មីយ៉ាន់ម៉ា៖ ក្រុមមេធាវីរបស់លោកស្រីបាននិយាយថា កាលពីថ្ងៃចន្ទរដ្ឋាភិបាលយោធាសហភាពមីយ៉ាន់ម៉ា បានលើកពេលម្តងទៀតក្នុងការកាត់ទោសករណីបណ្ដឹងនៅតុលាការ របស់មេដឹកនាំទម្លាក់ចេញពីអំណាចលោកស្រី អ៊ុងសាន ស៊ូជី ស្របពេលដែលពួកគេសុំការអនុញ្ញាតទៅសួរសុខទុក្ខលោកស្រី រយៈពេល ១២សប្ដាហ៍ក្រោយការឃុំខ្លួនរបស់លោកស្រី។
សហភាពមីយ៉ាន់ម៉ាស្ថិតនៅក្នុងស្ថានភាពច្របូកច្របល់ ចាប់តាំងពីយោធាទម្លាក់អំណាចម្ចាស់ជ័យលាភីណូបែលសន្តិភាពរូបនេះ ដោយការធ្វើរដ្ឋប្រហារកាលពីថ្ងៃទី០១ ខែកុម្ភៈកន្លងទៅ ក្រោយឆ្លងកាត់របបប្រជាធិបតេយ្យមួយរយៈពេលខ្លីរួចមកនោះ។ ប្រជាពលរដ្ឋយ៉ាងច្រើនបាននាំគ្នាដង្ហែក្បួនតវ៉ានៅតាមដងផ្លូវ ហើយកងកម្លាំងសន្តិសុខបានប្រើប្រាស់កម្លាំងបង្ក្រាបយ៉ាងចាស់ដៃ ដើម្បីបំបែកក្រុមបះបោរទ្រង់ទ្រាយធំទាំងនេះ។ ស្របពេលដែលលោកស្រី ស៊ូជី ស្ថិតក្រោមការបង្ខាំងក្នុងផ្ទះ យោធាបានចោទប្រកាន់លោកស្រីចំនួន ៦ករណីដែលរួមទាំងការបង្កចលាចល និងការនាំចូលវិទ្យុទាក់ទងខុសច្បាប់។
លោក មីន មីនស៊ូ ជាមេធាវីរបស់លោកស្រីបាននិយាយកាលពីថ្ងៃចន្ទថា ការកាត់ទោសលោកស្រីត្រូវបានពន្យាពេលជាថ្មីម្តងទៀត ក្រោយសវនាការរួច។ លោក មីនសូ បាននិយាយថា រយៈពេល ១២សប្តាហ៍ចាប់តាំងពីលោកស្រី អ៊ុងសាន ស៊ូជី ត្រូវបានបង្ខាំងខ្លួនក្នុងផ្ទះ ពួកគេនៅមិនទាន់ទទួលបានការអនុញ្ញាតឲ្យជួបលោកស្រីដោយផ្ទាល់នោះទេ ដែលនេះគឺជាឧបសគ្គមួយក្នុងចំណោមឧបសគ្គជាច្រើនទៀត ដែលក្រុមមេធាវីរបស់លោកស្រីកំពុងប្រឈម៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
