ភ្នំពេញ៖ យុវជនមានពិការភាព ដែលធ្លាប់តែជាកសិករធ្វើស្រែ និងជាសិស្សធម្មតា បានប្រែក្លាយទៅជាកីឡាករហែលទឹកអាជីព និងជាម្ចាស់មេដាយមាស ប្រាក់ សំរឹទ្ធ ក្នុងការចេញទៅប្រកួតក្រៅប្រទេសកន្លងមកនេះ។

បច្ចុប្បន្នយុវជនទាំងពីររូប កំពុង​សម្រុក​ហ្វឹកហាត់ ក្នុងគោលដៅដណ្ដើម​យកមេដាយ​មាស​ក្នុង​ព្រឹត្តិការណ៍​​អាស៊ានប៉ារ៉ាហ្គេមផងដែរ។

យុវជន យ៉ាង វណ្ណៈ និងយុវជន យិន មួយ ជាជនមានពិការភាព ​ដោយ វណ្ណៈ មានបញ្ហាលើជើង រីឯ យិន មួយ គឺពិការដៃម្ខាង។ យុវជន យ៉ាង វណ្ណៈ អតីតកាលជាអ្នកធ្វើស្រែមកពីខេត្តកំពត រីឯក យិន មួយ ជាយុវជនផ្លាស់មកពីខេត្តត្បូងឃ្មុំ ដើម្បីសិក្សានៅរាជធានីភ្នំពេញ។

បច្ចុប្បន្នពួកគេទាំងពីរនាក់ បានប្រែក្លាយជីវិតដោយក្លាយជាកីឡាករជម្រើសជាតិ ផ្នែកពិការភាព ហើយក៏ធ្លាប់ចេញទៅប្រកួតនៅក្រៅប្រទេស ទទួលបានមេដាយមាស ប្រាក់ និងសំរឹទ្ធជាច្រើនគ្រឿង។

បច្ចុប្បន្នពួកគេរួមទាំងសមាជិកជាអត្តពលិកមានពិការភាពផ្សេងទៀត សម្រុកហ្វឹកហាត់ជាខ្លាំង​រៀងរាល់ថ្ងៃ ចន្ទដល់ព្រឹកថ្ងៃសៅរ៍។ ការហ្វឹកហាត់របស់ពួកគេទាំងពីរ គឺចាប់ផ្ដើមតាំងពីត្រឡប់​មកពីប្រកួតក្នុងប្រទេស​ ឥណ្ឌូនេស៊ី និងហ្វឹកហាត់កាន់តែខ្លាំងក្លាក្នុងពេល​​បច្ចុប្បន្ន។ ក្នុងនាមជាម្ចាស់មេដាយប្រាក់ និងសំរឹទ្ធក្នុង ការប្រកួតហែលទឹក ក្នុងព្រឹត្តិការណ៍​អាស៊ានប៉ារ៉ាហ្គេម កាលពីឆ្នាំមុន ពួកគេបង្ហាញនូវក្ដីសង្ឃឹម និងប្ដេជ្ញាខ្ពស់ដណ្ដើមយកមេដាយមាស ជូនជាតិកម្ពុជា​ឱ្យទាល់តែបាន ​សម្រាប់ការធ្វើជាម្ចាស់ផ្ទះក្នុងឆ្នាំនេះ។

ក្នុងនាមជាជនមានពិការភាព​ ពួកគេក៏លើកទឹកចិត្តឱ្យជនមានពិការភាពផ្សេងទៀត ត្រូវតែព្យាយាម​មិន​ត្រូវ​អស់សង្ឃឹម បន្ទោស​លើ​ព្រហ្មលិខិតនោះទេ។ ពួកគេពិការតែកាយ​សម្បទា ពុំមែនជា​ឧបសគ្គ​រាំងស្ទះ​​ក្នុងការ​សម្រេចជោគជ័យអ្វីមួយនោះទេ។ព្រឹត្តិការណ៍ អាស៊ានប៉ារ៉ាហ្គេម ​នឹងរៀបចំឡើងក្រោយ ព្រឹត្តិការណ៍ស៊ីហ្គេមបានបិទបញ្ចប់។

ចំពោះប្រភេទកីឡា គឺមានចំនួន ១៣ប្រភេទ ក្នុងនោះរួមមាន​ បាល់បោះជនពិការភ្នែក អត្តពលកម្មជនពិការ វាយសីជនពិការ បាល់ទាត់ចលករខួរក្បាល ប៊ូស្យា កីឡាអុកជនពិការ យូដូជនពិការ លើកទម្ងន់ជនពិការ ​បាល់ទះអង្គុយ ហែលទឹកជនពិការ វាយកូនសីលើតុជនពិការ បាល់ទះរទេះ និងបាល់ទាត់ជនពិការភ្នែក។

ក្នុងចំណាមប្រភេទកីឡាទាំង ​១៣ប្រភេទនេះ​ កីឡាហែលទឹក ជាប្រភេទកីឡាមួយដែលកម្ពុជា មានសក្ដានុពលខ្ពស់ ដោយកន្លងទៅតែងទទួលបានមេដាយ ជូនជាតិកម្ពុជា៕ អត្ថបទ៖ គឹមហុក