កំពង់ឆ្នាំង៖ ឯកឧត្តម នាយឧត្តមសេនីយ៍ គន់ គីម អនុប្រធានទី១ គណៈកម្មាធិការជាតិគ្រប់គ្រង​គ្រោះមហន្តរាយ បានក្រើនរំលឹកដល់សិក្ខាកាមហ្វឹកហ្វឺនជំនាញ សង្គ្រោះគ្រោះមហន្តរាយថា ប្រតិបត្តិការសង្គ្រោះគ្រោះមហន្តរាយនានា ជាសមរភូមិមួយដែលទាមទារឱ្យមានការតាំងចិត្តខ្ពស់​បំផុត​សម្រាប់អ្នកប្រតិបត្តិការសង្គ្រោះ។

ឯកឧត្ដម បានថ្លែងបែបនេះ ក្នុងពេលអញ្ជើញជាអធិបតី ពិធីប្រគល់ ទទួលសំភារៈសង្រ្គោះផ្ទៃទឹក ជូនដល់ បញ្ជាការដ្ឋានទ័ពពិសេស កងទ័ពជើងគោក​ នៅទីបញ្ជាការដ្ឋានទ័ពពិសេស នៅព្រឹកថ្ងៃទី២៤​ ខែកុម្ភៈ ឆ្នាំ២០២៣នេះ។

ឯកឧត្តម បាននាំប្រសាសន៍ផ្តាំផ្ញើសាកសួរសុខទុកពីសំណាក់សម្តេចតេជោ ហ៊ុន សែន នាយករដ្ឋ​មន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន​ ជូនកម្លាំងសង្គ្រោះទាំងអស់ និងបាន​ជម្រាបជូនពួកគេថា សម្តេចតេជោ ​និងសម្តេចកិត្តិព្រឹទ្ធបណ្ឌិត តែងតែនឹករលឹកដល់កង​កម្លាំងរបស់គ្រប់ជាន់ថ្នាក់។

ឯកឧត្តម សង្កត់ធ្ងន់ថា រាជរដ្ឋាភិបាលកម្ពុជាក្រោមការដឹកនាំដឹកនាំរបស់សម្តេចតេជោ ហ៊ុន សែន តែងតែគិតគូរយកចិត្តទុកដាក់ដល់ការជួយសង្គ្រោះគ្រោះមហន្តរាយផ្សេងៗ ដែលកើតឡើង​ជាយកថាហេតុ ​ពីព្រោះគ្រោះមហន្តរាយមិនដឹងកើតឡើងនៅពេលណានោះទេ។

សម្តេចតេជោ ហ៊ុន សែន ជាប្រមុខដឹកនាំ ​តែងតែបានយកចិត្តទុកដាក់ចំពោះសុខទុក្ខ និង​ការលំបាក​របស់ប្រជាពលរដ្ឋ និងបានត្រៀមលក្ខណៈជួយសង្គ្រោះប្រជាពលរដ្ឋពី​គ្រោះធម្មជាតិ​នានាគ្រប់ពេលវេលា ព្រមទាំងថែរក្សាសន្តិភាពអោយបានយូរអង្វែងជូនប្រជាពលរដ្ឋរស់នៅ។

ឯកឧត្តម បន្ថែមថា ការបំពាក់ឧបករណ៍ សម្ភារៈបច្ចេកទេស នាពេលនេះ គឺជាការគិតគូរមួយ​របស់​សម្តេចតេជោ ហ៊ុន សែន ក្នុងការពង្រឹងសមត្ថភាពក្រុមការងារជួយសង្គ្រោះពេល​ហេតុការណ៍​គ្រោះមហន្តរាយផ្សេងៗដូចជា​ការបាក់រលំអគារ គ្រោះមហន្តរាយបណ្តាលមកធម្មជាតិ និង​ឧបទ្ទវហេតុ​ផ្សេងៗ​ទាំងលើគោក លើទឹកនិងលើអាកាសផងដែរ។

ឯកឧត្តម បន្ថែមថា ជីវិតរបស់ជនរងគ្រោះនៅក្នុងហេតុការណ៍ ឧបទ្ទវហេតុ​ទាំងឡាយ​ជា​គោលដៅ​ចម្បងបំផុត ដែលអ្នកសង្គ្រោះទាំងអស់ត្រូវតែផ្តោតការយកចិត្តទុកដាក់ខ្ពស់៕