ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្ដីនៃកម្ពុជា បានផ្តាំទៅបុគ្គលឈ្មោះ ស៊ន ដារ៉ា ឱ្យធ្វើសកម្មភាពល្មមៗ បានហើយ កុំវាយប្រហារអ្នកដទៃរួមទាំងឪពុកម្តាយគ្រួសារខ្លួនឯង ដែលជារឿងអគុណធម៌ខ្លាំងណាស់ក្នុងសង្គម។

សម្ដេចតេជោ នាយករដ្ឋមន្រ្ដី មានប្រសាសន៍បែបនេះ ក្នុងពេលធ្វើជាអធិបតី ពិធីប្រគល់សញ្ញាបត្រ​ជូននិស្សិតសាកលវិទ្យាល័យភូមិន្ទភ្នំពេញជាង ៧ ពាន់នាក់ ​នៅសាកលវិទ្យាល័យភូមិន្ទភ្នំពេញ នាថ្ងៃទី២៤ ខែកុម្ភៈ ឆ្នាំ២០២៣នេះ។

សម្ដេចតេជោ មានប្រសាសន៍ថា មិនមែនជាការចំឡែកនោះទេ ដែលបុគ្គល ស៊ន ដារ៉ា ប្រមាថថា ឪពុកម្ដាយខ្លួនឯងថា «កុំចេះខ្ញុំចេះជាងប៉ាឯង»។ សម្ដេចបន្តថា បើ ស៊ន ដារ៉ា ប្រើពាក្យបែបនេះមែន គឺគ្មានអ្វីចំឡែកឡើយដោយគេអាចចាត់ទុកថា «ទម្រាំឪពុកម្ដាយខ្លួនឯងនៅ ស៊ន ដារ៉ា វាយប្រហារ ចុះទម្រាំអ្នកដទៃ»។

សម្តេចតេជោ បានបញ្ជាក់ថា តាមអាយុរបស់ ស៊ន ដារ៉ា អាចសន្និដ្ឋានបានថា ឪពុកម្តាយរបស់ស៊ន ដារ៉ា ជាអ្នកដែលបានរួចរស់ពីការកាប់សម្លាប់ក្នុងរបប ប៉ុល ពត ហើយ ស៊ន ដារ៉ា គឺជាមរកតចេញ​ពីឪពុកម្តាយរបស់ខ្លួន ដូចអ្វីដែល ស៊ន ដារ៉ា ធ្លាប់និយាយថា «ហ៊ុន ម៉ាណែត ជាមរកតរបស់ហ៊ុនសែន» ដូច្នេះដែរ។

សម្តេចតេជោ ហ៊ុន សែន បានប្រកាសថា វាជារឿងអគុណធម៌​ និងអសីលធម៌ខ្លាំងណាស់ ដែល​ឪពុកម្តាយរបស់ខ្លួនប្រឹងប្រែងឱ្យកូនបានរួចរស់ និងបានរៀនសូត្ររហូតក្លាយបណ្ឌិតសាស្ត្រាចារ្យ បែរជា ស៊ន ដារ៉ា មកបង្អាប់បន្តុះឪពុកម្តាយជាមនុស្សល្ងង់ទៅវិញ៕អត្ថបទ៖ វ៉ន ដារ៉ា