ភ្នំពេញ៖ នៅថ្ងៃទី២៣ ខែកុម្ភៈនេះ ក្រុមការងារសហភាពសហព័ន្ធយុវជនកម្ពុជា បានបន្តធ្វើការ​សម្ភាសន៍​ជ្រើសរើសយុវជន ចូលបំរើការងារស្ម័គ្រចិត្ត ព្រឹត្តិការណ៍ប្រកួតកីឡាSEA GAMES និង PARA GAMES ឆ្នាំ២០២៣ ជាមួយនឹងបេក្ខជនបេក្ខនារី ជាយុវជន បានចុះឈ្មោះ​សម្ភាសន៍​កើនរហូតដល់ជាង៧២០០នាក់ គិតត្រឹមល្ងាចថ្ងៃទី២២ ខែកុម្ភៈម្សិលមិញ។

តាមក្រុមយុវជនអញ្ជើញចូលរួមសំភាសន៍នៅថ្ងៃនេះ បានប្រាប់BTV ថា បន្ទាប់ពីមានក្រុមការងារ​សហភាពសហព័ន្ធយុវជនកម្ពុជាបានទូរស័ព្ទហៅមកធ្វើបទ​សម្ភាសន៍ ពួកគេទាំងអស់គ្នា​មានការ​សប្បាយរីករាយណាស់​ ហើយក្រោយ​សម្ភាសន៍​រួច​ រំពឹងថា នឹងទទួលបានការងារ​ជាអ្នកស្ម័គ្រ​ចិត្តបំរើការងារនៅក្នុងព្រឹត្តិការណ៍ SEA GAMES ​និងPARA GAMES ២០២៣ ដែលកម្ពុជាធ្វើជាម្ចាស់ផ្ទះ។

លោកស្រី គីម សំណាង តំណាងក្រុមការងារសហភាពសហព័ន្ធយុវជនកម្ពុជា បានឲ្យដឹងថា ព្រឹត្តិការណ៍កីឡាSEA GAMES និងPARA Games២០២៣ មាន​តម្រូវការជ្រើសរើស​យុវជន​ស្ម័គ្រចិត្តចូល​បម្រើការចំនួន៧០០០នាក់ ហើយគិតត្រឹមថ្ងៃទី២២ ខែកុម្ភៈ ឆ្នាំ២០២៣ម្សិលមិញ មានក្រុមយុវជនក្នុងប្រទេស និងភ្ញៀវបរទេស បានចុះឈ្មោះ​សម្ភាសន៍​ចូលបំរើការងារស្ម័គ្រចិត្ត មាន​ប្រមាណជាង ៧២០០នាក់ ក្នុងនោះមានភ្ញៀវបរទេសចំនួន១២៨នាក់ យុវជនមានពិការភាពចំនួន ៤២រូប។

លោកស្រី គីម សំណាង ថ្លែងថា មកដល់ពេលនេះ ​ក្រុមការងារសហភាពសហព័ន្ធយុវជនកម្ពុជា បាន​ធ្វើ​សម្ភាសន៍​ជ្រើសរើសអ្នកស្ម័គ្រចិត្តបានប្រមាណជិត ៣៧០០នាក់ ខណៈការចុះឈ្មោះ​នឹងត្រូវបិទនៅថ្ងៃទី១ ខែមីនា ​និងបិទការទទួលសំភាសន៍នៅថ្ងៃទី៥ ខែមីនា ឆ្នាំ២០២៣។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ឆ្នាំ២០២៣ ថ្លែងថា ព្រឹត្តិការណ៍កីឡាSEA GAMES និងPARA Games2023 កម្ពុជាបានរៀបចំប្រកួតចំនួន៣៨ប្រភេទកីឡា មានវិញ្ញាសាប្រកួតជាង ៦០០វិញ្ញាសារ និង​មានតម្រូវការភាគីពាក់ព័ន្ធរាប់ម៉ឺននាក់ ចូលរួមធ្វើការដើម្បីធនាការធ្វើបដិសណ្ឋារកិច្ចល្អ និងមានភាពទាក់ទាញ៕ អត្ថបទ៖ ស៊ុម សុខជា