ភ្នំពេញ៖ ស្របតាមអនុសាសន៍ណែនាំរបស់សម្តេចតេជោ នាយករដ្ឋមន្ត្រី បច្ចុប្បន្នក្រសួងការងារ និងបណ្តុះបណ្តាលវិជ្ជាជីវៈ បានត្រៀមរៀបចំផែនការ​បណ្តុះបណ្តាល​ជំនាញវិជ្ជាជីវៈដល់​យុវជន​នៅគ្រួសារក្រីក្រ និងងាយរងគ្រោះទូទាំងប្រទេសចំនួន ​១លាន ៥សែននាក់ ដោយរដ្ឋធានា​ផ្តល់​ប្រាក់​ឧបត្ថម្ភចាប់ពីឆ្នាំ២០២៣នេះតទៅឱ្យមានប្រសិទ្ធភាពខ្ពស់។

ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ នៅក្នុង​អង្គសន្និបាត​បូកសរុបការងារ ​និងលើកទិសដៅការងារសម្រាប់ឆ្នាំ២០២៣​ កាលពីព្រឹកថ្ងៃទី២២ ខែកុម្ភៈនេះ បានបញ្ជាក់ពីការខិតខំអនុវត្តបានយ៉ាងល្អតាមផែនការ​យុទ្ធសាស្ត្រ​អភិវឌ្ឍជាតិ​ដ៏​ជាក់លាក់​របស់រាជរដ្ឋាភិបាល ​ដើម្បីធ្វើការអភិវឌ្ឍមូលធន ​មនុស្សដែលជាធនធាន ជន្ទល់​គាំទ្រ​ឱ្យការរីកចំរើននៃសង្គមសេដ្ឋកិច្ចជាតិក្នុងរយៈពេលខ្លី មធ្យម និងវែង ដោយជំរុញឱ្យ​ប្រជាពលរដ្ឋ​មានការងារសមរម្យ ​និងកម្រិតជីវភាពកាន់តែប្រសើរឡើង, ការលើកកម្ពស់សេចក្តីថ្លៃថ្នូរ​របស់​ប្រជាពលរដ្ឋ, បង្កើនបាននូវកម្លាំងពលកម្ម ​ឬធនធាន​មនុស្សកម្ពុជាប្រកបដោយចំណេះដឹង សមត្ថភាព ​ជំនាញឥរិយាបថការងារ​ ផលិតភាពខ្ពស់ ​និងមានលក្ខណៈប្រកួតប្រជែង​សម្រាប់​ការងារពេញមួយជីវិត និង ធានាថា “ប្រជាពលរដ្ឋម្នាក់មានជំនាញមួយយ៉ាងតិចប្រចំាជីវិត”។

ឯកឧត្តមរដ្ឋមន្រ្តី ​បានលើកឡើងទៀតថា ​ស្របជាមួយការវិវត្តរីកចម្រើន​នៃសេដ្ឋកិច្ចជាតិ ក្រសួង​បាន​ និងកំពុងបន្តយកចិត្តទុកដាក់ខ្ពស់ក្នុងការអភិវឌ្ឍ​ទីផ្សារការងារ​ដែលមាន​ភាពធន់ និងមានប្រាក់​ចំណូល​ខ្ពស់សម្រាប់ប្រជាពលរដ្ឋ, មានលក្ខខណ្ឌការងារល្អប្រសើរ ដោយផ្តោតលើការលើកកម្ពស់​សុខុមាលភាព​កម្មករនិយោជិតទាំងក្នុង​ និងក្រៅប្រព័ន្ធ សំដៅលើកកម្ពស់ជីវភាពរស់នៅរបស់​ប្រជាពលរដ្ឋ ​និងលើកកម្ពស់សកម្មភាពធុរកិច្ចប្រកបដោយភាពរស់រវើក និងការវិនិយោគប្រកប​ដោយចីរភាព​ ដើម្បីឆ្លើយតបទៅនឹងការអភិវឌ្ឍសេដ្ឋកិច្ច-សង្គម​ និងទីផ្សារការងារ តាមរយៈការធ្វើ​បច្ចុប្បន្នភាពច្បាប់និងបទប្បញ្ញត្តិពាក់ព័ន្ធ រួមមាន ​ការធ្វើវិសោធនកម្មច្បាប់ស្តីពីការងារ និងច្បាប់​ស្តីពីសហជីព ​និងការអនុម័តច្បាប់ស្តីពីប្រាក់ឈ្នួលអប្បបរមា​ និងច្បាប់ស្តីពីរបបសន្តិសុខសង្គម៕អត្ថបទ៖ឈិត បូរ៉ាវី