឺនរៀល ៕អត្ថបទ៖ មុនី និងសីហ