ភ្នំពេញ÷ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការ ក្រសួងសុខាភិបាល ប្រាប់ BTV ព័ត៌មាន នាយប់ថ្ងៃទី២៣ ខែកុម្ភៈ ឆ្នាំ២០២៣នេះថា គិតត្រឹមល្ងាចនេះក្រុមការងារឆ្លើយតបបន្ទាន់ របស់នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល បានរកឃើញអ្នកប៉ះពាល់ជាមួយកុមារីកើតជំងឺផ្តាសាយបក្សី H5N1 មានចំនួន១២នាក់ ក្នុងនោះ៤នាក់ មានរោគសញ្ញាធម្មតា ឋិតក្នុងស្រុកស៊ីធរកណ្តាល ខេត្តព្រៃវែង។

លោកជំទាវ វេជ្ជបណ្ឌិត បានលើកឡើងទៀតថា មកដល់ពេលនេះមន្រី្តជំនាញរកឃើញអ្នកប៉ះពាល់ចំនួន១២នាក់ ប៉ុន្តែ៤នាក់ មានរោគសញ្ញាធម្មតា គ្មានអាការៈធ្ងន់ធ្ងរនោះទេ។ កាលណាមានរោគសញ្ញាផ្លូវដង្ហើម គឺយើងត្រូវតែប្រុងប្រយ័ត្ន ហើយក្រុមការងារឆ្លើយតបបន្ទាន់ បានយកសំណាកភ្លាម ដើម្បីបញ្ជូនមកបញ្ជាក់នៅមនី្ទរពិសោធន៍នៅក្រសួងសុខាភិបាល រាជធានីភ្នំពេញ។ ដោយឡែកសម្រាប់ថ្ងៃស្អែក ក្រុមឆ្លើយតបបន្ទាន់ និងបន្តស្រាវជ្រាវនៅតាមសាលារៀន។

សូមបញ្ជា់ថា ក្រុមឆ្លើយតបបន្ទាន់របស់ក្រសួងសុខាភិបាល និងថ្នាក់ក្រោមជាតិបាននឹងកំពុងធ្វើការអង្កេតស្រាវជ្រាវការកើតឡើងនូវជំងឺផ្តាសាយបក្សីប្រភេទថ្មីនេះ និងធ្វើការឆ្លើយតបទៅតាមវិធីសាស្រ្ត នីតិវិធីរបស់ជាតិ និងបានសហការគ្នារវាងក្រុមឆ្លើយតបបន្ទាន់ពេទ្យមនុស្ស និងពេទ្យសត្វ ស្វែងរកប្រភពចម្លងទាំងលើសត្វ និងលើមនុស្ស និងបន្តស្វែងរកករណីសង្ស័យ និងអ្នកប៉ះពាល់ ដើម្បីទប់ស្កាត់ការឆ្លង បន្តទៅអ្នកដទៃទៀត ទាំងក្នុងសហគមន៍ និងក្នុងពីធីបុណ្យ និងធ្វើយុទ្ធនាការអប់រំសុខភាពប្រជាពលរដ្ឋ នៅក្នុងភូមិដែលកើតហេតុខាងលើ។

សូមរំលឹកផងដែរថា នៅព្រឹកថ្ងៃទី២៣ ខែកុម្ភះនេះ លោកជំទាវវេជ្ជបណ្ឌិត យក់ សម្បត្តិ ក៏បាននាំយកថវិកា សម្ដេចតេជោ ហ៊ុន សែន ចំនួន២លានរៀល ទៅប្រគល់ជូនក្រុមគ្រួសារសព កុមារីម្នាក់អាយុ ១១ឆ្នាំ ដែលបានស្លាប់ដោយវីរុសផ្ដាសាយបក្សី (H5N1) នៅភូមិរលីង ឃុំរំចេក ស្រុកស៊ីធរកណ្ដាល ខេត្តព្រៃវែងផងដែរ៕ អត្ថបទ÷ រដ្ឋា