ភ្នំពេញ៖ ជាការកត់សម្គាល់ តាមរយៈវេទិកាការងារ ដែលរៀបចំឡើងនៅក្រសួងការងារ និងបណ្តុះបណ្តាលវិជ្ជាជីវៈ មិនមានការគិតថ្លៃ ឬតម្រូវឲ្យបង់ប្រាក់ថ្លៃបំពេញពាក្យណាមួយនោះទេ គ្រាន់តែអ្នកដែលមានបំណងស្វែងរកការងារ ឬចង់ផ្លាស់ប្តូរបទពិសោធន៍ការងារ សូមត្រៀម​ប្រវត្តិរូបសង្ខេប (CV) និងរៀបចំខ្លួនឲ្យបានសមរម្យ ដើម្បីជួបសម្ភាសន៍ផ្ទាល់​ជាមួយតំណាងក្រុមហ៊ុន នៅវេទិកាការងារផ្ទាល់តែម្តង។

ក្នុងកិច្ចសម្ភាសន៍ ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី២៣ កុម្ភៈ ឆ្នាំ២០២៣នេះ កញ្ញា ជិន ស្រីនីត និងលោក រ៉ា វាសនា ជាពលរដ្ឋរស់នៅរាជធានីភ្នំពេញ បាននិយាយថា ការមកដាក់ពាក្យ ដើម្បីជួបសម្ភាសន៍ការងារនៅមជ្ឈមណ្ឌលការងាររាជធានីភ្នំពេញ នៃក្រសួងការងារ និង​​បណ្តុះបណ្តាល​វិជ្ជាជីវៈ មិនមានការចំណាយថ្លៃទិញពាក្យ ឬបង់ប្រាក់ក្នុងការជួបសម្ភាសន៍​ជាមួយ​ក្រុមហ៊ុន​​ណា​មួយនោះទេ ដោយមានភាពងាយស្រួល និងគ្រាន់តែភ្ជាប់មកជាមួយនូវប្រវត្តិរូប​សង្ខេប (CV) អត្តសញ្ញាបណ្ណ និងរៀបចំខ្លួនឲ្យបានសមរម្យ ដើម្បីជួបសម្ភាសន៍ជាមួយតំណាង​ក្រុមហ៊ុន​ក្នុងវេទិកាការងារនេះ។

កញ្ញា ម៉ៅ ចន្ថា មន្រ្តីជ្រើសរើសបុគ្គលិកជាន់ខ្ពស់ នៃក្រុមហ៊ុន វ័នម័រ លីមីតធីត បានឲ្យ ប៊ីធីវី ដឹងដែរថា គិតមកដល់ពេលនេះ ក្រុមហ៊ុនបានចូលរួមតាំងបង្ហាញការងារ ក៏ដូចជាជួប​សម្ភាសន៍ជាមួយអ្នកស្វែងរកការងារ និងអ្នកចង់ផ្លាស់ប្តូរបទពិសោធន៍ការងារជាច្រើនលើក ច្រើន​សារមកហើយ ដោយមិនមានការគិតថ្លៃអ្វីទេពីពួកគាត់។

កញ្ញា បានឲ្យដឹងថា ការចូលរូមសហការជាមួយមជ្ឈមណ្ឌលការងាររាជធានីភ្នំពេញ គឺបានរួមចំណែកដ៏សំខាន់ក្នុងការជ្រើសរើសបុគ្គលិក​ប្រកបដោយគុណភាព និងទាន់តម្រូវការ​របស់ស្ថាប័ន។ បន្ថែមពីនេះទៀត គឺបានចូលរួមចំណែកជួយសិស្ស និស្សិត និងអ្នកកំពុងស្វែងរក​ការងារ ឲ្យមានឱកាសជួបសម្ភាសន៍ការងារផ្ទាល់។

សូមជម្រាបជូនថា វេទិកាការងារសម្រាប់ថ្ងៃទី២៣ ខែកុម្ភៈ ឆ្នាំ២០២៣នេះ មានក្រុមហ៊ុនធំៗចំនួន៨ ចូលរួមផ្តល់ឱកាសការងារសរុបចំនួន ៥៩២កន្លែង។ ក្រុមហ៊ុនក្នុងនោះមាន៖ ហាងម៉ាស្ទ័រ ស៊ុគីស៊ុប, ក្រុមហ៊ុន WOW NOW, ក្រុមហ៊ុន KOFI, ក្រុមហ៊ុន វ័នម៉រ, ធនាគារឯកទេស AEON, ក្រុមហ៊ុន Land &home EL&H, ធនាគារមហានគរ និងក្រុមហ៊ុន ទ្រូម៉ាន់នី (Truemoney)។ វេទិកាការងារនេះ រៀបចំដោយអនុវត្តយ៉ាងម៉ត់ចត់នូវវិធានការណ៍បង្ការអនាម័យស្របតាមការណែនាំរបស់ ក្រសួងសុខាភិបាល «៣ការពារ និង៣កុំ» ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ដើម្បីអាចធានាបាននូវសុវត្ថិភាព​ និងទំនុកចិត្តក្នុងការជ្រើស រើសកម្លាំងពលកម្ម និងទទួលបានឱកាសការងារ សម្រាប់ភាគីនិយោជក និងអ្នកស្វែងរកការងារ។

វេទិកាការងារនេះ ជាផ្នែកមួយនៃយន្តការរបស់រដ្ឋាភិបាលក្នុងការផ្ដល់ឱកាស​ដល់​សាធារណៈជន​ទូទៅ ជាពិសេសយុវជនដែលចង់ស្វែងការងារធ្វើ អ្នកស្វែងរកកន្លែងកម្មសិក្សា ឬអ្នកចង់ផ្លាស់ប្តូរការងារ អាចទទួលបានកាន់តែងាយស្រួល ដោយចំណេញពេលវេលា និងនៅមួយកន្លែង៕អត្ថបទ៖ ឈិត បូរ៉ាវី