ភ្នំពេញ៖ តាមការណែនាំដ៏ខ្ពង់ខ្ពស់ពីឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធ នឹងជំងឺអេដស៍ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹង​ជំងឺ​អេដស៍ បានដឹកនាំកិច្ចប្រជុំក្រុមប្រឹក្សាបច្ចេកទេសលើកទី២ ឆ្នាំ២០២៣ ដោយមានការចូលពី​សមាជិក សមាជិកា នៃក្រុមប្រឹក្សាបច្ចេកទេសអន្តរក្រសួង ស្ថាប័ន និងរាជធានី ខេត្ត, នាថ្ងៃទី២៣ ខែកុម្ភៈ ឆ្នាំ២០២៣។

ឯកឧត្តមបណ្ឌិតអគ្គលេខាធិការ បានមានប្រសាសន៍ជូនអង្គប្រជុំឱ្យបានជ្រាបថា កិច្ចប្រជុំថ្ងៃនេះ​ផ្តោត​សំខាន់លើ ប្រធានបទនៃការពិភាក្សានេះ គឺក្នុងគោលបំណងពិនិត្យ​នូវលទ្ធផលដែលទទួល​បាន រួមនឹងឧបសគ្គនានាដែលអ្នកអនុវត្តផ្ទាល់​បានជួបប្រទះ និងដាក់ចេញវិធានការអាទិភាព​សម្រាប់ឆ្លើយតបឱ្យកាន់តែមានប្រសិទ្ធភាព ឆ្ពោះទៅសម្រេចគោលដៅ៩៥ទី១ ដែលពេលនេះ ប្រទេសកម្ពុជាទើបសម្រេចបានតាមរយៈនៃការខិតខំប្រឹងប្រែង និងយកចិត្តទុក​ដាក់​ខ្ពស់របស់​រដ្ឋាភិបាល ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រទេសកម្ពុជាទទួលបានជោគជ័យក្នុងការឆ្លើយតបនឹង​មេរោគអេដស៍ ដែលអត្រាផ្ទុកមេរោគអេដស៍បានធ្លាក់ចុះជាបន្តបន្ទាប់ពីមួយឆ្នាំទៅមួយឆ្នាំ។ តាមការប៉ាន់ប្រមាណអ្នកផ្ទុកមេរោគអេដស៍នៅប្រទេសកម្ពុជាឆ្នាំ២០២១ មានចំនួន ៧៤,០០០នាក់ ដោយមានអត្រាវ៉ាឡង ០,៦% ដោយសម្រេចបាននូវគោលដៅជាតិចំនួន ២ ក្នុងចំណោមគោលដៅ​ចំនួន ៣ នៃគោលដៅជាតិ ៩៥. ៩៥.៩៥ នាឆ្នាំ២០២៥។ ករណីឆ្លងថ្មីមានការធ្លាក់ចុះពីមួយឆ្នាំទៅមួយឆ្នាំ ដោយធ្លាក់ចុះនៅត្រឹមតែ ១,១០០ ក្នុងមួយឆ្នាំ ប៉ុន្តែប្រមាណជា ៧៧% បណ្តាលមកពីក្រុមប្រជាជនគន្លឹះ។ នៅប្រទេសកម្ពុជាមានអត្រា​ផ្ទុក​មេរោគអេដស៍ ៤,៩% ក្នុងចំណោមស្រ្តីបម្រើការនៅសេវាកម្សាន្តសប្បាយ (ឆ្នាំ២០២២) ៤,០% ក្នុងចំណោមក្រុមបុរសរួមភេទនឹងបុរស (ឆ្នាំ២០១៩) ៩,៦% ក្នុងចំណោមក្រុមបំប្លែងភេទ និង ៥,៧% ក្នុងចំណោមអ្នកប្រើប្រាស់គ្រឿងញៀន។

ឯកឧត្តមបណ្ឌិត ឈឹម ឃិនដារ៉េត បានបញ្ជាក់ទៀតថា តាមគោលដៅជាតិនឹងបញ្ចុះករណីឆ្លងថ្មី ឱ្យមកនៅត្រឹម ក្រោមមួយនាក់ក្នុងមួយថ្ងៃ និងឆ្លើយតបនឹងការប្រឈមមុខនៃក្រុមប្រជាជនគន្លឹះ អាជ្ញាធរជាតិប្រយុទ្ធនឹងជំងឺអេដស៍បានដាក់នូវយុទ្ធសាស្រ្តជាតិជាបន្តបន្ទាប់ ជាពិសេសយុទ្ធ​សាស្រ្តជាតិ​ជាពហុវិស័យ ឆ្លើយតបនឹងមេរោគអេដស៍ និងជំងឺអេដស៍លើកទី៥ ក៏ដូចជាយុទ្ធសាស្រ្ត​ជំរុញខ្លាំងក្លាការងារបង្ការ ថែទាំ និងព្យាបាលបន្តដល់ក្រុមប្រឈមមុខខ្ពស់នឹងការឆ្លងមេរោគអេដស៍ ។

នៅក្នុងកិច្ចប្រជុំនេះផងដែរ លោកស្រីវេជ្ជបណ្ឌិត ទេព សំណាង និងលោកស្រី ឡាញ់ ចរិយា សមាជិកក្រុមប្រឹក្សាបច្ចេកទេស មកពីមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ ក្រសួងសុខាភិបាល បានធ្វើបទបង្ហាញពីយុទ្ធវិធីជំរុញខ្លាំងក្លាការងារបង្ការ ថែទាំ និងព្យាបាលបន្តដល់ក្រុម ប្រមឈមុខខ្ពស់នឹងការឆ្លងមេរោគអេដស៍ នៅព្រះរាជាណាចក្រកម្ពុជា ក្នុងការគ្រប់គ្រងក្រុមប្រជាជនគន្លឹះ ។

លោកស្រីទាំងពីរនាក់ ក៏បានបង្ហាញពីបញ្ហាប្រឈមនានា និងដំណោះស្រាយដែលនឹងត្រូវធ្វើចំពោះ​បញ្ហាទាំងនោះ សម្រាប់ជូនអង្គប្រជុំពិនិត្យ ពិភាក្សា និងសម្រេចកំណត់នូវយុទ្ធវិធី និងសកម្មភាព​សម្រាប់ការឆ្លើយតប៕អត្ថបទ រដ្ឋា