បាល់ទះ៖ កីឡាករបាល់ទះជម្រើសជាតិកម្ពុជា វឿន វាសនា បានធ្វើដំណើរទៅដល់ប្រទេសវៀតណាមហើយ ដើម្បីចូលរួមជាថ្មីជាមួយក្លិប Lavie Long An ក្នុងតម្លៃខ្លួនប្រមាណជាង ២ម៉ឺនដុល្លារ។ នេះបើតាមការបញ្ជាក់របស់លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា ហើយលោកបានអំពាវនាវឲ្យកីឡាករផ្សេងៗ ត្រូវខិតខំប្រឹងប្រែងហ្វឹកហាត់ ដើម្បីទទួលបានឱកាសមាសដូច វាសនា នាថ្ងៃអនាគត។
វឿន វាសនា បានចាកចេញពីមាតុភូមិកាលពីម្សិលមិញ ក្រោយរួមចំណែកជួយក្រុមជម្រើសជាតិកម្ពុជាយកឈ្នះក្រុមជម្រើសជាតិ U19 បារាំងដោយលទ្ធផល ៣-១សិតក្នុងជំនួបមិត្តភាពអន្ដរជាតិលើកទី២ កាលពីល្ងាចថ្ងៃទី២២ ខែកុម្ភៈកន្លងទៅនៅវិមានពហុកីឡដ្ឋានជាតិ។ នេះជាលើកទី២ ហើយដែលកីឡាករវ័យ ២៣រូបនេះបានលេងឲ្យក្លិប Lavie Long An បន្ទាប់ពីរូបគេលេងឲ្យលើកដំបូងកាលពីកំឡុងខែមីថុនា ឆ្នាំ២០២២។ លោកបណ្ឌិត អាំង សិរីពិសិដ្ឋ បានបញ្ជាក់ថា កាលពីឆ្នាំកន្លងទៅ វាសនា បានលេងឲ្យក្លិបលីគកំពូលបាល់ទះវៀតណាមនេះក្នុងតម្លៃខ្លួនជាង ១ម៉ឺនដុល្លារសម្រាប់រយៈពេល ២សប្ដាហ៍ តែទៅលើកនេះគឺទទួលបានតម្លៃខ្លួនទ្វេ។
លោកបានចាត់ទុកនេះគឺជាការបើកផ្លូវមួយ សម្រាប់កីឡាករផ្សេងៗទៀតដែលត្រូវខិតខំប្រឹងប្រែងហ្វឹកហាត់ និងត្រូវលេងតាមក្បួនខ្នាតត្រឹមត្រូវ ដើម្បីទទួលបានឱកាសទៅលេងនៅក្រៅស្រុក និងទទួលបានតម្លៃខ្លួនខ្ពស់ដូចគ្នា។ សូមបញ្ជាក់ថា កិច្ចសន្យាជាមួយក្លិប Lavie Long An លើកនេះគឺ វឿន វាសនា មានភារកិច្ចជួយក្លិបចំនួន ៦ប្រកួតក្នុងនោះ ៣ប្រកួតត្រូវលេងកំឡុងខែកុម្ភៈ និងខែមីនា ហើយ ៣ប្រកួតទៀត វាសនា ត្រូវលេងឲ្យក្លិបបាល់ទះវៀតណាមនេះនាខែធ្នូ ឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
