ភ្នំពេញ ៖ ឯកឧត្ដមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានស្នើដល់សាលាអន្តរជាតិសិង្ហបុរី-កម្ពុជា ដែលមានប្រព័ន្ធអប់រំពីសិង្ហបុរី ពិនិត្យមើលលទ្ធភាពដើម្បីធ្វើការអប់រំបណ្ដុះបណ្ដាលបច្ចេកទេសនិងវិជ្ជាជីវៈ ជាវគ្គខ្លីៗដល់យុវជនកម្ពុជា ឱ្យមានសមត្ថភាពចូលប្រឡូកក្នុងទីផ្សារការងារដែលកំពុងមានតម្រូវការខ្លាំងនាពេលបច្ចុប្បន្ន។
នៅក្នុងជំនួបពិភាក្សាការងារ កាលពីព្រឹកថ្ងៃទី២៣ ខែកុម្ភៈ ឆ្នាំ២០២៣នេះ នៅទីស្តីការក្រសួងការងារ លោក Tan Wee Pin នាយកប្រតិបត្តិ នៃសាលាអន្តរជាតិសិង្ហបុរី-កម្ពុជា បានជម្រាបជូនឯកឧត្ដមរដ្ឋមន្ត្រី អ៊ិត សំហេង ពីកម្មវិធីរបស់សាលា ដោយបង្កើតក្នុងឆ្នាំ២០១៧ ជាបុត្រសម្ព័ន្ធរបស់វិទ្យាស្ថានគ្រប់គ្រងរបស់សិង្ហបុរី បង្រៀនចាប់ពីថ្នាក់មត្តេយ្យដល់ថ្នាក់ទី១២ ដែលជាប្រព័ន្ធអប់រំរបស់សិង្ហបុរី។ ទន្ទឹមនេះខាងសាលា ក៏មានការកម្មវិធីអប់រំតាមប្រព័ន្ធ STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ថែមទៀត។
នៅក្នុងឱកាសនោះ ឯកឧត្ដមរដ្ឋមន្ត្រី បានធ្វើការវាយតម្លៃខ្ពស់ និងអរគុណដល់ខាងសាលា ដែលបានធ្វើការវិនិយោគលើវិស័យអប់រំនេះនៅកម្ពុជា ដែលរាជរដ្ឋាភិបាលចាត់ទុកជាវិស័យអាទិភាពដ៏សំខាន់បំផុតមួយ។ ឯកឧត្ដម បានបន្តថា ការវិនិយោគរបស់សាលាលើការអប់រំរបស់កុមារតូច បានផ្ដល់ប្រយោជន៍ និងសារសំខាន់ដល់ការលូតលាស់កាយសម្បទា និងប្រាជ្ញាស្មារតីរបស់កុមារ។ មួយវិញទៀត កម្មវិធីអប់រំដែលយកពីសិង្ហបុរី ក៏ត្រូវស្របទៅនឹងប្រព័ន្ធអប់រំរបស់កម្ពុជាដែរ។
ទន្ទឹមនេះដែរ ឯកឧត្ដមរដ្ឋមន្ត្រី បានលើកទឹកចិត្តឱ្យខាងសាលាអន្តរជាតិមួយនេះ ចូលរួមធ្វើការបណ្ដុះបណ្ដាលជំនាញបច្ចេកទេសវិជ្ជាជីវៈផងដែរ ពីព្រោះថា ដោយក្នុងឆ្នាំ២០២៣នេះ រដ្ឋាភិបាលកម្ពុជា មានផែនការបណ្ដុះបណ្ដាលយុវជនចំនួន ១លាន ៥សែននាក់ ដើម្បីចូលទៅក្នុងទីផ្សារការងារ។ ដោយហេតុថា សព្វថ្ងៃនេះ បញ្ហាកម្លាំងពលកម្មរបស់កម្ពុជានៅមិនទាន់ឆ្លើយតបបានទៅនឹងតម្រូវការ នៃការអភិវឌ្ឍយ៉ាងលឿនរបស់សេដ្ឋកិច្ចកម្ពុជា ដូច្នេះ ដើម្បីធ្វើការអនុវត្តន៍នូវគម្រោងនេះទទួលជោគជ័យ ទាមទារឱ្យមានការចូលរួមទាំងវិស័យរដ្ឋ និងឯកជនឱ្យបានផុសផុល។
ជាកិច្ចឆ្លើយតប លោកនាយកប្រតិបត្តិ អរគុណចំពោះឯកឧត្តមរដ្ឋមន្ត្រី ដែលបានផ្តល់ការសហការជាមួយខាងសាលារបស់លោក ហើយរូបលោកក៏ចង់ឱ្យមានកិច្ចព្រមព្រៀងលើអនុស្សរណៈមួយបន្ថែមទៀត ជាមួយខាងក្រសួង ដើម្បីបន្តកិច្ចសហការ នៅលើផ្លូវតែមួយនៃវិស័យអប់រំ ក៏ដូចជាការបណ្តុះបណ្តាលជំនាញវិជ្ជាជីវៈឱ្យទទួលបានផ្លែផ្កាជាវិជ្ជមាន៕ អត្ថបទ ៖ បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
