ភ្នំពេញ ៖ ឯកឧត្តមនាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន ក្រសួងមហាផ្ទៃ បានឱ្យដឹងថា ក្នុងឆ្នាំ២០២២ ក្រសួងមហាផ្ទៃ បានផ្តល់អត្តសញ្ញាណបណ្ណសញ្ជាតិខ្មែរ ជូនប្រជាពលរដ្ឋ​អាយុចាប់ពី១៥ឆ្នាំ​ឡើង​បាន​ចំនួន ៦៥២.៨៤៣នាក់។ ឯកឧត្តមនាយឧត្តមសេនីយ៍ បានលើកឡើងបែប​នេះក្នុងរបាយការណ៍​ក្នុងពិធី​បើកសន្និបាត​ត្រួតពិនិត្យលទ្ធផលការងារប្រចាំឆ្នាំ២០២២ និងលើកទិសដៅកា រងារឆ្នាំ២០២៣ របស់ក្រសួងមហាផ្ទៃ និងលទ្ធផល​ការងារប្រឡងប្រណាំងអនុវត្តគោលនយោបាយ«ភូ មិ-ឃុំ-សង្កាត់ មានសុវត្ថិភាព» នាថ្ងៃទី២២ ខែកុម្ភៈ ឆ្នាំ២០២២។

ឯកឧត្ដមបន្តថា គិតត្រឹមខែធ្នូ ឆ្នាំ២០២២ ការផ្តល់អត្តសញ្ញាណបណ្ណសញ្ជាតិខ្មែរទុតិយតាសម្រេចបានចំនួន ៤៤៩.៣៩០ នាក់ នៅសល់ ១.២៧៧.៧០៤ នាក់ ដែលត្រូវបន្តផ្ដល់ជូនដល់ប្រជាពលរដ្ឋ។ ក្រសួងក៏បានផ្តល់​លិខិតឆ្លង​ដែន​ជូនប្រជាពលរដ្ឋបាន ២១២.៨៣៥ ក្បាល និងផ្តល់លិខិតធ្វើដំណើរដល់ពលករកម្ពុជា​ធ្វើការ​នៅបរទេស​បាន ៩២.០០៣៩ ក្បាល។

ឯកឧត្តមបន្ថែមថា សម្រាប់ឆ្នាំ២០២៣ នេះ ក្រសួងនឹងបន្ដខិតខំជំរុញបញ្ចប់ការរៀបចំលិខិតបទដ្ឋាន​គតិយុត្តថ្មីៗ​ពិសេសសេចក្តីព្រាងច្បាប់ស្តីពី អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ព្រម​ទាំងពិនិត្យ​ឡើងវិញនូវច្បាប់ និងលិខិតបទដ្ឋានគតិយុត្តនានា ដែលពាក់ព័ន្ធការងារអត្តសញ្ញា ណកម្ម ដើម្បីធ្វើ​វិសោធនកម្ម​ឱ្យស្របតាមទស្សនាទាននានា ដែលមានកំណត់ក្នុងផែនការយុទ្ធសាស្ត្រជាតិស្តីពីអត្តសញ្ញាណកម្ម(២០១៧-២០២៦)។

ក្រសួងនឹងបន្តជំរុញអភិវឌ្ឍសមត្ថភាពមន្ត្រីជំនាញទាំងនៅថ្នាក់ជាតិ និងថ្នាក់ក្រោមជាតិ ដើម្បីពង្រឹងសមត្ថភាព និងការយល់ដឹងពីគោលការណ៍ និងលិខិតបទដ្ឋាននានាពាក់ព័ន្ធការងារអត្តសញ្ញាណកម្ម ព្រមទាំងបន្តតាមដាន ត្រួតពិនិត្យ និងជំរុញការងារផ្តល់អត្តសញ្ញាណបណ្ណសញ្ជាតិខ្មែរ នៅតាមបណ្តា រាជធានីខេត្ត ជាពិសេសការ​ផ្តល់អត្តសញ្ញាណបណ្ណដែលផុតសុពលភាព៕ ដោយ៖ គង់ ឌិន​