ភ្នំពេញ៖ ក្រសួងសុខាភិបាលនៅថ្ងៃទី២៤ ខែកុម្ភៈ ឆ្នាំ២០២៣នេះ បន្តក្រើនរម្លឹកដល់ឪពុកម្ដាយ និងអ្នកថែទាំកុមារទាំងអស់ត្រូវដាក់កុមារនៅឱ្យឆ្ងាយពីសត្វបក្សីឈឺ ឬងាប់ និងព្យាយាម​ឱ្យកុមារ​លេង​ឱ្យឆ្ងាយពីសត្វ បក្សីដូចជាមានមាន់ និងទាជាដើម បន្ទាប់ពីក្នុងខែកុម្ភៈនេះបានរក​ឃើញករណី​ឆ្លងជំងឺផ្ដាសាយបក្សី(H5N1)ចំនួន ២ ករណី ជំងឺនេះនៅតែបន្តគំរាមកំហែងដល់សុខភាព​ប្រជាពលរដ្ឋ​កម្ពុជា និងកើតមានច្រើនលើកុមារដែលជាក្រុមមានហានិភ័យខ្ពស់ និងមានភាពងាយរង​គ្រោះច្រើន។

ឯកឧត្តមសាស្ដ្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលមានប្រសាសន៍ក្រើនរម្លឹក ដល់​បងប្អូនប្រជាពលរដ្ឋទូទៅថា «ជំងឺផ្ដាសាយបក្សី H5N1 នៅតែបន្តគំរាមកំហែង​ដល់សុខភាព​ប្រជាពលរដ្ឋកម្ពុជា និងកើតមានច្រើនលើកុមារដែលជាក្រុមមានហានិភ័យខ្ពស់ និង​មានភាពងាយរងគ្រោះច្រើន។

ឯកឧត្ដមបន្តថា ជានិច្ចកាលកុមារតែងតែមានការលេង​ និងឱ្យចំណី​បសុបក្សី ក្នុងស្រុក ឬជួយបោស​សម្អាតទ្រុង និងប្រមូលស៊ុតមាន់-ទា ហើយជាងនេះទៅទៀត កុមារអាច​ប៉ះពាល់ជិតស្និទ្ធ​ជាមួយ​បសុបក្សី​ដោយសារពួកគេចាត់ទុកវាដូចជាសត្វដែលចិញ្ចឹម ​និងលេងជាមួយសត្វដូច្នេះពួកគ មានភាព​ងាយរងគ្រោះច្រើន និងមានហានិភ័យខ្ពស់ ពីព្រោះពួកគេចូលចិត្តលេងកន្លែង ដែលមានបសុបក្សី។

ឯកឧត្ដមបញ្ជាក់ថា៖«សូមរម្លឹក ឪពុកម្ដាយ និងអ្នកថែទាំកុមារទាំងអស់ត្រូវដាក់កុមារនៅ​ឱ្យឆ្ងាយ​ពីសត្វបក្សីឈឺ ឬងាប់ និងព្យាយាមឱ្យកុមារលេងឱ្យឆ្ងាយ ពីសត្វទាំងនោះ មានមាន់ និងទាជាដើម»។

ក្រសួងសុខាភិបាលបានរម្លឹកឪពុកម្ដាយ អាណាព្យាបាល និងអ្នកថែទាំកុមារទាំងអស់ ត្រូវប្រាកដថា កុមារ ឧស្សាហ៍លាងដៃជាមួយសាប៊ូ នឹងទឹកស្អាត មុនពេល និងក្រោយពេលបរិភោគអាហារ និងបន្ទាប់ពីប៉ះជាមួយបសុបក្សី។ ប្រសិនបើកុមារ មាន​ដង្ហើម​ញាប់ ឬពិបាកដកដង្ហើមត្រូវនាំកុមារ​ទៅរកការព្យាបាលជាបន្ទាន់នៅគ្រឹះស្ថានសុខាភិបាល (បណ្ឌលសុខភាព ឬមន្ទីរពេទ្យរដ្ឋ) ដែលនៅជិតផ្ទះ របស់លោកអ្នកបំផុត ហើយត្រូវប្រាប់បន្តី សុខាភិបាល អំពីប្រវត្តិប៉ះពាល់ ជាមួយសត្វបក្សីឈឺឬងាប់។

បើតាមក្រសួងសុខាភិបាល ក្នុងខែកុម្ភៈនេះកម្ពុជាបានរកឃើញករណីជំងឺផ្ដាសាយបក្សីទី២ នៅកម្ពុជា បន្ទាប់ពីមិនបានរកឃើញវីរុសនេះលើខ្លួនមនុស្សអស់​រយៈពេល៩ឆ្នាំកន្លងមក​ហើយនៅកម្ពុជា។ ករណីចុងក្រោយនេះគឺជាករណីទី ៥៨ ដែលបានរកឃើញនៅថ្ងៃទី ២៣ ខែកុម្ភៈ ឆ្នាំ២០២៣នេះ។ ក្នុងករណីឆ្លងជំងឺនេះមាន ៤៥ ករណីកើតលើកុមាររយុក្រោម ១៤ ឆ្នាំ និង ៣១ ករណីក្នុងចំណោមករណីទាំង ៥៨ ជានារី។

ក្រសួងសុខាភិបាលបញ្ជាក់ថា ចាប់តាំងពីមានជំងឺផ្ដាសាយបក្សីលើកដំបូងនៅកម្ពុជាក្នុងឆ្នាំ២០០៥ មកនៅក្នុងចំណោមអ្នកដែលមានឆ្លងវីរុសផ្តាសាយបក្សី H5N1 ចំនួន ៥៨ ករណីមានតែ ១៩ ករណីទេ​ដែលមានជីវិត៕ អត្ថបទ៖ វ៉ន ដារ៉