មីយ៉ាន់ម៉ា៖ មេបញ្ជាការកងទ័ពសហភាពមីយ៉ាន់ម៉ា លោកឧត្តមសេនីយ៍ មីន អ៊ុងលាំង បាននិយាយថា លោកនឹងពិចារណាលើការទទួលយកប្រេសិតពិសេស ដែលក្រុមមេដឹកនាំអាស៊ានផ្អាកបញ្ជូនឲ្យមកជួយសម្របសម្រួល ការជជែកដោះស្រាយនៅក្នុងចំណោមភាគីពាក់ព័ន្ធនឹងវិបត្តិនយោបាយ បន្ទាប់ពីរដ្ឋប្រហារកាលពីថ្ងៃទី០១ ខែកុម្ភៈកន្លងទៅ។
សេចក្ដីរាយការណ៍បានឲ្យដឹងថា លោក អ៊ុងលាំង បាននិយាយប្រាប់ជំនួបក្រុមប្រឹក្សារដ្ឋបាលរដ្ឋថា លោកនឹងពិចារណាលើការទទួលយកប្រេសិតពិសេស បើសិនជាការធ្វើបែបនេះអាចជួយនាំស្ថិរភាពមកកាន់សហភាពមីយ៉ាន់ម៉ាវិញបាន។ លោកបាននិយាយថា សន្តិភាព និងស្ថិរភាពនៅក្នុងប្រទេសរបស់លោកគឺជាអាទិភាពកំពូល។ គួរឲ្យដឹងថា ការបញ្ជូនប្រេសិតពិសេសគឺស្ថិតនៅក្នុងចំណោម ៥ចំណុចដាក់ជូនសហភាពមីយ៉ាន់ម៉ា ដែលក្រុមមេដឹកនាំអាស៊ានបានព្រមព្រៀងគ្នាកាលពីថ្ងៃសៅរ៍នៅក្នុងទីក្រុងហ្សាកាតា ប្រទេសឥណ្ឌូនេស៊ី ដោយមានវត្តមានរបស់លោក មីន អ៊ុងលាំង ផងដែរ។ ចំណុចផ្សេងទៀត រួមទាំងការបញ្ឈប់បន្ទាន់ការប្រើអំពើហិង្សានៅសហភាពមីយ៉ាន់ម៉ាផងដែរ។ ទូរទស្សន៍រដ្ឋសហភាពមីយ៉ាន់ម៉ាបានរាយការណ៍កាលពីថ្ងៃចន្ទថា លោក មីន អ៊ុងលាំង បាននិយាយប្រាប់សមាជិកក្រុមប្រឹក្សា ពាក់ព័ន្ធនឹងមតិរួមឈានដល់នៅជំនួបកំពូលក្រុមមេដឹកនាំអាស៊ាន។
លោកបាននិយាយថា លោកនឹងពិចារណាលើសំណើពាក់ព័ន្ធនឹងប្រេសិតពិសេស ប៉ុន្តែលោកមិនបាននិយាយអ្វីផ្សេងពីការព្រមព្រៀងគ្នានោះទេ។ សូមបញ្ជាក់ថា បាតុកម្មប្រឆាំងនឹងរដ្ឋប្រហារនៅតែបន្តកាលពីថ្ងៃចន្ទនៅមីយ៉ាន់ម៉ា ក្នុងនោះគ្រោះថ្នាក់បានកើតមានក្រោយការបង្ក្រាបពីយោធាមកលើក្រុមបាតុករ។ ពលរដ្ឋបានចាត់ទុកកិច្ចខិតខំស្វែងរកកិច្ចពិភាក្សាជាមួយអាស៊ានថា ជាការប៉ុនប៉ងដោយយោធាក្នុងការស៊ីពេលតែប៉ុណ្ណោះ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
