ភ្នំពេញ៖ ក្នុងឆ្នាំ២០២២កន្លងទៅ អង្គភាពច្រកចេញចូលតែមួយនៃរាជធានី-ខេត្ត ទាំង២៥ បានផ្តល់​សេវារដ្ឋបាលបានចំនួន ជិត៧០ម៉ឺនសេវា និងទទួលបានចំណូលសរុបចំនួនជាង ២៨លាន ២សែនដុល្លារ។

ក្នុងពិធីបើកសន្និបាតត្រួតពិនិត្យលទ្ធផលការងារ ឆ្នាំ២០២២ ​និងលើកទិសដៅការងារ ឆ្នាំ២០២៣ នាថ្ងៃទី២២​ ខែកុម្ភៈ ឆ្នាំ២០២៣ នាយឧត្តមសេនីយ៍ ប៉ោ ភក្តិ អគ្គលេខាធិការ នៃក្រសួងមហាផ្ទៃ បាន​ថ្លែងថា ដើម្បីឆ្លើយតបទៅនឹងតម្រូវការ ​នៃការផ្តល់សេវារដ្ឋបាលជូនប្រជាពលរដ្ឋឱ្យកាន់តែ​ប្រសើរ​ឡើង ក្រសួងមហាផ្ទៃ ​បានសម្របសម្រួល​ និងដាក់ឱ្យអនុវត្តនូវសេចក្ដីណែនាំ ​ស្តីពីបែបបទ និង​នីតិវិធី​នៃការផ្តល់សេវារដ្ឋបាលតាមយន្តការច្រកចេញចូលតែមួយ ​នៅរដ្ឋបាលឃុំ សង្កាត់ បន្ថែមទៀត។

នាយឧត្តមសេនីយ៍ បន្តថា អង្គភាពច្រកចេញចូលតែមួយរាជធានី ​ខេត្ត ​ផ្តល់សេវា​រដ្ឋបាល​បានចំនួន ៦៩៥ ២០៥សេវា​ និងទទួលបានចំណូលសរុបចំនួនជាង ​១១២ពាន់លានរៀល សមមូល​ប្រមាណ​ជាង ​២៨លានដុល្លារ ។

នាយឧត្តមសេនីយ៍ ប៉ោ ភក្តិ ​បានបន្ថែមថា ​ដោយឡែក​ ការិយាល័យច្រកចេញចូល​តែមួយក្រុង ស្រុក ​ខណ្ឌ ផ្ដល់សេវារដ្ឋបាល ​បានចំនួនជាង ​១លាន ៥សែនសេវា ​និងទទួល​បានចំណូល​សរុប​ចំនួនជាង ១១ពាន់លានរៀល ​សមមូល​ប្រមាណជាង​ ២លាន ៧៥ម៉ឺនដុល្លារ ។

ឯកឧត្តម បានបញ្ជាក់ថា ការិយាល័យប្រជាពលរដ្ឋនៅរាជធានី-ខេត្ត​ ទទួលបានបណ្តឹង និងព័ត៌មាន​ផ្សេងៗចំនួន ១ ២៦៧ ករណី ក្នុងនោះ បណ្ដឹងក្នុងសមត្ថកិច្ច ៧៦៧ករណី (បញ្ចប់ការដោះស្រាយ​បាន ៧១២ករណី) បណ្តឹងក្រៅសមត្ថកិច្ច ២០២ករណី និងព័ត៌មានផ្សេងៗ ២៩៨ករណី ។ ដោយឡែក​ ការិយាល័យប្រជាពលរដ្ឋសម្រាប់ក្រុង ស្រុក ខណ្ឌ ​ទទួលបានបណ្តឹង និងព័ត៌មាន​ផ្សេងៗចំនួន ១៣.៩៩៣ករណី ក្នុងនោះបណ្តឹងក្នុងសមត្ថកិច្ច​ ៣៣៨ករណី (បញ្ចប់ការដោះ​ស្រាយបាន ៣២៧ករណី) បណ្ដឹង ក្រៅសមត្ថកិច្ច ១៤៨ករណី និងព័ត៌មានផ្សេងៗ ១៣.៥០៧ករណី៕ អត្ថបទ បាន សុខរិទ្ធិ