ភ្នំពេញ៖ អាជ្ញាធរមីន និងក្រុមហ៊ុនមេធាវី លឹម អាន & សាអ៊ឹម បានចុះអនុស្សរណៈនៃការយោគយល់គ្នា ស្តីពីភាពជាដៃគូ និងកិច្ចសហប្រតិបត្តិការផ្នែកច្បាប់សម្រាប់ការងារសកម្មភាពមីននៅកម្ពុជា។

នៅថ្ងៃទី២២ ខែកុម្ភៈ ឆ្នាំ២០២៣ នៅទីស្នាក់ការអាជ្ញាធរមីន ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃ​ការយោគយល់គ្នារវាងអាជ្ញាធរមីន​ និងក្រុមហ៊ុនមេធាវី លឹម អាន & សាអ៊ឹម ស្តីពីភាពជាដៃគូ ជាមួយវិស័យឯកជន សម្រាប់ការងារសកម្មភាពមីននៅកម្ពុជា។

លោក អាន សុវឌ្ឍនា តំណាងក្រុមហ៊ុនក្រុមហ៊ុនមេធាវី លឹម អាន & សាអ៊ឹម បានវាយតម្លៃខ្ពស់​ចំពោះកិច្ច​ខិតខំប្រឹងប្រែងរបស់អាជ្ញាធរមីន ក្នុងការងារគ្រប់គ្រង និងសម្របសម្រួលសកម្មភាពមីន​នៅកម្ពុជា ព្រមទាំងទទួលបាននូវសមិទ្ធផលយ៉ាងច្រើនក្នុងកាងារបោសសម្អាតមីនកន្លងមក ជាពិសេសបានប្រកាសភូមិ ឃុំ ស្រុក និងខេត្តអស់មីន ជាបន្តបន្ទាប់។

ក្រុមហ៊ុនមេធាវី លឹម អាន & សាអ៊ឹម នឹងចូលរួមផ្តល់ការពិគ្រោះយោបល់ផ្នែកច្បាប់ និង​ចូលរួមផ្សព្វផ្សាយអំពីសមិទ្ធផលសំខាន់ៗរបស់អាជ្ញាធរមីន ​ទៅគ្រប់វិស័យឯកជន និងក្រុមមេធាវី​នៅកម្ពុជា ព្រមទាំងល ចូលរួមទៅលើ​ការបណ្តុះបណ្តាលផ្នែកច្បាប់លើប្រធានបទខ្លីៗ ជូនដល់មន្រ្តីបុគ្គលិក​របស់អាជ្ញាធរមីន ផងដែរ។

ឯកឧត្តម ទេសរដ្ឋមន្រ្តី លី ធុជ បានថ្លែងអំណរគុណ ក្រុមហ៊ុនមេធាវី លឹម អាន & សាអ៊ឹម ចំពោះការចូលរួមប្រកបដោយទឹកចិត្ត​សប្បុរស ​និងលើកកម្ពស់សកម្មភាពមីន​នៅកម្ពុជា ដែល​ជាការងារ​បោសសម្អាតមីន ​គឺជាការងារមួយមានហានិភ័យខ្ពស់​ និងប្រឈមគ្រោះថ្នាក់គ្រប់​ពេលវេលា។ ការចងមេត្រីភាពរវាងអាជ្ញាធរមីន និងក្រុមហ៊ុនមេធាវី លឹម អាន & សាអ៊ឹម នេះ ពិតជា​មានសារៈសំខាន់ណាស់​ និងត្រូវការធាតុចូលបន្ថែមផ្នែកច្បាប់​សម្រាប់សកម្មភាពមីន​នៅកម្ពុជា ក្នុងករណីចាំបាច់ណាមួយ។

ឯកឧត្តមទេសរដ្ឋមន្រ្តី បន្តទៀតថា ​ការចូលរួមដោយទឹកចិត្ត ​អត់មានតួលេខកំណត់ទេ គឺជាការចែក​រំលែក​សេចក្តីស្រឡាញ់ជូនអ្នកដទៃ ​ដែលកំពុងរស់នៅក្នុងតំបន់រងផលប៉ះពាល់ដោយសារគ្រាប់មីន និងសំណល់ជាតិផ្ទុះពីសង្រ្គាម ​ហើយអ្វីដែលយើងកំពុងធ្វើ គឺសុទ្ធតែដើម្បីប្រយោជន៍​ជាតិ​មាតុភូមិរបស់យើង ផងដែរ។ ក្រោមម្លប់សន្តិភាព ​ប្រជាពលរដ្ឋកម្ពុជា ​ទទួលបានអនាគតល្អ និង​មានការរីកចំរើនទៅមុខជានិច្ច ហើយឱកាសរបស់យើងទាំងអស់គ្នា គ្មានដែនកំណត់ឡើយ៕ អត្ថបទ៖ដាវណ្ណ