​អឺរ៉ុប៖ មន្ត្រី​កិច្ចការបរទេស​កំពូល​របស់​សហភាព​អឺរ៉ុបលោក Josep Borrell បាន​ជួប​ជាមួយ​អ្នកការទូត​ជាន់ខ្ពស់​របស់​ចិនលោក Wang Yi នៅ​ទីក្រុង Munich ប្រទេស​អាល្លឺម៉ង់​កាលពី​សប្តាហ៍​មុន​។ លោក​បាន​និយាយថា ​លោក​បាន​សួរលោក Wang Yi អំពី​លទ្ធភាព​នៃ​ការគាំទ្រ​ផ្នែក​យោធា​របស់​ចិន​សម្រាប់​ប្រទេស​រុស្ស៊ី​។

លោក Borrell បាន​ប្រាប់​អ្នកសារព័ត៌មាន​នៅ​អង្គការសហប្រជាជាតិ​កាលពី​ថ្ងៃ​ព្រហស្បតិ៍ ទី២៣ ខែកុម្ភៈថា ​លោក​មាន​ភាពច្បាស់លាស់​ និង​អះអាង​យ៉ាងខ្លាំង ដោយនិយាយ​ថា ​យើង​ទាំងពីរ​នាក់​មាន​ទំនាក់ទំនង​ផ្ទាល់ខ្លួន​ល្អ​អស់​រយៈពេល​ជាច្រើន​ឆ្នាំ​មកហើយ​។​ ​លោក Borrell និយាយថា លោក​អាច​និយាយ​ឡើងវិញ​នូវ​អ្វីដែល​លោក Wang Yi បាន​ប្រាប់​លោក​ថា ចិន​មិន​កំពុងផ្តល់​អាវុធ​ឱ្យ​រុស្ស៊ី​នោះទេ ហើយក៏​នឹងមិន​ផ្តល់​អាវុធ​ឱ្យ​រុស្ស៊ី​នោះដែរ ព្រោះ​វា​ជា​ផ្នែក នៃ​គោលនយោបាយ​ការបរទេស​ដែល​មិន​ផ្តល់​អាវុធ​ដល់​ភាគី​ជម្លោះ​។

​ចាប់តាំងពី​ទីក្រុង​មូ​ស្គូបាន​ឈ្លានពាន​ប្រទេសជិតខាង​របស់ខ្លួន​កាលពី​ថ្ងៃទី២៤ ខែកុម្ភៈ​ឆ្នាំមុន​មក ប្រធានាធិបតី​រុស្ស៊ី​លោក Vladimir Putin បាន​បង្ហើប​ម្តង​ហើយ​ម្តង​ទៀតថា រុស្ស៊ី​អាច​ប្រើប្រាស់​អាវុធ​នុយក្លេអ៊ែរ ​ប្រសិនបើ​មានការ​គំរាមកំហែង៕

អត្ថបទ៖ ប៊ុនថន